जपानान तयार केलो संवसारांतलो पयलो लांकडी उपगिरो

भांगरभूंय | प्रतिनिधी

टोक्यो, खबरां संस्था ः जपानी शास्त्रज्ञांनी संवसारांतलो पयलो लांकडी उपगिरो तयार केला. ब्रिटीश मिडिया ‘द गार्डियन’ च्या अहवाला प्रमाण लांकडापसून तयार केल्लो संवसारांतलो पयलो उपगिरो रोखडोच अमेरिकन रॉकेटांतल्यान प्रक्षेपित करतले. ते खातीर तयारी सुरू आसा. क्योटो विद्यापीठांतल्या एअरोस्पेस अभियंत्यांनी ताची निर्मिती केला. ताका लिग्रोसॅट अशें नांव दिला. हाका लागून प्रदुशण उणें जातलें. जें लांकडा पसून तें तयार करतात तें सोंपेपणान मोडना.

मंगोलियन लांकडाचो वापर

अवकाशांत जायत्या देशांचे उपगिरे आसात. हे कांय काळा उपरांत स्वताचो नाश करतात. तांचे कुडके अवकाशांत उफेतात. पूण कांय कुडके धर्तरेचेर पडटात. ताचें मनशांक लुकसाण जावं येता. हो कोयर टाळपाखातीर आनी अवकाश प्रदुशण उणें करपाखातीर जपानी शास्त्रज्ञांनी लांकडी उपगिरो तयार केला. हो उपग्रह मंगोलियन लांकडा पसून तयार केलां अशें शास्त्रज्ञांनी सांगलां. तो स्थीर आसून तो मोडना.

लांकूड बायोडिग्रेडेबल

क्योटो विद्यापिठाचे अभियंते कोजी मुराता हांणी सांगलें, लांकूड बायोडिग्रेडेबल आसा. म्हळ्यार ते पर्यावरणाक अनुकूल आसा. दुसरे म्हळ्यार जैवविघटनशील वस्तू सैमांत सैमीक रितीन नश्ट जातात आनी पर्यावरणाक हानी जायना. हें मतींत घेवन लांकडी उपगिरो तयार केला.

लांकडी उपगिऱ्याची गरज कित्याक?

क्योटो विद्यापिठाचो आनीक एक अभियंतो ताकाओ डोई हाणें सांगलें, धातूपसून तयार केल्ले उपगिरे अवकाशांत नश्ट जातात. ताचे कुडके जायते फावट धर्तरेचेर परत येतात आनी धर्तरेच्या वातावरणांत भितर प्रवेस करताच तें जळटात. ते जळटात तेन्ना तें ल्हान अॅल्युमिनियम कण तयार जातात. हे कण जायत्या वर्सां वयल्या वातावरणांत उरतात. धर्तरेच्या वातावरणाचेर ताचो वायट परिणाम जाता.

धातूच्या उपगिऱ्यांक लागून ओझोन थराक धोको

‘द गार्डियन’ च्या अहवाला प्रमाण फुडाराक दर वर्सा 2 हजारां परस चड अंतराळयान प्रक्षेपित करतलें असो अदमास आसा. हाका लागून वयल्या वातावरणांत व्हड प्रमाणांत अॅल्युमिनियम एकठांय जावपाची शक्यताय आसा. देखून व्हड समस्या निर्माण जावंक शकतात. ताका लागून ओझोन थरूय दुबळो जातलो असो दावो कांय संशोधनांत केला. ओझोन थर धर्तरेक सुर्याच्या धोक्याच्या अल्ट्राव्हायोलेट किरणांपसून राखण करता.