भांगरभूंय | प्रतिनिधी
भांगरभूंय । प्रतिनिधी
पेडणेः पेडणे तालुक्यांतल्या दर्या वेळांनी पोरण्या वर्सा रातयां सुरू केल्ल्यो संगीत पार्ट्येो नव्या वर्सा सकाळ मेरेन सुरु आशिल्ल्यो. ताका देशी आनी विदेशी पर्यटक व्हडा संख्येन हाजीर आशिल्ले. ह्या पार्ट्यांक लागून जायते कडेन येरादारीची कोंयडी जाली. रातीं बारा उपरांत फोग पेटोवन हवेचें प्रदूशण केलें जाल्यार व्हडा आवाजान संगीत लावन आवाजा प्रदूशण लेगीत केलें. ताका आळाबंद घालपाक संबंदीत सरकारी यंत्रणा आनी पुलीस अपेशी थरलें. एकंदरीत वातावरण पार्ट्यो आयोजकांक रान मेकळें सोडलां अशेंच दिसताले.
मेळिल्ले म्हायती प्रमाण कसलेच परवानगे घेनास्तना ह्या पार्ट्यो आयोजीत केल्ल्यो. रातीं सुरू जाल्ल्या पार्ट्यो कांय कडेन नव्या वर्साच्या फातोडेर मेरेन सुरू आशिल्ल्यो. दर्या देगांनी देशी पर्यटक सोरो पियेवन लोळटना आनी कांय पर्यटक उक्ते सुवातेर सोऱो पियेतना दिसताले. रिकाम्यो बाटल्यो मेळत थंय वडयल्ल्यो दिसताल्यो. हरमला पुलीस दुचाकी घेवन विठ्ठलदास वाडो, गावडे वाडो दर्या देगेर फिरताले, दर्या देगांनी वाहन व्हरपाक बंदी आसतना पुलीस वाहनां घेवंन थंय कसे गेले अशें पेडणेच्या येरादारी पुलीस निरीक्षका विचारलें तेन्ना जे पुलीस वाहना घेवन दर्या देगेर गेल्ले तांचेर कारवाय करतले अशे ताणे सांगलें.
कांय पार्ट्यांनी दरेकी आठ हजार रुपये भरून टेबल बूक केल्लीं. पोरूचे तुळेत ह्या वर्सा मात विदेशी पर्यटकांचो आंकडो उणो जाल्लो दिसतालो. पयली कांय रिसॉर्टांनी 10 जानेवारी मेरेन रूम बूक करताले अशें लाकबाना रिसॉर्टाचो वेवस्थापक हरी म्हामल हाणे सांगलें. मोरजी, आश्वें, मांद्रे, हरमल हांगा आयोजीत केल्ल्या पार्ट्यांक. कांय कडेन पर्यटकांची गर्दी आशिल्ली. उत्तर भारतांतले तरणाटे, तरणाट्यो पार्टी खातीर खासा आयिल्ल्यो. रातयां 12 वरां उपरांत लेगीत पार्ट्यो व्हडा आवाजांत संगीत लावंन सुरू आशिल्ल्यो. मांद्रे आनी मोरजी दर्या देगे कासव संवर्धन वाठार म्हणून जाहीर केला. थंय व्हड आवाज करपाक जायना असो नेम आसा. मात ह्या दोनूय कडेन व्हडा आवाजांत संगीत लावपाक सरकारान पार्टी आयोजकां मेकळीक दिल्या अशें दिसतालें. फातोड मेरेन चलिल्ल्या ह्या पार्ट्यांनी कोट्यांनी रुपयांचो अर्थीक वेव्हार जालां अशी खबर आसा. थळाव्या पंचायतींक ह्या पार्ट्यांतल्यान कितलें महसुली उत्पन्न मेळां हें पळोवचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
