भांगरभूंय | प्रतिनिधी
कांदळीच्या खाची कोनशांत प्लास्टीकाच्यो पोतयो हुमकळटाल्यो, तर कांय कडेन लोकांचे पिंजके कपडे झाडांक वेंग मारून आशिल्ले, तर वता थंय बाटल्यो उदकांत उडक्यो मारताल्यो…
डॉ. सलीम अली पक्षी अभयारण्य हें नांव कोणाक नवें न्हय, अशी आस्त धरता. तिसवाडी म्हालांतल्या चोडण गांवांत तें आसा. कितलेशेंच लोक ताका भेट दितात. हांवूच खूब फावट पावलां म्हणल्यार फट थारचें ना. पूण, अंदू वर्साची अभयारण्यात केल्ली भोंवडी खूब आगळी- वेगळी आनी कल्पने भायली आशिल्ली. हरशीं आमी चलून ह्या अभयारण्याची जाग घेतालीं, पूण पयलेंच फावट हांवें बोट रायड करून हें अभयारण्य दोळ्यांनी भरून घेतलें. हाचें सगळें श्रेय नकुळ धावस्कार आनी डॉ. प्रकाश पर्येंकार हांकां फावो जाता. तांणी ही भोंवडी बेसबरें रितीन घडोवन हाडली.
सकाळीं आठ वरांचेर सुरु केली भोंवडी दनपारच्या 12 वरांचेर सोंपयली. मनाक वेगळेंच सुख मेळ्ळें. म्हादयचें उदक जेन्ना तिसवाडी तालुक्यांत पावता तेन्ना ताचें पुराय रुप बदलता. उदकाची पातळी वाडटा, उदकाची धार आनी पुराय दृश्य मनभुलयणें दिसता. सत्तरी वाठारांत व्हांवपी म्हादय आनी तिसवाडीत ती मांडवी न्हंय एकामेकां परस वेगळीं आसा हें जाणून आयलें. बोट रायड करता आसतना एक वेगळो अणभव म्हज्या किरवटीक बांदून उरलो.
सगळ्यांत उमेदीची गजाल म्हणल्यार आमच्या बरोबर आशिल्ले नकुळ सर जांकां सवण्या विशीं अदीक ज्ञान आसा आनी तांचे फोटो काडप हें तांचें आवडीचें काम. पक्षी अभयारण्यांत सुरवातेक आमकां सदांच दिसपी- उडपी सवंकळीचे पक्षी दिसले. पूण जशीं मुखार भितरलें वटेन बॅक वाॅटरांत गेली तशीं घे म्हूण तरा-तराचीं सुकणीं पळोवपाक मेळ्ळीं. धावस्कार आमकां दिसता त्या सवण्या विशीं अदीक म्हायती दीत रावलें. तांकां थळावे भाशेंत कितें म्हणटात हें पासून सांगलें. कांयच आवाज करिनासतना आमी तांकां नियाळीत रावलीं. जण एक सवणें आपले धुंदीत आशिल्लें. तांकां पळोवन जिवाक बरें दिसलें.
मुजरत म्हाका नोंद करुं कशें दिसता तें व्हायट बेलीड सी इगल ह्या सुकण्याची. हें सुकणें हांव पयलेंच फावट पळयतालें. जशें ताचें नांव तसो ताचो रंग आशिल्लो. एका व्हड झाडाच्या खांदेर तें ओग्गी बशिल्लें.ताका पळोवन म्हाका कांयच समजना जालें, तें कोणाची वाट पळयतालें कांय, कोणाक नियाळपाचें काम करी वा तें विचार करतालें कांय अशें साबार प्रस्न म्हाका पडले. आमी सुमार 20 ते 25 मिनटां ओग्गी ताका बारीक नदरेंत पळयत रावलीं. तें सुकणें कशेंच हालना. धावस्कार सराक ताचो उडटा आसताना फोटो काडूंक जाय आशिल्लो, कित्याक तर हें सवणें सादेपणी कोणाक दिसना. आमी तशीच ताची वाट पळयत रावलीं. इतल्यांत झूप करून तें उडलें आनी आपल्या फाटल्यान आशिल्ल्या घोंटेरा कडेन वचून कांय वेळ रावलें, मदींच उडलें आदी. अशें आसतना लेगीत आमी ताचे फोटे काडलें आनी कसलोच सुकण्याक त्रास करीनासतना थंयसून भायर सरली. येता आसतना म्हाका अशें दिसलें घडये तें आपल्या घोंटेराची राखण करी काय?
