भांगरभूंय | प्रतिनिधी
राज्याची अर्थवेवस्था चलोवपी खण वेवसाय बंद जाले उपरांत हजारांनी लोकांच्या उदरनिर्वाहाच्या साधनांचेर हांवळ आयिल्ल्याचें आमी पळयलां. हे ताजें उदाहरण फुड्यांत आसतना पर्यटन उद्देगांत सुरू अशिल्लो भ्रश्टाचार आनी बेकायदेशीर बांदकामांची प्रकरणां नदरे खाला घालीत जाल्यार खणी उपरांत पर्यटनाचेरूय बी हावळ येवची ना मूं, असो प्रस्न विचारपाचो वेळ आयला.
फाटोफाट फुगेटी पेटत वच्च्यो तशीं उत्तर गोंयच्या दर्यादेगे वयल्या बेकायदेशीर बांदकामांची प्रकरणां सद्याक एका फाटोफाट एक उक्तडार येत आसात. हणजूण दर्यादेगे वयलीं 175 बांदकामांक सील करात, अशे आदेश मुंबय उच्च न्यायालयाच्या गोंय खंडपिठान मंगळारा दिले आनी रोखडेंच बुधवारा हरमल दर्यादेगेच्या 217 बांदकामांचेर कारवाय करपाचें फर्मान सोडलां. दर्यादेग नियमन क्षेत्र म्हणल्यार सीआरझॅड कायद्याचे उल्लंघन करून विकासबाह्य वाठारांत हीं बांदकामां जाल्यात. विशेश म्हटल्यार दर्यादेगे वयल्या नुस्तेकारांची हीं घरां न्हय, तर सगलीं वेवसायीक आस्थापनां जावन आसात. धपको दिवपी गजाल म्हणल्यार पंचायतीचो परवानो ना, प्रदुशण नियंत्रण मंडळाची मान्यताय ना, उजो पालोवपी दळाची मंजुरी ना आनी नगर नियोजन खात्याचो परवानो घेवपाचो प्रस्नूच येना. हें सगळें चित्र पळयले उपरांत स्थानीक स्वराज्य संस्था म्हणल्यार ग्रामपंचायती ते वयर मेरेनची सरकारी यंत्रणा कशी भ्रश्टाचाराचे वाळटेन पोखरल्या हेंच दिसून येता. हुस्क्याची गजाल म्हणल्यार कोणें तरी उच्च न्यायालयांत याचिका दाखल केले उपरांत ह्यो गजाली उक्तडार येतात. खरें म्हणल्यार ह्यो बेकायदा गजाली उक्तडार हाडपी वावुरप्यांचो भोवमान, अभिनंदन करचें सोडून आमचे लोकप्रतिनिधी तांकां लोकांचे दुस्मान आनी विकासाचे मारक अशें म्हूण जाहीर हिणसायतना पळोवंक मेळ्ळे. मुंबय उच्च न्यायालयान निर्देश दिले उपरांतूय बी कारवाय करप ना आनी फटीचीं, दिशाभूल करपी प्रतिज्ञापत्रां सादर करप ह्या धाडसाक कितें म्हणप हेंच कळना जालां. न्यायसंस्थेक बोल्सांत घालपाचें धाडस करपी हे लोक सामान्य भौसाक कितें न्याय दितले हाचो विचारूच केल्यार आंग शिरशिरता.
कोट्यांनी रुपयांची गुंतवणूक करून हीं बांदकामां उबीं जाल्यांत आनी कोणाचें तरी आस्वासन वा प्रोटेक्शन मेळ्ळे बगर असो पयसो खर्च जांवक शकता, हें पटना. मागीर ह्या बेकायदेशीर बांदकामांक संरक्षण दिवपी कोण, हाचोय सोद लावचो पडटलो. न्यायालयाचे नदरेक ह्यो सगल्यो गजाली आयले उपरांतूय न्यायालय ह्या अधिकाऱ्यांक सेवेंतल्यान निलंबीत वा बडतर्फ करूंक शकना. ही कारवाय सरकाराकूच करची पडटली आनी म्हणूनच पंचायत संचालकांक हे संबंदी कितें कारवाय केल्या ती सांगपाचे निर्देशूय बी न्यायालयान दिल्यात. आतां ह्यो बेकायदाे गजाली उच्च न्यायालया मुखार उक्तडार येवनूय जर तांचेर खर कारवाय करचें सोडून सरकार तांकां संरक्षण दिवपा संबंदी केंद्र सरकारा कडेन उलोवणीं करतलें अशें भाश्य स्वता मुख्यमंत्र्यां कडल्यानूच जाता म्हणटकच उपरांत ह्या सगल्या घडामोडींतल्यान निमाणो अंतीम निकाल कितें तर टटफ, अशेंच म्हणपाचें काय कितें? विधानसभेंतल्या वांगड्यांक कायदो करपाचो आनी तो दुरुस्त करपाचो पूर्ण अधिकार आसा. तांणी तयार केल्ल्या कायद्याचो भंग जावपाक दिवप ना हें न्यायालयाचें काम. पूण, अशे तरेन साबार मळांचेर बेकायदेशीर गजालींक संरक्षण मेळत रावलें जाल्यार मागीर तळागाळांतल्या सामान्य भौसान कायद्याचें पालन करप तरी कित्याक, असोय प्रस्न पडटा. आयज बेकायदेशीर बांदकामां करपाचें धाडस कोणूय करतात, तें हाकाच लागून न्हय मूं?
हरमलांतल्या गिरकारवाड्यार जाल्ल्या ह्या बेकायदेशीर बांदकामांत तेन्नाचे सरपंच बेर्नार्ड फर्नांडीस हांकांय न्यायालयान बरेच वडीर काडल्यात. पूण हरमलचे हालींच जाल्ले ग्रामसभेंत एकाय ग्रामस्थान वा नागरिकान सरपंचाचे हे गजालीक विरोध वा हरकत घेवंक ना आनी सरपंचाचो निशेध पसून जावंक ना. पूण हेच ग्रामसभेंत न्यायालयांत याचिका दाखल केल्ल्या मनशाच्या नांवान मात शबय घालपाचो प्रकार घडलो. हाचोच अर्थ लोकांकूच ह्यो बेकायदा गजाली जाल्ल्यो जाय आनी ते खातीरूच समेस्त सरकारी यंत्रणां ह्या गजालींक पालव दितात अशें म्हणलें म्हूण कोणाक तिडक येवपाची गरज ना. लोकप्रतिनिधी ह्या नात्यान लोकां वांगडा रावप हें आपलें कर्तव्य अशें आमचे आमदार आनी मंत्री म्हणटले. मागीर न्यायालयांनीच आतां कायद्याचें राज्य चलोवपाचें कांय कितें असोय प्रस्न उप्रासता. रामलल्लाच्या भक्तींत बुडिल्ल्या आमच्या लोकप्रतिनिधींक प्रभू रामचंद्रां प्रमाण, न्यायाची आनी सत्याची बूज राखपाक खरेंच येस मेळटलें काय आमकां रावणा कडेन झूज दिवनूच रामराज्य हाडचें पडटलें, हें फुडल्या काळांत स्पश्ट जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
