भांगरभूंय | प्रतिनिधी
– बाबूश, उत्पल सयत सगल्यांकूच मुख्यमंत्र्यांनी शिटकायले
पणजीः आदले मुख्यमंत्री स. मनोहर पर्रीकार देशाचे व्हड फुडारी आशिल्ले. ते खातीर राजकारण्यांनी स्वताच्या राजकारणा खातीर तांच्या नांवाचो वापर करचो न्हय, अशें म्हणून मुख्यमंत्री डॉ. प्रमोद सावंत हांणी शेनवारा मंत्री बाबूश मोंसेरात, उत्पल पर्रीकार हांचे सयत पर्रिकारांच्या नांवाचेर राजकारण करपी सगल्यांकूच शिटकायले.
मनोहर परीकार हे फक्त गोंयचेच न्हय, जाल्यार देशाचे व्हड फुडारी आसात. पणजी सयत गोंय आनी देशाचे उदरगतींत तांचें व्हड योगदान आसा. ते देशाचे संरक्षणमंत्रीय आशिल्ले. ते खातीर फुडाऱ्यांनी तांच्या नांवाचो स्वताच्या राजकारणा खातीर वापर करचो न्हय, अशेंय मुख्यमंत्र्यांनी म्हणलें.
पणजी स्मार्ट सिटीच्या कामा वयल्यान फाटल्या कांय दिसांत बाबूश आनी उत्पल हांचे मदीं वाद चलिल्लो. स्मार्ट सिटीचीं कामां सावकाश सुरू आशिल्ल्यान कामांचो थळाव्यांक त्रास जावपाक लागला. तशेंच नव्या वर्साच्या पयल्याच दिसा फातोडेर स्मार्ट सिटिच्या कामां खातीर खणिल्ल्या फोंडकुलांत दुचाकी पडून अपघातांत एका तरणाट्याक मरण आयले उपरांत स. मनोहर पर्रीकार हांचो पूत उत्पल पर्रीकार हांणी थेट पणजीचे आमदार बाबूश मोंसेरात हांचेर टिका केली. पणजीच्या दुर्दशेक भ्रश्ट आनी अकार्यक्षम नेतृत्व जापसालदार अाशिल्ल्याचो आरोप तांणी केलो, तशेंच पणजेकारांक जेन्ना संद मेळटली तेन्ना पणजीचे नेतृत्व बदलचें, असो उलो तांणी केलो. तशेंच स्मार्ट सिटिचे मुख्य कार्यकारी अधिकारी संजीत रॉड्रिग्स हांची भेट घेवन कामाच्या सुरक्षा ऑडिटाची मागणीय तांणी केल्ली.
उत्पल पर्रीकार हांणी केल्ल्या आरोपांक जाप दिसतना मंत्री बाबूश मोंसेरात हांणी उत्पल पर्रीकार हांचे सयत मनाेहर पर्रीकार हांचेरूय टिका केल्ली. 25 वर्सां पणजेचो आमदार ह्या नात्यान पर्रीकार हांणी जी कामां करूंक नात, ताचीं फळां आतां पणजेकारांक भोगचीं पडटात. अणभवी अभियंते आसतनाय फुटपाथ बांदप्यांक तांणी सल्लागार केले. त्या सल्लागारांनी कोट्यांनी रुपया खाल्ले, अशें म्हणून पर्रीकार पणजेंतल्यान स्वताच्या नांवार जिखून येताले. पणजेतल्यान वेंचून आयिल्लो आपूण पयलो भाजप आमदार आशिल्ल्याचो दावोय तांणी केल्लो.
मजगतीं, पर्रीकारांचेर आरोप करप्यांनी तांचें थोडें तरी गूण घेवचें. पर्रीकार आधुनीक गोंयचे शिल्पकार आसात. पर्रीकारांनी सदांच लोकां खातीर त्यागाची भावना दाखयिल्ली, अशें म्हणून फक्त भाजप म्हणयारे गिरीराज पै वेर्णेकार हांणी बाबूश मोंसेरात हांचेर टिका केल्ली. मुख्यमंत्री, प्रदेशाध्यक्षा सयत हेर एकाय वरिश्ठ फुडारी ताचेर कितेंच उलोवंक नाशिल्ले. ताका लागून भाजप कार्यकर्त्यां मदीं निरशेवणी पातळिल्ली. ते उपरांत आतां मुख्यमंत्री डॉ. सावंत आनी राज्यसभा खासदार तशेंच भाजप प्रदेशाध्यक्ष सदानंद शेट तानावडे ह्या दोगांयनीय पर्रीकारांच्या नांवाचेर राजकारण करप्यांक शिटकायल्या.
बाबूश हांचीं विधानां वैयक्तीकः तानावडे
1. स. मनोहर पर्रीकार भाजपाचे न्हय जाल्यार देशाचे व्हड फुडारी आशिल्ले. गोंयांत भाजप वाडोवपांत, मुख्यमंत्री म्हूण गोंयची आनी संरक्षणमंत्री म्हूण देशाचें उदरगतींत तांचें व्हड योगदान आसा.
2. गोंयांतल्या व्हड उदरगतीच्या प्रकल्पांची बुन्याद पर्रीकार हांणीच घातल्या. केंद्रांत संरक्षणमंत्री म्हूण तांणी उत्कृश्ठ काम केलां.
3. मनोहर पर्रीकार हे फक्त कुटुंबाचेय फुडारी न्हय, जाल्यार देशाचे फुडारी जाल्यात. ते आमचे आदर्श आसात. ते खातीर हाचे मुखार तांचे विशीं कोणीच चुकीचीं विधानां करचीं न्हय.
4. मंत्री बाबूश मोंसेरात हांणी पर्रीकार हांचे विशीं केल्लीं विधानां तांची वैयक्तीक आसात. ताचो पक्षा कडेन कसलोच संबंद ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
