भांगरभूंय | प्रतिनिधी
देशांतल्या बऱ्याच राज्यांनी सगलेच पक्ष ‘रेवड्यो’ वाटपाक लागल्या…. आनी कोणूय ताका नांवां दवरूं, त्यो गरीब- गिरेस्त सगल्यांकूच घोस्ताक वचपाक लागल्यात. ह्या रेवड्यांचो आयज व्हडलो रुख जाला आनी ताचीं फळां आपणाक मेळचीं म्हूण मतदारां मदीं सर्त लागिल्ली पळोवंक मेळटा. अर्थांत रेवड्यो दिवप्यांचीय अपेक्षा आसता. मतदाराच्या फुडल्या बोल्सांत घालप आनी फाटल्या बोल्सांतल्यान रेवडेचे कांय कुडके नकळटां काडप, असलो हो प्रकार. मात, रेवड्यांची संवय जाल्ल्यान म्हारगाय मात पसून वाडल्यार मतदार अस्वस्थ जातात. तरीय सरकारां सरकारी सेवा, सुविधांचें मोल वाडयतात. रेवडी चोखपी मतदार म्हारगायेच्या उज्यांत हुलपत आसतात, तेन्नाच मोल वाडोवप म्हणल्यार तांचेर खतखतीत तेलाचे चार थेंबे शिंवरपा सारके जालें ना? अर्थांत ही दरवाड गरिबांक चड बाधता. गोंयां सारक्या
राज्यांत तर चडूच. कारण गोंय हें मुळांतूच सगल्यांत म्हारग राज्य!!
गोंय सरकार फुडल्या 1 एप्रीला सावन लायटीचें मोल वाडोवपाचें आसा. 0- 100 युनिटांक 1.75 वयल्यान 1.88 रु., 101- 200
युनिटांक 2.6 वयल्यान 2.79 रु, 201- 300 युनिटांक 3.3 वयल्यान 3.7 रु. ताचे वयर साडेचार वयल्यान स रुपया मेरेन वाड आसतली. वेवसायीक, उद्देगीक, हाॅटेलां आनी कृशी वापरा खातीर वापरतात तीय लायट वाडटली. वीज ग्राहकांचें मत आयकुपाक आयज सोमारा पणजी आनी फाल्यां मंगळारा मडगांवां सुनावणी जातली. पुराय देशांत गोंयचे लायटीचें बील सवाय, अशें जायते जाण सांगतात. मात, सुखवस्तू गोंयकारांक तें चड लागता, थंय हातार पोट आशिल्ल्यांक कितें दिसता आसतलें? देखूनच थळाव्या लोकप्रतिनिधींच्या दाराचे हुंबरे लोक झरयत आसतात. आतां सुनावणे उपरांत सरकार विजेचे दर आसा तेच दवरता काय थारायिल्ले प्रमाण वाडयता तें पळोवपाचें! प्रस्तावीत दरवाडींतल्यान सरकाराक 85 कोटीं परस चड येणावळ मेळटली. जोड वीज नियामक आयोगाची परवानगी मेळोवपाक पयलीं सुनावणी घेवची पडटा. लोकांच्या हरकती घेवच्यो पडटात. लोकांनी त्यो लेखी दिल्यात. आतां ही सुनावणी.
विजेचें मोल वाडलें, तरी ती अखंड मेळपाक जाय. कांय शारां सोडल्यार हेर सगले कडेन लायटीचो आपालिपा आसता, अशें लोक सांगतात. एकदां लायट केली काय शारां, उपनगरांनी वर- दोन वरांनी येता, पूण गांव 10- 12 वरां काळखांत उरतात. तातूंत कसलेंय सैमिक संकश्ट आयलें जाल्यार दीस- दोन दीस लायट गायब आसता. गोंयांत अजून भार नियमन, म्हणल्यार सप्तकांतल्यान थारावीक वरां वीजपुरवण बंद दवरीनात. गोंयांत पावसाचो गडगड, वारो आयल्यार लायट बंद दवरतात. दुरुस्तीच्या नांवा खाला सद्दां खंय ना खंय सकाळीं 9 वरां सावन दनपरां 2 मेरेन लायट गायब आसता. भारतांतल्या कांय गांवांनी अजून लायट पावंक ना, आमकां लायट जाय तितली मेळटा मरे, अशें कांयजाण विचारतात. गजाल खरी, पूण दोन वरां पसुन लायट गेल्यार आयज मनीस अपंगुळ जाता. कारण फोन, संगणक, टीव्ही, फॅन, मिक्सर, गिझर…. सगलेंच लायटीचेर आदारून! म्हणटकच वीज 24 वरां जायच. उद्देगांनी तर खरें म्हणल्यार वीज वचपाकूच जायना.
गोंय हें पर्यटन राज्य जाल्ल्यान आमकां हेरां परस चड लायट लागता. तातूंत आमी सगली लायट शेजराच्या राज्यांतल्यान घेतात. ती हाडपी वीज यंत्रणां पोरणीं आसा. देखून ती बदलपाची गरज आसा. तमनार तें काम करता. पूण तांकां कांय जाण विरोध करतात. कितेंय जालें तरी यंत्रणा बदलूंक जाय कारण फाल्यां चड लायट लागली जाल्यार ती हाडपाक मेळूंक जाय. आतांय हाडूं येता, पूण ओव्हरलोड जावन खंय खट, खूट जायत जाल्यार उणेच चार दीस काळखांत रावचें पडटलें. तौकते मोडा वेळार आमी हो अणभव घेतलाच! हाचे मुखार विजे बगर पर्याय ना. तरीय लोकांक सवाय भितर लायट मेळप हो तांचो हक्क. सरकारान सौर उर्जेचेरुय भर दिवपाची गरज आसा. ते खातीर अनुदान, सवलत दितात, तरीय तळागाळांत ताचो प्रसार जावंक ना. सरकारी कार्यालयां, शिक्षणीक संस्थांनी सौर उर्जेचो वापर करूं येता. सरकारी संस्था वतीन इन्व्हर्टर दिवं येतात. वीज यंत्रणांय पांवड्या पांवड्यान बदलूंक जाय. भुंयगत वीज पुरवण बेगीन सुरू जावंक जाय.
वीज खात्यान दरवाडीचें मनार घेतलांच, तशेंच पुरवण अखंड जातली, ती बंद जाल्यार वरा भितर येतली, हाचेरुय लक्ष दिवचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
