एकाच दिसा ई -रुपया वरवीं 10 लाख वेव्हार
भांगरभूंय | प्रतिनिधी
नवी दिल्ली, खबरां संस्था ः लोकांचे ऑनलायन अर्थीक वेव्हार सोपें करपाक आरबीयान 1 डिसेंबर 2022 वर्सा सेंट्रल बँक करन्सी म्हळ्यार ई- रुपयाची सुरवात केली. 27 डिसेंबराक एकाच दिसा ई- रुपया वरवीं वेव्हारांचो आंकडो 10 लाख हुंपला. ही म्हायती आरबीआयचे गव्हर्नर शक्तिकांत दास हांणी दिल्या.
दास हांणी एका कर्मचाऱ्याक बरयल्ल्या पत्रांत म्हणलां, युपीआयचें येस आतां आंतरराष्ट्रीय मॉडेल जालां. ई -रुपयाच्या मळारय आमी व्हड वाड केल्या. आरबीआयन 1 डिसेंबर 2022 दिसा किरकोळ वापरप्यां खातीर सीबीडीसी किरकोळ विक्री सुरू केली.
डिजिटल ई-रुपया (e₹) म्हणल्यार कितें?
० सेंट्रल बँक डिजिटल चलन (सीबीडीसी) हका ई-रुपी अशें म्हण्टात. हें कागदी चलनाचें डिजिटल रूप आसून, तें क्रिप्टो चलना सारकेच ब्लॉक -चेन तंत्रज्ञानाचेर आदारिल्लें आसा. ताचें मोल सद्याच्या चलना इतलें आसा.
० 100, 200 वा 500 रुपयांच्या नोटीं प्रमाण ही सरकाराची कायदेशीर निविदा, जी स्विकारपाक कोणाकूच न्हयकार दिवंक मेळना. e₹ फकत मोबायल वॉलेटांत जमा करूं येता. तें दवरपाक बँक खात्याची गरज ना. हे दोन प्रकारचे आसतात – सीबीडीसी घाऊक आनी सीबीडीसी रिटेल.
० हाचे खातीर जाय आशिल्लीं डिजिटल वॉलेट आनी संबंदीत अॅप्लिकेशनां आरबीआयन कडल्यान परवानो आशिल्ल्याच वेवसायीक कमर्शियल बँकांनी जारी करतात.
० ऑनलायन पेमेंट करतना क्यूआर कोड स्कॅन करुनय ई- रुपयान वेव्हार करपाक मेळटा.
ई- रुपया 24 वरां उपलब्ध आसता. हे खातीर वापरप्यांक बँकेत वचचें पडना. पारंपरीक चलना भशेन ताका छापपाक कांयच खर्च येना. तो खूब उण्या खर्चांत जारी करूं येता. नोटी आनी नाण्यां भशेन हें चलन इबाडना. कार्डा वरवीं पेमेंट करतना अतिरिक्त शुल्क लागू जावं येता. ई- रुपयाच्या बाबतींत हें शुल्क खूब उणे आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
