भूंय विज्ञानाची : गगनयाना पयलीं व्योममित्रा रोबोट अंतरिक्षांत

भांगरभूंय | प्रतिनिधी

नवी दिल्ली, खबरां संस्था ः भारतीय अंतरिक्ष संशोधन संस्थेचे (ISRO) महत्वाकांक्षी गगनयान मिशनाच्या पयलीं व्योममित्रा ही बायल रोबोट अंतराळवीर ह्युमनॉइड व्योममित्रा अंतरिक्षांत उडटली. केंद्रीय विज्ञान आनी तंत्रज्ञान राज्यमंत्री (स्वतंत्र प्रभार) डॉ. जितेंद्र सिंह हांणी ही म्हायती दिल्लींत दिली. कृत्रिम बुद्धीचे मजतीन मनशाभशेन वागपाक शकता असो रोबोट म्हळ्यार ह्युमॅनॉइड. अंदूं जुलय 2024 उपरांत मनीसबळ नाशिल्ल्या व्योममित्र मिशनाची येवजण आसा अशें डॉ जितेंद्र सिंहान सांगलें.

मानवीय व्योममित्रा कोण?

व्योमामित्रा दोन संस्कृत उतरांपसून तयार जालां. व्योम म्हळ्यार थळ आनी इश्ट. व्योममित्रा मॉड्यूलाच्या मापदंडांचेर नियंत्रण दवरूं येता, शिटकावणी दिवंक शकता आनी लाइफ सपोर्ट ऑपरेशन करपाक शकता अशें जितेंद्र सिंहान सांगलें. अंतरिक्षांतल्या वातावरणांतल्या मनशाच्या कृतीचें अनुकरण करपाखातीर ताची रचना केल्ली आसा.

ह्युमनॉइड कसो काम करता?

ह्युमनॉइड हो एक प्रकारचो रोबोट आसून तो मनशाभशेन हालचाल करपाक शकता. मनशाच्यो भावनाय समजूंक शकता. तशेंच कृत्रिम बुद्धी प्रोग्रामिंगांतल्यान प्रस्नांक जाप दिवंक शकता. ह्युमनॉइड्सांत दोन खाशेले भाग आसतात, जे तांकां मनशाभशेन प्रतिक्रिया आनी हालचाल करपाक मजत करता.

० सेन्सर्स – ताच्या आदारान भोंवतणचें वातावरण समजतात. कॅमेरा, स्पीकर आनी मायक्रोफोन फकत सेन्सर्स वरवीं नियंत्रीत करतात. ह्युमनॉइड्स ताच्या आदारान पळोवंक, उलोवंक आनी आयकूंक मेळटा.
० ॲक्ट्युएटर – हो एक खाशेलो प्रकारचो मोटर, जो मनशाभशेन चलपाक आनी हात-पांय हालवपाक मजत करता. ताच्या आदारान ह्युमनॉइड्स सामान्य रोबॉटांच्या तुळेंत खाशेल्या प्रकारच्यो क्रिया करपाक शकतात.

गगन्यान – भारताचें पयलें मानवयुक्त अंतरिक्ष मिशन

गगनयानाची चांचणी वाहन उड्डाण-टीव्हीडी 1 फाटल्या वर्सा 21 ऑक्टोबराक जाल्ली. आणीबाणीच्या वेळार क्रू एस्केप सिस्टम आनी पॅराशूट प्रणालीची चांचणी करप हो ताचो हेत आशिल्लो. प्रक्षेपण वाहनाचें ह्यूमन रेटिंग पुराय जालां. सगळ्यो प्रोपल्शन अवस्था सारकीं काम करतात. ताच्या प्रक्षेपणाची सगळी तयारी पुराय जाल्या. गगनयान प्रकल्पा खाला अंतरिक्षयात्र्यांचो पंगड 400 किमीच्या कक्षेंत धाडटले. उपरांत तांकां दर्यांत देंवोवन परतून धर्तरेचेर हाडपाची सुरक्षीत प्रक्रिया दाखयतले.

3 अंतरिक्ष कंपनींक यश

संवसारांतल्या तीन अंतरिक्ष कंपनींनी लोकांक अंतरिक्षांत व्हरपाक म्हत्वाचो वांटो घेतला. तातूंतली पयली रिचर्ड ब्रॅन्सनाची कंपनी व्हर्जिन गॅलेक्टिक, दुसरी जेफ बेझोस हाची कंपनी ब्लू ओरिजिन आनी एलान मस्क हाची स्पेसएक्स कंपनी. ह्या कंपनीं उपरांत चीन सयत हेर जायते देशूय अंतरिक्ष पर्यटनाक संबंदीत प्रकल्पांचेर काम करतात.