जेश्ठ गायिका प्रभा अत्रे संवसाराक अंतरली
भांगरभूंय | प्रतिनिधी
पुणे, खबरां संस्था ः किराणा घराण्याची जेश्ठ शास्त्रीय गायिका, लेखिका, संगीतकार प्रभा अत्रे (९२, पुणें) संवसाराक अंतरली. काळजाच्या आताकान तांकां मरण आयलें. तांकां पद्मश्री, पद्मभूषण आनी पद्मविभूषण अशें तिनूय पुरस्कार फावो जाल्ल्यात.
प्रभा अत्रे एक प्रतिभावंत गायिका, संगीत रचनाकार, लेखिका, प्राध्यापिका आनी कलाकार म्हणून यादींत उरतली. ‘ख्याल’ गायना वांगडाच ‘ठुमरी’, ‘दादरा’, ‘गझल’, ‘उपशास्त्रीय संगीत’, ‘नाट्य संगीत’, ‘भजन’ आनी ‘भावसंगीत’ हांचेरुय तांणी प्रभुत्व मेळयलें. भारतीय शास्त्रीय संगीताचो संवसारभर प्रसार करपाक प्रभा अत्रे हांचो व्हड वांटो आसा. मारू बिहाग रागांतली ‘जागू मैं सारी रैना’, कलावती रागांतली ‘तन मन धन’, किरवाणी रागांतली ‘नंद नंदन’ अशीं कांय रचनां आयज लेगीत मोगींच्या कानांत घुमता.
भारतीय शास्त्रीय संगीताच्या विशयाचेर डॉ. प्रभा अत्रे हाणी खोलायेन अभ्यास केल्लो. ताणें परदेशांतल्या जायत्या विद्यापिठांनी भारतीय शास्त्रीय संगीत शिकयलें. तांणी विज्ञान विशयांत पदवी मेळयली. उपरांत ताणी संगीताचो अभ्यास करपाचें थारायलें. पिरायेच्या आठव्या वर्सा सावन तांच्या जिवितांत गायन आयलें. आवय इंदिरा अत्रे हांच्या गीतांतल्यान तिका प्रेरणा मेळ्ळी. पंडित सुरेश माने आनी हिराबाई बडोदेकर हांची ती शिश्य आशिल्ली.
प्रभाताईन ‘अपूर्व कल्याण’, ‘मधुरकां’, ‘पटदीप’ – ‘मल्हार’, ‘तिलंग’ – ‘भैरव, भीमकाली’, ‘रवी भैरव’ अश्या नव्या रागांची रचना केल्या. ल्हान पिरायेचेर तांणी ‘संगीत शारदा’, ‘संगीत विद्याहरण’, ‘संगीत संशयकल्लोळ’, ‘संगीत मृच्छकटिक’, ‘बिरज बहू’, ‘लिलाव’ ह्या संगीत नाटकांनी मुखेल भुमिका केल्यो. 1955 सावन ती गायन कार्यावळी सादर करताली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
