भांगरभूंय | प्रतिनिधी
नवी दिल्लीः बिल्कीस बानो सामुहीक बलात्कार प्रकरणांतल्या 11 आरोपींची ख्यास्त माफ करपाचो निर्णय गुजरात सरकारान घेतिल्लो. ह्या निर्णयाक देशभरांतल्यान खर विरोध जातालो. ह्या निर्णया आड बिल्कीस बानो हांणी थेट सर्वोच्च न्यायालयांत धांव घेतिल्ली. अखेर तांकां न्याय मेळ्ळा. गुजरात सरकारन ह्या आरोपींची ख्यास्त माफ करपाचो घेतिल्लो निर्णय सर्वोच्च न्यायालयान रद्द थारायला. ताका लागून गुजरात सरकाराक हो एक व्हड धपको आसा.
कितें आसा बिल्कीस बानो प्रकरण?
2002 त गुजरात दंगली मजगतीं, बिल्कीस बानो हिचेर 11 आरोपींनी सामुहीक बलात्कार केल्लो. तशेंच तिच्या कुटुंबांतल्या 7 जाणांची निर्घृण हत्या केल्ली. बलात्कार प्रकरणांत ह्या 11 आरोपींक जल्मठेपेची ख्यास्त जाल्ली. पूण पोरूं हातूंतल्या कांय आरोपींची उरिल्लीं ख्यास्त माफ करून तांची बंदखणींतल्यान सुटका करपाचो निर्णय गुजरात सरकारान घेतिल्लो. ह्या निर्णया आड बिल्कीस बानो हांणी सर्वोच्च न्यायालयांत धांव घेतिल्ली. न्यायालयान सगल्या 11य आरोपींची ख्यास्त करपाचो निर्णय रद्द थारायला.
आतां गुन्यांवकारांचे कितें जातले?
ख्यास्त उणी करपाच्या निर्णयाक लागून 11 आरोपी बंदखणींतल्यान सुटिल्ले. आतां तो निर्णयूच सर्वाच्च न्यायालयान रद्द थारायिल्लान ह्या आरोपींक परतून अटक करतले? हे विशींय न्यायालयान निर्देश दिल्यात. गुन्यांवकारांक परतून ख्यास्त माफी खातीर यत्न करपाचे आसल्यार ते खातीर तांणी ख्यास्त भोवपाक बंदखणींत वचप गरजेंचें, अशें न्यायालयान नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
