भांगरभूंय | प्रतिनिधी
हालींच मडगांव नगरपालिकेन आपले हद्दींतलो कोयर शेजारच्या गांवांतल्या शेतांत उडयलो म्हणून बरोच बोवाळ जालो. तशें पळोवंक गेल्यार जें कितें शेतांत उडयिल्लें ताका कोयर म्हणूंक जावचो ना. आडसराचीं सोण्णां वा कट्ट्यो हाका कोयर म्हणप सारकें न्ही. खरें तर ह्यो उपयोगाच्यो गजाली. तशें माडाचें कांयच भायर पडना. वोगीच माडाक कल्पवृक्ष म्हणटात तर? माडाची दर एक गजाल उपयोगाची. पूण आमच्या सरकारान माडाक तण करून उडयलें आनी लोकांक चुडटां, शेवकां, पोंयों, सोण्णां, कट्ट्यो ह्यो गजाली कोयरश्यो दिसूंक लागल्यो. मडगांवां कांय घरां भोवतणीं माड नदरेक येतले. हे लोक करतात कितें तर माड पाडलो म्हणजे फकत नाल्ल पुंजावन व्हरतात आनी हेर सगळें म्हणल्यार चुडटां, पोंयों, शेवकां बी रस्त्या कुशीक उडयतात. आसा न्ही नगरपालिका भरून व्हरपाक. व्हरतात बाबडे ट्रक भरभरून.
एक काळ असो आसलो, कोणाच्या भाटांत एक चुडत पडटा म्हणल्यार चार जाण थंय धांव मारताले. चुडटाक लागून झगडींय जातालीं. कोण म्हणटालो आपूण पयलीं पावलां तर कोण म्हणटालो चुडत पडटनाच आपणें पळेलां. दर एकल्याक तें चुडत जाय आसतालें. पूण काळ बदल्लो आनी चुडटाचें म्हत्व उणें जालें. चुडटांच कित्याक पोंय, शेवक, कित्याकूच मोल उरलें ना. पयलीं तेंपार गांवांनी तर नाल्ल्यो, सोण्णां कोणूच भायर उडय नासले. सगळ्यांचेच हांडे आनी तोप ताचेरूच तर निंबून आसले. सगळ्यांच्यो चुली नाल्ल्यो आनी सोण्णांनींच पेट्टाल्यो.
गांवांनी नळ पावलो आनी बांयां वांगडाच हांडे सोंपले. हाता कडेन उदक मेळटकूच बांयचें उदक कोण ओडटलो? बांयो तश्योच उरल्यो आनी पाड जाल्यो. ल्हवू ल्हवू करून बांयो पुरयल्यो. भायर आशिल्लीं मान्नीं घरांत पावलीं. घरांत हांडे कशे तापोवप? धुंवरान घर भरचें ना? म्हणटकूच चुली गेल्यो आनी पयलीं हिटर आनी उपरांत गिझर आयले. शॉवर आयले आनी हांड्याची गरज उरली ना. बांयतलें उदक काडचें पडलें ना तें जालेंच आतां बालदेंतलेंय उदक काडून माथ्यार घालची गरज पडना. एक बटण दांबपाची फुरसत. सगळें कशें फुकें सवाय मेळपाचें. तातूंत गॅस आयलो आनी रांदपाच्यो चुलीय गेल्यो. फू फू करून चूल पेटोवपाची गरज उरली ना. हांगाय एकाच बटणाचें काम.
चुली बंद जाल्यो आनी चुडटां, पोयों, सोण्णां, नाल्ल्यो कोणाक नाका जाल्यो. सगळें कोयराच्या बल्लांत पडूंक लागलें. उपयोगाच्या गजालींचो कोयर करून उडयलो. पयलीं गांवांनी दर एका घराक आंगण आनी आंगणांत माटोव आसतालो. माटवाक वयर मल्लां आसतालीं. आंगणांत बसून बरें वारें घेवंक मेळटालें. आतां तीं आंगणांय ना आनी मल्लां म्हणल्यार कितें तें आयचे पिळगेक खबरूय आसचें ना. आतां वारें घरांनीच पंख्यामुळा बसून घेवपाचें. आनी तितल्यान सूख मेळणा तांणी एसींत बसपाचें. घरांतूच सगळी सोय जाता जाल्यार भायलें वारें कित्याक जाय? तातूंत प्लॉट करतना झाडां कापलीं, झाडांच ना म्हणटकूच वारें तरी कशें मेळटलें? मल्लांचें मोल गेलें. मल्लां विणपाची कलाय लोक विसरले आसतले. आतां ही कला खंयच्या तरी कलाघरांत वा सेरेंडपिटीक दिश्टी पडपाची.
