भांगरभूंय | प्रतिनिधी
मुख्यमंत्रीः कांय दावेदारांक लागून प्रक्रियेक आडखळ
भांगरभूंय । प्रतिनिधी
पणजीः रान हक्कां खातीर चडांत चड दावे 31 मार्च मेरेन निकालांत काडपाचे यत्न सरकारा कडल्यान सुरू आसात. ते खातीर 26 जानेवारीक विशेश ग्रामसभांचेंय आयोजन केलां, अशें मुख्यमंत्री डॉ. प्रमोद सावंत हांणी शुक्रारा पत्रकारां कडेन उलयतना स्पश्ट केलें. सुवात पडताळणे वेळार दावे केल्ल्यां मदले खूबशे जाण हाजीर रावनात. ताका लागून हे प्रक्रियेक गती मेळना, अशेंय तांणी नमूद केलें.
रान हक्क दाव्यां संबंदांत शुक्रारा घेतिल्ले बसके उपरांत ते पत्रकारां कडेन उलयताले. रान हक्कां खातीर आतां मेरेन गोंयभरांतल्यान 10,136 जाणांचे अर्ज दाखल जाल्यात. तातूंतल्या 6,543 प्रकरणांनी सुवातांची पडताळणी जाल्या. 2,993 अर्ज ग्रामसभेंत गेल्यात, 1,777 अर्जांक मंजुरी मेळ्ळ्या. रान हक्कां खातीर आयिल्ल्या दाव्यांक ग्रामसभेंत मंजुरी मेळ्ळे उपरांत ते उपजिल्होधिकारी, जिल्होधिकारी पांवड्याचेर वतात. थंयचे मंजुरी उपरांत संबंदितांक सनद दितात. कांय जाणांचे अर्ज ग्रामसभे मेरेन गेल्यात, पूण तांणी गरजेचीं कागदपत्रां दिवंक नाशिल्ल्यान तांच्या अर्जां वयली प्रक्रिया आडावल्या. तेच प्रमाण अर्ज केल्ल्यां मदले खूबशे जाण सुवात पडताळणे वेळार हाजीर रावनात. ताका लागून फुडली प्रक्रिया गतीन जायना, अशें मुख्यमंत्री डॉ. सावंत हांणी सांगलें. रान हक्कां खातीर दाखल जाल्ल्या चडांत चड अर्जांत 31 मार्च मेरेन मंजुरी दिवपाचो निश्चेव सरकारान केला. ते खातिरूच ज्या वाठारांतल्यान रान हक्कां खातीर अर्ज आयल्यात, त्या वाठारांतल्या पंचायतींक हे संबंदांत 26 जानेवारीक विशेश ग्रामसभा आपोवपाचे निर्देश जारी केल्यात. ताका लागून दावे केल्ल्यांनी ग्रामसभांक हाजीर रावून आपले कडेन आशिल्लीं सगळीं कागदपत्रां पंचायतींक दिवची आनी सरकाराक आदार करचो. सरकार पुराय तरेन दावेदारांच्या फाटल्यान उबें आसा. हो प्रस्न न्यायालयांत आशिल्ल्यान दावे केल्ले जे ग्रामसभांक हाजीर रावचे नात, तांकां जमनीचे अधिकार मेळचे नात. ते उपरांत तांणी सरकाराक दोश दिवचो न्हय, अशें मुख्यमंत्र्यान सांगलें.
जमनी संबंदांतले प्रस्न निकालांत काडपाचेर भर
गोंयांतल्या जमनी संबंदांतले खूबशे प्रस्न फाटल्या कांय वर्सां सावन आडखळ्ळ्यात. तातूंतले मुंडकारांचे जमनी विशींचे खटले बेगिनात बेगीन निकालांत काडपाची प्रक्रिया सरकारान सुरू केल्या. कुळांचेय प्रस्न फुडल्या कांय म्हयन्यां भितर सोंपयतले, अशी हमी मुख्यमंत्री डॉ. प्रमोद सावंत हांणी दिल्या. ते उपरांत आतां तांणी खूब वर्सां सावन उरिल्ले आदिवासींचे रान हक्क दावे निकालांत काडपाक प्राधान्य दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
