फेक न्यूज, बँकिंग फ्रॉडांत हीं राज्यां नंबर वन
भांगरभूंय | प्रतिनिधी
गृह मंत्रालयाची म्हायती
नवी दिल्ली, खबरां संस्था ः फाटल्या कांय वर्सांत देशभरांत सायबर गुन्यांव ही एक मुखेल समस्या जाला. सायबर गुन्यांवांत ऑनलायन बँकिंग, एटीएम, डेबिट कार्ड, क्रेडीट कार्ड, बनावट प्रोफायल, सायबर स्टॅकिंग आनी ब्लॅकमेलिंग सारकिल्ल्या गुन्यांवांचो आस्पाव जाता. गृह मंत्रालयान राष्ट्रीय सायबर गुन्यांव अहवाल पोर्टल आनी डेटा पोर्टल आनी एनसीआरबी वरवीं देशांतल्या वेगवेगळ्या राज्यांतल्या वेगवेगळ्या प्रकारच्या सायबर गुन्यांवांचेर अहवाल तयार केला.
अहवाला प्रमाण तेलंगण, महाराष्ट्र, बिहार आनी उत्तर प्रदेश ह्या 4 राज्यांक देशांतले सायबर गुन्यांवाचे हॉट स्पॉट अशें म्हणूं येता. सायबर गुन्यांवांच्या वेगवेगळ्या प्रकारांत तेलंगणात दरेकी प्रकारच्या सायबर गुन्यांवांचे प्रमाण चड आसा अशें अहवालांतल्यान स्पश्ट जालां.
फेक न्यूजांत महाराष्ट्र, तेलंगण, मध्य प्रदेश मुखार
अहवाला प्रमाण देशभरांत सोशल मिडियाचेर फेक न्यूज पातळावपाचो गुन्यांव 6 राज्यांनी चड आसा. हांतूत महाराष्ट्र, मध्य प्रदेश, तेलंगना, तमिळनाडू आनी आंध्र प्रदेशांत सगळ्यांत चड आसा. 2022 वर्सा फेक न्यूजचे 230 केशी दाखल जाल्यो. तातूंतले 81 गुन्यांव तेलंगणात आनी 37 तमिळनाडूंत जाले.
एटीएम फटवणूक – बिहारांत 638 प्रकरणा
2022 वर्सा देशभरांत एटीएम फटवणूक करपाच्यो 1690 केशी आयल्यो. हे बाबतींत बिहार मुखार आसा. बिहारांत 638 एटीएम फटवणूक केशी नोंद जाल्यात. ताचे उपरांत तेलंगना (624) आनी महाराष्ट्र (144) आसा.
बनावट प्रोफायल महाराष्ट्र नंबर वन
सोशल मिडियाचेर फेक प्रोफायल तयार करून फटवणूक करपाचे सगळ्यांत चड प्रकरण महाराष्ट्र आनी राजस्थानांत जाल्यांत. ह्या गुन्यांवांत वट्ट 157 केशी नोंद जाल्यात. तांतूतल्यान महाराष्ट्रांत 48 जाल्यार राजस्थानांत 33 प्रकरणा आसा.
ओटीपी फ्रॉड केशी – तेलंगाना 2179, ओडिशा 201, महाराष्ट्र 195, दिल्ली 91, आंध्र प्रदेश 61, मध्य प्रदेश 43, उत्तर प्रदेश 34, उत्तराखंड 27, तमिळनाडू 19 आनी राजस्थान 18.
बँकिंग फ्रॉड – तेलंगाना 3223, महाराष्ट्र 909, आंध्र प्रदेश 569, यूपी 483, ओडिशा 434, बिहार 168, राजस्थान 109, मध्य प्रदेश 99, झारखंड 88 आनी दिल्ली 72.
सायबर ब्लॅमेलिंग – तेलंगाना 234, महाराष्ट्र 95, आसाम 70, राजस्थान 51, उत्तर प्रदेश 37, गुजरात 30, प. बंगाल 23, हरियाणा 21, मध्य प्रदेश 16 आनी पंजाब 15.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
