भांगरभूंय | प्रतिनिधी
-दामोदर कोचकारः उद्देजकांचे बसकेंत नव्या उद्देगीक धोरणाचेर चर्चा
पणजीः गोंयांतले तरणाटे सुटी घेतात पूण जेन्ना काम आसता तेन्ना सदांच तेच पयलीं कामाचेर येतात. ते खातीर गोंय उद्देगीक संघटणेचे कार्यकारी वांगडी दामोदर कोचकार हांणी नोकऱ्यांनी गोंयकारांक प्राधान्य दिवचें अशें मत उक्तायलें.
मंगळारा मुख्यमंत्री डॉ. प्रमोद सावंत हांणी उद्देजकांक घेवन नव्या उद्देगीक धोरणाचेर चर्चा केली. ह्या वेळार मंत्री माॅवीन गुदिन्हो, आयडीसीचे अध्यक्ष आमदार आलेक्स रेजिनाल्ड हाजीर आशिल्ले.
उद्देगीक मळार राज्य सरकार गरजेची मजत दिता अशें कोचकार हांणी सांगलें. आतां गोंयच्या तरणाट्यांक नोकरी दिवप उद्देजकांची नैतीक जापसालदारकी. हाचे पयलीं वेर्णाच्या फार्मा कंपनीत कारवार वा महाराष्ट्रांतल्या लोकांक कामाक घेताले. हांगा गोंयच्या तरणाट्यांक घेवपाचें प्रमाण उणें आसलें. पूण उपरांत कंपनींक कळ्ळें की गोंया भायले तरणाटे सातत्यान संप करतात. हाचे उपरांत आतां ते गोंयच्या तरणाट्यांक संद दितात. कारण तांकां खबर आसा गोंयचे तरणाटे संप करिनात तशेंच कामगार संघटनाय करिनात. कंपनीच्या फायद्या खातीर गोंयच्या तरणाट्यांक संद दिवप गरजेचें. तशेंच चडांत चड गोंयच्या तरणाट्यांक रोजगार दिवचो अशें आमी संस्थे वतीन तांकां सांगलां. थळाव्या उद्देजकांनीय हें समजून घेवचें.
नव्या उद्देगीक नेमांक लागून उद्देजकांक जायत्यो गजाली सोंप्यो जाल्यात अशें तांणी सांगलें. आतां जायत्यो गजाली ऑनलायन उपलब्ध आसात. उद्देगा खातीर गरजेचे वेगवेगळे परवाने मेळोवप सोंपें जालां. प्रशासन वा आयडीसीच्या अधिकाऱ्यांचो हस्तक्षेप उणो जाल्ल्यान ही प्रक्रिया पारदर्शक जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
