नांवांत खूब कितें आसा ?

भांगरभूंय | प्रतिनिधी

नांवां बाबतींत आमी संवेदनशील लोकांनी जतनाय घेवंक जाय. गरज नासतना म्हापुरसांचीं, देवांचीं नांवां प्राणी सोडात, सरकारी आस्थापनांक पसून दिवपाक जायनात.

अामी भारतीय खूब संवेदनशील. आमकां तिडकूय रोखडीच येता. श्रद्धाय केन्ना दुखता तेंय कळना. ताकाच लागून घडये हाचे मुखार वाद टाळपाक रानवटी वा पाळीव सुकणें, सावदांक खंयच्याच धर्माच्या देवांचीं, राष्ट्रीय- आंतरराष्ट्रीय पुरस्कार मेळिल्ल्यांचीं, संत- म्हापुरुषांचीं, इतिहासीक मनशांचीं नांवां दिवचीं न्हय अशें कोलकाता उच्च न्यायालयान म्हणलां आसतलें. अर्थांत वयल्या न्यायालयांत वेगळो निकाल येवं येता. कितेंय आसलें तरी मुद्दाम दुसऱ्यांक चाळोवपाक तशीं नांवां दवरप समा न्हय! ह्या न्यायालयांत सध्या सीता नांवाची शिंवीण आनी अकबर नांवाच्या शिंवाचो वाद पावला. विश्व हिंदू परिशदेची ही याचिका. हीं नांवां कित्याक दवरलीं, हाची जाप न्यायालयान बंगाल सरकारा कडेन मागल्या. सरकार म्हणटा, हीं नांवां 15 वर्सां आदलीं. तीं त्रिपुरा प्राणीसंग्रहालयांत दवरल्यांत. तर फिर्यादी विहिंप म्हणटा, हिंदूंक चाळोवपाक तीं नांवां आतां मुद्दाम दवरल्यांत! ह्या वादांत त्या शींव आनी शिंविणीचें मत मात कोणेच विचारांत घेवंक ना. कारण तीं दोगांय फाटलीं बरींच वर्सां एकमेकांक वळखतात, तांची इश्टागतूय आसा!!
प्राणी दिवप- घेवप येवजणे खाला त्रिपुरांतली ही शिंवाची जोडी सिलिगुडी प्राणीसंग्रहालयांत हाडिल्ली. अकबर, सीता एकठांय रावतलीं ही खबर कळना फुडें भावार्थी नागरीक चवताळ्ळे, आमकां फोन, संदेश येवपाक लागले. ताका लागून आमी याचिका दाखल केली, अशें विहिंपान म्हणिल्ल्याचें छापून आयलां. हिंदूंच्या भावनांचो, श्रद्धेचो हो अपमान. सीता ही आमची देवी, अशेंय तांणी म्हणलां. ताचेर जाल्ले सुनावणे वेळार हीं दोनूय नांवां बदलचीं असो आदेश न्या. सौगता भट्टाचार्य हांणी बंगाल सरकाराक दिला.
न्यायालयांतले सुनावणेचीय म्हायती प्रसार माध्यमांनी आयल्या. न्यायमुर्तीन अतिरिक्त अॅडव्होकेट जनरलांक विचारलें, तुमी तुमच्या पाळीव प्राण्याचें नांव हिंदू वा मुस्लीम देवाच्या नांवान दवरतले? रवींद्रनाथांच्या नांवा वयल्यान प्राण्याक नांव दवरपाचो आमी विचार तरी करपाक शकतात? ताचेर आमी नांवां बदलपाचे आशिल्ले, पूण ताचे पयलींच वाद निर्माण करपाक कोणे तरी तीं नांवां व्हायरल केलीं, अशें अॅडव्होकेट जनरलान सांगलें. न्या. भट्टाचार्य हांणी म्हणलें, ह्या देशांतलो एक व्हडलो वर्ग सीतामातेची पुजा करता. अकबराचें नांव शिंवाक दिवपाकूय म्हजो विरोध आसा. तो कार्यक्षम, धर्मनिरपेक्ष मुघल सम्राट आशिल्लो. (आतां हाचेर वाद जायना जाल्यार पुरो!) बिजली वा दुसरें कितें नांव दवरूं येतालें. अस्तंत बंगालांत पयलींच जायते वाद जाल्यात. हो टाळपाक जातालो.
अस्तंत बंगालूच न्हय, तर देशभरांत प्राणी, संस्था, गांव, विमानतळ, विद्यापीठ, मैदान, येवजण्यांच्या नांवां वयल्यान व्हडले वाद जाल्यात. दंगल, हिंसाचार पसून जाला. गोंयांत मोपा विमानतळाक कोणाचें नांव दिवचें, हाचे वयल्यान सुरवेक वाद जाल्लो. टिकाय जाल्ली. भाऊसाहेब बांदोडकार हांचें नांव मुखार आयिल्लें. उपरांत मनोहर आंतरराष्ट्रीय विमानतळ अशें नांव जालें. गांवांचीं नांवां बदलप वा बदलपाची मागणी तर दरेका स म्हयन्यांनी जाता. मुस्लीम शासकांचीं नांवां आशिल्लीं शारां, गांवांचीं नांवां बदलपाच्यो घडणुको हालीं पसून जाल्यात. महाराष्ट्र, उत्तरप्रदेशांत जायतीं नांवां बदल्ल्यांत. (गांवची उदरगत खंयूय पावूं, नांव बदल्लें काय थोडे करोडांनी रुपयांची लाॅटरी लागिल्ले भशेन खोशी जातात.) गोंयांत वास्को दा गामा नांव बदलून संभाजीनगर करपाची मागणी बरींच वर्सां जाता. विद्यापिठांक अमूकच व्यक्तींचें नांव दवरचें हाचे वयल्यान व्हडले वाद महाराष्ट्रांत जाल्यात. कांय वर्सां पयलीं सरकारी वास्तूक, रस्त्याक महात्मा गांधीजी, पं. नेहरू हांचें नांव दवरताले. कर्तृत्ववान अशें आनिकूय खूब फुडारी आशिल्ले, तांचीं नांवां दिवं येतालीं! हालींच देशाचें इंडिया नांव बदलून ताचे बदला भारत नांव दवरपाचो विचार मुखार आयलो. पूण, हें खर्चीक काम. कारण डिजिटल आनी हेर सगल्या मळांचेर इंडिया नांवाची नोंद जाल्ली आसा. इंडिया, इंडियन नांव बऱ्याच उद्देगांच्या नांवांतूय आसा.
नांवां बाबतींत आमी संवेदनशील लोकांनी जतनाय घेवंक जाय. गरज नासतना म्हापुरसांचीं, देवांचीं नांवां प्राणी सोडात, सरकारी आस्थापनांक पसून दिवपाक जायनात. पूण, कांय लोक तीं मुद्दाम दवरतात. सिलिगुडी प्राणीसंग्रहालयांतल्या शिंवांक बंटी- बबली सारकें एखादें नांव आतां दवरून ह्या वादाचेर पड्डो उडोवचो. शेक्सपियरान आपल्या नाटकांत नांवांत कितें आसा? अशें म्हणलां. तो आयज आशिल्लो जाल्यार….