आनीक कांय सुकण्यांच्यो देखी दिल्यो जाल्यार तांतूत आसा ती- पानथळो, कावळे, बगळे, व्हायट बेलीड सी इगल, ब्राह्मणी कायट, रिग्रेट्स सुकणें तें बी ल्हान आनी व्हड, कोरमोरोण्टस, व्हायट थ्रोटेड किंगफिशर, कोमोन किंगफिशर, ब्लॅक हेडेड आयबिस आदी. हीं सगळीं नांवां पयलें फावट म्हज्या कानार पडिल्ली. तांचे विशीं जाणून घेवपाक एक वेगळीच खोशी तोंडार फुल्ली. सरान स्पेशल कॅमेरा हाडिल्ले. तांतूत तांचे बरें फोटे काडलें. मुखार मागीर आमी वाशी जुव्यार, नार्वें आनी लागसारूच बोटींत भोंवली.
अजापाची गजाल म्हणल्यार आमकां दोन मानगीं दिसलीं. एक व्हड आनी दुसरें ल्हान. पयलेंच फावट इतल्या लागसार सावन हांवें तांकां पळयल्ली. तांकां पळोवन हांव सामकें तटास जालें. मनाक खूब अजाप दिसलें. असलो देखावो आनी ही वेगळ्या तरेची सुकणीं पळोवन काळीज उपाट खोशयेन भरलें. मांडवी न्हंयेंत अशे तरेची सफारी करपाक मेळटली म्हूण चितूंक नाशिल्लें. एका वेगळ्याच जगान हांव शेणिल्लें. उदकांतली ती उडटी नुस्तीं पळोवन, उदकांत मदीं आसतना सवण्यांक पळोवप, एक वेगळोच आनंद यादींत घट्ट बांदून उरलो.
अशें आसून लेगीत मनाक खटकली तीं मनशाची वायट वृती. सगळो सैम जरी आपल्या मोगान- रुपान पिशें करपी आसलो तरी सफारी करतना मांडवी न्हंयच्या उदकांत राकेसा वरी ताच्या तालार नाचपी प्लास्टीक पळोवन मनाक खूब वायट दिसलें. ह्या सोबीत- सुंदर सैमात कांदळीच्या खाची कोनशांत प्लास्टीकाच्यो पोतयो हुमकळटाल्यो, तर कांय कडेन लोकांचे पिंजके कपडे झाडांक वेंग मारून आशिल्ले, तर वता थंय बाटल्यो उदकांत उडक्यो मारताल्यो…. हें दृश्य पळोवन मनाक चिमटें- धुमकें पडलें.
इतल्या गोड पर्यावरणांत हें सगळें घडटा तें पळोवन आमीच आमच्याच वायट कर्मानी सैमाक पांया पोंदा चिड्डीतात व्हय असो प्रस्न म्हाका पडलो. आमी विचार करपाची गरज आसा, आमच्या सैमाक निवळ- नितळ दवरपाची जापसालदारकी एकल्याची नासून सगळ्यांची आसा. देखून आमच्या सैम विद्यापीठाक राखपाचो आनी सांबाळपाचो भार आमच्या खांदार आसा हें आमी विसरचें न्हय.
प्राजक्ता प्रेमानंद गांवकार
9552018689
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
