भांगरभूंय | प्रतिनिधी
सैमान आमकां खूब कितें दिलां. पूण आमी ताचो योग्य पद्दतीन वापर करपाक शकल्यातूच, अशें ना. देखीक सौर उर्जा. ही सगल्यांत सवाय, घे म्हूण मेळपी उर्जा. 200 वर्सां पयलीं तिचो सोद मनशाक लागलो. सुर्य आमकां मनशांक 173,000 टेरावॅट उर्जा दिता. सध्या संवसार वापरता ते वट्ट उर्जेच्या 10 हजार पटींनी ती चड आसा. पूण पावसाचें उदक जशें व्हांवन दर्याक मेळटा, तशी ही सुर्या पसून मेळपी उर्जा फुकट वता. तिचो वापर जायना. संवसारांत तयार जावपी वट्ट उर्जेच्या फक्त पांच टक्के उर्जा ही सुर्या पसून मेळपी. हाचे वयल्यान ह्या मळाचेर कितली संद आसा, ताची फक्त कल्पना करची. सध्या संवसारांत सगल्यांत चड सौर उर्जा वापरता कोण, तर चीन. 430 गिगावॅट. फुडल्या सात वर्सां भितर हो आंकडो 1,200 गिगावॅटाचेर व्हरपाची मोख चीनान दवरल्या आनी ते नदरेन कामूय सुरू केलां. आमच्या भारताचो क्रमांक संवसारांत पांचवो लागता. दोन वर्सां पयलीं आमी 62.80 गिगावॅट सौर उर्जा वापरताले. अर्थांत आतां हो आंकडो खूब वाडला आसतलो. पूण फुडल्या सात वर्सां भितर भारतानूय हे बाबतींत चीना वांगडा सर्त करपाचें मनार घेतलां. अंदूं घरांचेर सोलर पॅनल लावपाक 18 ते 20 हजार रुपया अनुदान दिवपाचें सरकारान थारायलां. तशें जालें जाल्यार हेर माध्यमांतल्यान मेळपी विजेची खूब बचत जातली.
गोंय उद्देग संघटनेनूय (जीएसआयए) 20 मेगावॅट सौर प्रकल्पा खातीर फुडाकार घेतला. राज्यांतल्या उद्देगीक आस्थापनांनी आपापल्या पांख्यांचेर (रुफटाॅप) सौर उर्जा प्रकल्प बसोवचे हे खातीर तांणी यत्न करपाचें थारायलां. कार्बन उणो करप, उर्जा कार्यक्षमताय वाडोवप, रिन्युवेबल उर्जा आपणावपाक चालना दिवप हे नदरेन ह्या यत्नाक खूब म्हत्व आसा. ताका लागून राज्याच्या उद्देगीक मळार उर्जा क्रांती जातली. हे बाबतींत ल्हान उद्देगांक केंद्र तशेंच राज्य सरकारुय अर्थीक मजतूय दिता. तेन्ना राज्यांतल्या प्रत्येक उद्देगीक आस्थापनान शक्य आसा तितली सौर उर्जा मेळोवपाक जाय. कांय जाणांनी पयलींच ते नदरेन पावलां उखल्ल्यांत, पूण हेर ल्हान- व्हड उद्देगांनी आतां मुखार सरुं येता. पिळर्ण उद्देगीक वसणुकेंत हे नदरेन एक प्रकल्प सुरू जाला. राज्यांतले दरेके उद्देगीक वसणुकेंत सौर उर्जा प्रकल्प सुरू जावंक जायच, खेरीज एकान एक उद्देगीक आस्थापनाचेर सोलर पॅनल दिसपाक जाय. ग्रीन एनर्जीचे दिकेन पावल उबारिल्ले खातीर जीएसआयएक परबीं फावतात.
फक्त उद्देग, कारखान्यांचेरुच कित्याक? सगल्या सरकारी आस्थापनांचेर, शिक्षणीक संस्थांचेर, बँकांचेर, देवळांच्या अग्रशाळांचेर, आपमजत गटाच्या रांदचे कुडींचेर, घरगुती लघुउद्देगांचेरुय हे सोलर पॅनल आसचे. ताका लागून प्रदुशण उणें जातलेंच, पूण विजेचीय बचत जातली. सौर उर्जा वापरून रस्त्या वयल्यो लायटी पेटोवंक मेळटांत, घरगुती वापराक वीज मेळपाक शकता. सध्या फक्त उदक तापोवपा पुरतोच सौर उर्जेचो चडशे कडेन वापर जाता. सरकारी आस्थापनांनी फाटीं सोलर पॅनल बसोवपाची घोशणा जाल्ली. पूण ती कितले मेरेन चालीक लागली तें कळना. गोंयांत सोलर पॅनल बसोवन दिवपी साबार उद्देजक आसात, तांचे कडल्यान सरकारान हें काम करून घेवं येता. केंद्र सरकारान 1 कोटी घरांचेर डिसेंबर मेरेन सोलर पॅनल बसोवपाची घोशणा केल्या. तातूंतलीं निदान पांच हजार तरी घरां गोंयचीं आसचीं! राज्य सरकारानूय सौर उर्जे खातीर पेंगट बांदून वावराक लागचें. नवे इमारत प्रकल्प उबे जातात, तांकां सोलर पॅनल सक्तीचे करुं येतात.
सौर उर्जेक उर्बा दितनाच पॅनलांक लागून येवपी पर्यावरण संकश्टाचेर उपाय काडपाक जाय. सौर पॅनल सादारण 25 ते 30 वर्सां तिगतात. सध्या संवसारांत तांचो आंकडो अदमासान अडेज अब्ज इतलो आसा. फुडल्या 25 वर्सांनी 20 कोटी टन सौर पॅनल कोयर तयार जातलो. फ्रान्सांत हालींच हे पॅनल रिसायकल करपाचो कारखानो चालू जाला. संवसारांतलो सध्याचो तरी हो पयलोच कारखानो. रिसायकल म्हणल्यार पॅनलांतले साबार भाग वेगळे करप, तांचो विलो लावप. तातूंतल्यान टायल्स, डांबर करूं येता. पूण ते पॅनल खंयचेच परिस्थितींत दुरुस्त करून परत वापरप धोक्याचे. तेन्ना हे नदरेंतल्यानूय विचार जावचो. भारतांत शास्त्रोक्त पद्दतीन सोलर पॅनल रिसायकल करपी कारखाने सुरू जावंक जाय.
पर्यावरणाक, जीव, जंतू, सावदां, सुकणीं आनी अर्थांत मनशांक सौर उर्जेचो चडांत चड वापर जाल्यार बऱ्याक पडटलें, हें सांगपाक विज्ञानीक नाकात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
