भांगरभूंय | प्रतिनिधी
2 024 हें वर्स वेंचणूक वर्स म्हूण इतिहासांत येतलें. कारण ह्या वर्सा लोकसभा, राज्यसभा, विधानसभा, विधानपरिशद, महानगर पालिका, नगर पालिका, जिल्हो परिशद, पंचायत समित्यो आनी कांय गांवच्यो ग्रामपंचायती अश्यो सगल्योच वेंचणुको जावपाच्यो आसात. म्हणल्यार ह्या वर्सा मतदार गल्ली ते दिल्ली मेरेन आपलो प्रतिनिधी वेंचतले. सगल्यांत पयलीं एप्रील मे म्हयन्यांत लोकसभेची वेंचणूक जातली. उपरांत सप्टेंबर, ऑक्टोबर म्हयन्यांत विधानसभांच्यो वेंचणुको जातल्यो. उपरांत थळाव्या स्वराज्य संस्थांच्यो वेंचणुको जातल्यो. लोकसभेचे वेंचणुकेची जाल्यार अधिसुचोवणीय आयल्या. सादारणपणान फुडल्या मार्च म्हयन्याच्या पयल्या वा दुसऱ्या सप्तकांत लोकसभा वेंचणुकेची आचारसंहिता लागपाची खर शक्यताय आसा. ताका लागून फक्त राजकी पक्षांक वा राजकी फुडाऱ्यांकूच न्हय जाल्यार देशांतल्या 80 कोटी परस अदीक मतदारांक लेगीत लोकसभा वेंचणुकेची उत्सूकताय लागल्या.
ह्या वेळार जावपी लोकसभा वेंचणूक ही देशाचे नदरेन सामकी म्हत्वाची आसा. कारण फुडल्या 20 वर्साच्या राजकारणाचें बीं हे वेंचणुकेंत रोयतले. सांगपाचें म्हणल्यार देशाच्या राजकारणाक मोडण दिवपीच ही वेंचणूक थारतली अशें मानतात. ताका लागून हे वेंचणुकेंत जैत मेळोवपा खातीर सत्ताधारी आनी विरोधक हे दोगूय कामाक लागल्यात. लोकसभा वेंचणुकेचे धोल आतां सावनूच बडोवंक सुरवात जाल्या आनी सत्ताधारी भाजपान ‘अब की बार 400 पार…’ अशी घोशणा दिल्या. जाल्यार कितेंय करून भाजपाक आनी तांच्या फुडारपणा खालचे एनडीएक खंयचेय परिस्थितींत भोवमत मेळूंक दिवप ना अशें काँग्रेसीच्या फुडारपणा खालच्या इंडिया आघाडीन थारायलां. अर्थांत एनडीएचे तुळेन इंडिया आघाडी दुबळी आसून इंडिया आघाडीक आतां सावनूच गळटी लागल्या.
आयजवेर इंडिया आघाडींत आशिल्ले आनी इंडिया आघाडीत प्रधानमंत्रीपदाचे उमेदवार म्हूण स्वताक प्रोजेक्ट करपी बिहारचे मुख्यमंत्री नितीश कुमार हांणी अचकीत पलटी मारून एनडीएत गेले. तांचे हे पलटीक लागून इंडिया आघाडीक बरोच धक्को बशिल्लो आसलो तरी इंडिया आघाडीतले हेर घटक पक्ष अजून लेगीत एनडीएक टक्कर दिवपाचे मानसीकतायेंत आसात. तेच बरोबर हालींच महाराष्ट्रांतले एक व्हड काँग्रेस फुडारी आनी आदले मुख्यमंत्री अशोक चव्हाण हांणी लेगीत काँग्रेस सोडून भाजपांत प्रवेश केलो. हो एक मोटो महाराष्ट्रांतले काँग्रेसी खातीर आनी इंडिया आघाडीक धक्को आसा. इतलें सगलें आसून लेगीत कितेंय जालें तरी हार मानपाची ना अशें इंडिया आघाडीतल्या पक्षांनी थारायलां. दक्षीणे काडलीं राज्यां आनी महाराष्ट्र, गोंय, हरियाणा, राजस्थान, पंजाब, अस्तंत बंगाल तशेंच ईशान्ये कडलीं राज्यां आमकां लोकसभा वेंचणुकेंत सांगात दितलीं अशी आस्त विरोधकांक आसा. जाल्यार फाटल्या धा वर्साचे कामगिरीचेर आनी मोदी गॅरंटीचेर आपूण 400 चो आंकडो सहजतायेन हुपूं असो विस्वास एनडीएक आसा. ताका लागून सत्ताधारी आनी विरोधक दोगूय इलेक्शन मोडांत पावल्यात आनी लोकसभा वेंचणुकेची उत्सूकताय दोगांकूय लागल्यात.
इंडिया आघाडीन एनडीएक आव्हान दिल्लें आसलें तरी सद्याचे स्थितींत एनडीए आघाडेर आसा. दोन म्हयन्यां पयलीं जाल्ल्या चार राज्यांतल्या विधानसभा वेंचणुकांनी तेलंगणा सोडल्यार उरिल्ल्या तीन राज्यांनी भाजपाक मोटें जैत मेळ्ळां. तशेंच उत्तर प्रदेश, उत्तराखंड, मध्य प्रदेश, बिहार, छत्तीसगड ह्या राज्यांनी लोकसभेच्या वांगड्यांची संख्या चड आसा. फक्त उत्तर प्रदेशांत 80 खासदार आसात. थंय भाजपाची स्थिती घटमूट आसा. तातूंत वेंचणुके पयलींच प्रधानमंत्री नरेंद्र मोदी हांणी राम मंदिराचें उक्तावण केलें. ताचोय लाव भाजपाक जातलो. लोकसभा वेंचणुकेंत भाजपाक भोवमत मेळटलें असो सर्वे लेगीत खूबशा संस्थांनी केला. पूण इंडिया आघाडीचे वटेन आसपी मतदारांची संख्याय उणी ना. ताका लागून विरोधकूय तितलेच ताकदीन मैदानात देंवतले हें नक्की. हे लोकसभा वेंचणुकेंत कोणाक जैत मेळटलें आनी कोणाक हार खावची पडटली हें समजुपाक अजून दोन ते तीन म्हयने उरिल्ले आसले तरी हे वेंचणुकेची उत्सूकताय मात आतां सावनूच लागल्या.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
