भांगरभूंय | प्रतिनिधी
मडगांवः देशांतलें पीएम विश्वकर्मा प्रशिक्षण केंद्र पयलें गोंयांत सुरू जाल्लें. नोंदणी मळार आमी देशांत दुसरे सुवातेर आसले तरी प्रशिक्षण केंद्र स्थापन करपाक गोंय पयल्या क्रमांकाचेर आसा. 18 फांट्यां वरवीं कुशळटाय उदरगतीचें प्रशिक्षण दितले. कांय जाणांक फक्त 18 जाती दिसतात. राज्य सरकारान 32 उद्देगां कडेन कबलात केल्या. आतां फुडाराक पदवी घेतली म्हूण उपकारची ना. उण्यांत उणो एक वर्स काम करपाचो अणभव वा अप्रेंटिसशीप आसप गरजेचें आसतलें, अशें मुख्यमंत्री डॉ. प्रमोद सावंत हांणी सांगलें.
आतां मेरेन खंयच्याच सरकारान काम करपी हाताक मान दिवंक ना. हो मान आतां डबल इंजीन भाजपा सरकार करता. धा हजार तरणाट्यांक रोजगार दिवपाचो संकल्प केलो आनी सुमार 9 हजार तरणाट्यांक नोकऱ्यो दिल्यो. सरकार अंत्योदय तत्वाचेर काम करता, अशेंय मुख्यमंत्री डॉ. सावंत हांणी म्हणलें.
कामगारांची नोंदणी करून तांकां वळखपत्रां दिल्यांत. ते उपरांत कारागिरांक रीण दिवपाची वेवस्था केली. रीण घेतना सख्खो भाव लेगीत जामीन म्हणून सय करिना, त्या वेळार फक्त ‘मोदी की गॅरंटी’ चलता आनी विनातारण रीण मेळटा. नारीशक्ती, युवाशक्ती, किसानशक्ती आनी गरीब कल्याण ह्या चार तत्वांचेर सरकार वावुरता. हर घर जल, दरेक घरांक संडास, हर घर फायबर दिवन दरेका घराक कुशळटाय दिवपाचो राज्य सरकार यत्न करता, अशें मुख्यमंत्र्यान सांगलें. हे कार्यावळी वेळार गुरू सन्मानाखाला वेगवेगळ्या मळा वयल्या कारागिरांचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
