भांगरभूंय | प्रतिनिधी
-आतां मेरेन 29,710 अर्ज, 7,884 अर्ज प्रलंबीत
पणजी: प्रधानमंत्री विश्वकर्मा येवजणे खातीर आतां मेरेन राज्यांतल्या सगल्याच पंचायतींतल्यान 29,710 अर्ज आयल्यात. तातूंतल्या 21,826 अर्जांक मुळाव्या पांवड्यार मान्यताय मेळ्ळ्या. जाल्यार 7,884 अर्ज प्रलंबीत आसात. येवजणे खातीर उत्तर गोंयांतल्यान 15,593 अर्ज, जाल्यार दक्षीण गोंयांतल्यान 14,117 अर्ज आयिल्ले.
देशांतल्या 18 प्रकारच्या कारागिरांक अर्थीक मजत दिवन ह्या परंपरीक कलांक परतून उर्जितावस्था दिवपाच्या हेतान केंद्र सरकरान प्रधानमंत्री विश्वकर्मा येवजण सुरू केल्या. 17 सप्टेंबराच्यान राज्यांतूय ह्या येवजणेची अंमलबजावणी केल्या. तेन्नाच्यान आतां मेरेन येवजणेच्या लाबा खातीर 29,710 अर्ज आयिल्ल्याचे स्पश्ट जाला. ह्या अर्जांक पयल्या टप्प्यांत पंचायत आनी पालिकां कडल्यान मंजुरी मेळटा. ते उपरांत ते अर्ज जिल्होधिकाऱ्यांच्या अध्यक्षते खाला समिती कडेन येवन थंय छाननी जावन अर्जांक निमाणी मंजुरी मेळटा.
येवजणे खाला राज्यांतल्या 18 प्रकारच्या वेवसायिकांक फायदो मेळटलो. परंपरीक वेवसायिकांच्या अर्जांक मंजुरी मेळ्ळे उपरांत तांकां 15 हजारांचें टूलकीट मुफत दितले. तशेंच वेवसाया खातीर सुरवातीक एक लाख आनी उपरांत दोन लाखांचें तशेंच मुफत प्रशिक्षण दितले.
मजगतीं, पीएम विश्वकर्मा येवजणे खाला आयिल्ल्या अर्जांक मंजुरी दिवपाची प्रक्रिया बेगिनांत बेगीन पुराय करून कारागिरांक प्रशिक्षण दिवपाची प्रक्रिया सुरू करची, अशी सुचोवणी मुख्यमंत्री डॉ. सावंत हांणी मंगळारा घेतिल्ले बसकेंत अधिकाऱ्यांक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