मल्लां सोडाच पूण चुडट्यो मोडून लोक घरांक झड बांदताले. मातयेच्या वण्टींक वावझड बादची न्हय म्हणून झड बांदप गरजेची आसली. पूण आतां मातयेचे पारे खंय उरल्यात तर? घरांचे पारे आतां विटो, चिरे आनी शिमिटाचे जाल्यात. शिमिटाच्या घरांक झडाची गरज लागना. आनी लागलीच जाल्यार बाजारांत ताडपत्री वा प्लास्टीक मेळटा. हाडपाचें आनी बांदपाचें. चुट्ट्यो मोडपाची कटकट ना. हाकाच लागून माडाच्यो सगळ्योच गजाली कोयर जावन पडल्यात. फक्त गोंयकार जेवणाक नाल्लाची सोय वापरतात म्हणून नासल्यार नाल्लूय कोयरांत वचपाचो काय दिसता. आतां हो कोयर खंय तरी उडोवंक जाय. घर निवळ दवरूंक कोयर खंय तरी उडोवचो पडलो ना? म्हणटकूच एक तर रस्त्या कुशीक वा खंयचेय उगते सुवातेर. मागीर पंचायती वा नगरपालिकांनी काडपाचो तो कोयर. ते तरी कितें करतले. तेय आमचेवरीच हांगचें काडून थंय उडयतात. निमाणें आमची नितळसाण म्हणल्यार अशीच न्ही, एका जाग्या वयल्यान दुसर्या जाग्यार उडोवप. आनी जागो मेळ्ळो ना म्हणजे, शेजारचीं शेतां वा हायवे कुशीकचे जागे आसाच.
मनीस जेन्ना बदलूंक लागलो आनी उपयोगाच्या गजालींचो कोयर करूंक लागलो तेन्नाच एक नवो कोयर तयार जालो. प्लास्टिकाचो कोयर. हय आमी नाल्ल्यो, सोण्णां कोयर म्हणून उडोवंक लागले आनी प्लास्टिकाक वेंग मारून बसले. प्लास्टिकाचीं कपां, प्लास्टिकाच्यो दोरयो आमी आपणायल्यो आनी एक वेगळे समस्येक तोंड दिवपाची पाळी आयली. आतां ह्या प्लास्टीक कोयराचो वेगवेगळे तरेन विलो लावपी नगरपालिका आनी पंचायतींक नाल्ल्यो आनी सोण्णांचो विलो लावंक कळना हें अजाप शें दिसता. खरें तर हो कोयर म्हणल्यार जोड करपाचो विशय. आमी मात तो आवंय करून उडयला. म्हैसूर, बंगळुरू वाठारांत जायते उजवाती करपाचे कारखाने आसात. ह्या उजवातींक नाल्ल्यांचो पिठो लागता. आयटिसी सारकी कंपनी ह्या धंद्यांत आसा. ही कंपनी तर जायत्या गांवगिऱ्या वाठारांत वचून थंयच्या लोकांक हें काम दिता. ते कट्ट्यो सोदतात आनी आमी कट्ट्यो भायर उ
डयतात. आमच्यो नगरपालिका असल्या कंपनी कडेन कित्याक कबलात करिनात? कट्ट्यांचो विलोय लागतलो आनी बेकारांक काम मेळटलें.
सोण्णांचो काथो राजू, सूम, पांयपुसणीं करूंक वापरतात.
काथ्या कारखाने पयलीं गोंयांत आसले. खंय आसात थंय
सोण्णां धाडूंक जातात. लोकांक एकदां कळूंक लागतकूच लोकूय ह्यो वस्तू कोयर म्हणून भायर उडोवचे नात. नव्या वर्साक हाची सुरवात जावची.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
