भांगरभूंय | प्रतिनिधी
-समाजकल्याण खात्या कडल्यान अधिसुचोवणी जारी
पणजी: गोंयांतल्या धनगर समाजाची वळख आतां ‘गवळी धनगर’ अशी जाल्या. धनगर समाजाक ‘गवळी धनगर’ म्हूण अधिसुचीत केल्ल्याची अधिसुचोवणी समाजकल्याण खात्याचे संचालक अजीत पंचवाडकर हांणी जारी केल्ल्यान ह्या समाजाक अनुसुचीत जमातीचो (एसटी) दर्जा मेळपाचो मार्ग मेकळो जाला.
धनगर समाजाक केंद्रा कडल्यान एसटी दर्जा मेळोवपाक पयलीं सरकारी राजपत्रांत धनगर समाजाक हेर मागासवर्गीयांत (ओबीसी) गवळी धनगर म्हूण अधिसुचीत करचे पडटाले. ते खातीरची फायल समाजकल्याण खात्यान कांय म्हयन्यां पयलीं ओबीसी आयोगाक सादर केल्ली. आयोगान धनगर समाजाच्या संघटणांच्याे सुनावण्यो घेवन प्रस्ताव धाडले उपरांत समाजकल्याण खात्याचे संचालक पंचवाडकर हांणी धनगर समाजाक ‘गवळी धनगर’ म्हूण अधिसुचीत केल्ल्याची अधिसुचोवणी जारी केल्या.
गोंयांतल्या धनगर समाजाक एसटीचो दर्जो मेळचो हे खातीर राज्य सरकारा कडल्यान जायत्या वर्सां पसून यत्न सुरू आसात. हे विशीं केंद्र सरकाराकूय जायते खेपे प्रस्ताव धाडिल्लो. केंद्राच्या सुचोवणे प्रमाण तातूंत गरजेचें बदल केल्यात. राज्यांतल्या धनगर समाजाक सध्या ओबीसी गटांत सुवात दिल्या. पूण, गोंयांत हो समाज मूळ गवळी ह्या नांवान वळखतात. ताका लागून एसटी समाजाचो दर्जो मेळोवपाचे प्रक्रियेंत ह्या समाजाक पयलीं ‘गवळी धनगर’ म्हूण ओबीसींत अधिसुचीत करचे पडटले. तशी त्रुटी केंद्र सरकारानूय गोंयच्या प्रस्तावाचेर काडिल्ली. ताका लागून सरकारान आतां ह्या समाजाक ‘गवळी धनगर’ म्हूण अधिुसचीत केलां. ह्या बदलाचो प्रस्ताव परतून केंद्र सरकारा कडेन धाडून धनगर समाजाक एसटी दर्जा मेळोवन दिवपाची प्रक्रिया सुरू करतले, अशी म्हायती सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
