भांगरभूंय | प्रतिनिधी
डॉ. किरण बुडकुले: खांडोळ्यां सरकारी म्हाविद्यालयांत अनुवादक कार्यशाळेचो समारोप
वाळपय: कोंकणी भाशेचो आवांठ वाडोवप सामकें गरजचें आसा. जो मेरेन आमी कोंकणी भाशेचो आवांठ वाडयनात तो मेरेन ही भास गोंयकारांच्या मनांत रुजपाच्या आव्हानांक समर्थपणान तोंड दिवपाचे नदरेंतल्यान दरेकाच्या सहकार्याची अपेक्षा आसा. वेगळ्यावेगळ्या भाशांनी आशिल्लें ज्ञान हें कोंकणी भाशेंत येवंक जाय. जाल्यारूच कोंकणी भाशेची आशिल्ली गोडसाण बरे तरेन गोंयकारांच्या मनांत रुजूंक शकता अशें डॉ. किरण बुडकुले हांणी म्हणलें.
कोंकणी भाशेंत अनुवादक तयार करात. व्हड प्रमाणांत हेर भाशे विशीं आशिल्लें ज्ञान कोंकणी भाशेंत उलब्ध करात. तातूंतच कोंकणी भाशेचो फुडार लिपिल्लो आसा. हाचे कडेन आडनदर करिनासतना ताचे कडेन गंभीरतायेन पळोवपाचें आवाहन डॉ. बुडकुले हांणी केलें.
खांडोळेच्या सरकारी कला, विज्ञान आनी वाणिज्य म्हाविद्यालयांत भुमी क्रिएशन सांखळी आनी गोंय कोंकणी अकादेमी हांच्या जोड पालवान आयोजीत केल्ल्या अनुवादक कार्यशाळेच्या उक्तावण सुवाळ्यांत डॉ. बुडकुले उलयताल्यो.
ह्या सुवाळ्यांत गोंय कोंकणी अकादमीचे अध्यक्ष वसंत भगवंत सावंत, अखील भारतीय कोंकणी परिशदेचे अध्यक्ष चेतन आचार्य, सरकारी म्हाविद्यालय खांडोळेची प्राचार्य डॉ. पूर्णकला सामंत, उपप्राचार्य डॉ. डिलेक्टा डिकॉस्टा, इंग्लीश विभागाचे मुखेली डॉ. ऑस्कर नोरोन्हा आनी हेर मानेस्त हाजीर आशिल्ले.
ह्या वेळार वसंत सावंत हांची कोंकणी अकादेमीच्या अध्यक्षपदार निवड जाल्ले खातीर म्हाविद्यालया वतीन शाल, श्रीफळ आनी फुलांतुरो दिवन भोवमान केलो.
मुखार उलयतना डॉ. किरण बुडकुले हांणी म्हणलें, आयज व्हड प्रमाणांत कोंकणी भाशेंत साहित्य उपलब्ध जावंक लागलां. नवे नवे लेखक कोंकणी भाशेंतल्यान बरोवंक लागल्यात. बरे तरेचें साहित्य आयज कोंकणी भाशेंत उपलब्ध जायत आशिल्ल्यान वाचकांची संख्या लेगीत व्हड प्रमाणांत वाडूंक लागल्या. तरी लेगीत वेगळ्यावेगळ्या भाशांनी दर्जेदार साहित्य आसा. दर्जेदार ज्ञान आसा. तें कोंकणी भाशेंत उपलब्ध जायत जाल्यार ह्या भाशेची संपदा वाडटली आनी ही कार्यशाळा निश्चीतपणान फुडारांत म्हत्वाची थारतली.
सुरवेक प्राचार्य पूर्णकला सामंत हांणी येवकार दिलो. तांणी आपल्या उलोवपांत म्हणलें, तरणाट्यांनी कोंकणी भाशेची गिरेस्तकाय वाडोवपाचे नदरेंतल्यान अशे तरेच्यो कार्यशाळा म्हत्वाच्यो थारूंक शकतात. फुडारांत अशा उपक्रमाच्या माध्यमांतल्यान कोंकणी भाशेंत आशिल्ली गोडसाण वाडोवपा खातीर यत्न करचो अशी विनंती तांणी केली.
झिलू गांवकार हांणी प्रस्तावीक केलें. तांणी अनुवादक कार्यशाळा आयोजीत करपा फाटलो हेतू स्पश्ट केलो. दरेकान कोंकणी भाशेचे उदरगती खातीर यत्न करप गरजेचें आसा. दरेकान चानयेचो वांटो उबारचो. भुमी क्रिएशन सांखळी हांणी ही कार्यशाळा आयोजीत करून अनुवादक तयार करपाचें केल्लें धाडस फुडारांत दरेकाची उर्बा वाडयतले अशी आस्त तांणी उक्तायली.
हे कार्यशाळेंत शिक्षक, विद्यार्थी आनी साहित्यमोगी अशा वट्ट 100 जाणांनी वांटो घेतलो. प्रा. अनील सावंत हांणी कार्यशाळेंत मार्गदर्शन करतना प्रशासकी अनुवादक संगीता नायक हांणी डिजिटल माध्यम आनी अनुवादकांचे आधुनीक तंत्र डॉ. ऑस्कर हांणी इंग्लीश आनी पुर्तुगेझ भाशा अनुवादक संदी आनी आवांठ जाल्यार श्याम गांवकार हांणी पत्रकारितेंत अनुवादकाच्यो संदी ह्या विशयाचेर मार्गदर्शन केलें.
कार्यशाळेची समारोप कार्यावळ प्राचार्य पूर्णकला सामंत हांचे अध्यक्षताये खाला जाली. हे कार्यावळीक उपप्राचार्य डॉ. आशा गहलोत मुखेल सोयर्यो म्हूण हाजीर आशिल्ल्यो. कोंकणी विभाग मुखेली डॉ. प्रकाश वझरीकार आनी श्याम गांवकार हे खासा सोयरे म्हूण हाजीर आशिल्ले. तांचे हस्तुकीं वांटेकार जाल्ल्या प्रतिनिधींक प्रमाणपत्रां भेटयलीं. प्रा. किरण पालेकार हांणी उपकार मानले. जाल्यार सुवाळ्याचे सुत्रसंचालन प्रा. डिलायला आनी डॉ. रेश्मा खोलकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
