भांगरभूंय | प्रतिनिधी
भांगरभूंय । प्रतिनिधी
मडगांवः गोंयांतल्य अनुसूचीत जमाती खातीर (एसटी) राजकी आरक्षणाचें आस्वसान गोंय विधानसभेंत दिला. सभापती रमेश तवडकार हाणे ते खातीर आतां यत्न करपाक जाय. राजकी आरक्षण पदरांत पडचें म्हणून तवडकार हाणे सर्व पक्षीय शिश्टमंडळ दिल्लींत व्हरपाक जाय. हे संबंदी ताणे सात दिसांत निर्णय घेतलो ना जाल्यार तांच्या घराचेर मोर्चा व्हरपाची शिटकावणी मिशन पॉलिटिकल रिझर्वेशनच्या पदाधिकार्यांनी दिल्या.
मडगांवांत जाल्ले बसकेंत मिशन पॉलिटिकल रिझर्वेशन फॉर एसटी ऑफ गोवा वतीन लोकसभा वेंचणुकां पयलीं राजकी आरक्षणा संबंदीची अधिसुचोवणी काडपाची मागणी केल्या, ना जाल्यार आंदोलन सुरू करपाची शिटकावणी दिल्या. बसकेक मिशनाचो संजोयक जुवांव फर्नाडीस, रुपेश वेळीप, रवींद्र वेळीप, कांता गावडे आनी गोविंद शिरोडकार हाजीर आशिल्ले. केंद्र सरकारा कडेन सर्व पक्षीय शिश्टमंडळाक घेवंन वचपा खातीर मिशनान राज्य सरकाराक 15 दिसांची मुजत दिल्या.. 21 जुलयाकजाल्ल्या गोंय विधानसभेच्या पावसाळी अधिवेशनांत सावड्डेचो आमदार गणेश गांवकार हाणे एसटी समाजाक राजकी आरक्षण दिवपाचो प्रस्ताव सादर केल्लो. राज्यांतल्या लोकसंख्येत 10.23 टक्के आशिल्ल्या एसटी समाजाक राजकी आरक्षण मेळचें अशी मागणी करपी व्हो प्रस्ताव विधानसभेन मानून घेतल्लो.
व्हो थाराव सत्ताधारी भाजपा सयत विरोधकांनी एकमतान मानून घेतल्लो. मुख्यमंत्री डॉ प्रमोद सावंत हाणे आदिवासी कल्याण मंत्री ह्या नात्यान सर्व पक्षीय शिश्टमंडळ दिल्लींत व्हरून एसटी समाजाक राजकी आरक्षण दिवपाची मागणी केंद्र सरकारा कडेन करपाचें आस्वासन दिल्लें. आरक्षणा संबंदीचो थाराव पास करून पांच म्हयने जावंन गेले तरी सरकारान आस्वासनाची पूर्ती करपा खातीर कसलेंच सकारात्मक पावल घातिल्लें दिसना. ताका लागून एसटी भावां मदीं फटवणूक आनी विस्वासघात जाल्ल्याची भावना तयार जाल्या. लोकसभा वेंचणूक जाय मेरेन सरकारान एसटी समाजाक फकत आस्वासनाचेरूच दवोरपाक सोदता अशे दिसपाक लागलां अशे मिशनाचे पदाधिकाऱ्यांनी सांगलें.
गोंयांतल्या एसटी समजा खातीर राजकी आरक्षणा खातीर मिशनान 16 एसटी संघटनाच्या तेंक्यान 15 नोव्हेंबरा पणजे आझाद मैदानाचेर उलगुलन हें जन आंदोलन सुरू केल्लें. आनी लोकसभा वेंचणुके पयलीं विधानसभेंत एसटी खातीर राजकी आरक्षण मेळोवन दिवचें अशी मागणी केल्ली. फाटल्या देड म्हयन्यांत मिशनान आदिवासी हक्कां खातीर उलगुलान चळवळ चलयल्या. आतां मेरेन एसटीचे प्राबल्य आशिल्ल्या गांवांनी सुमार 70 उलगुलान बसका घेतल्यात. पर्ये, फोंडें, कुमारजुवें, साखली, कुंकळ्ळी, कोणकोण, सांगे, केंपें, प्रियोळ आनी साश्टींतल्या कांय वाठारांत बसका घेतल्यात. आंदोलनाक हजारांनी एसटी समाज भावांनी तेको दिला आनी गरज पडटली तेन्ना ते रस्य्चाचेर येवपाक तयार आसात अशे मिशनाच्या पदाधिकाऱ्यांनी सांगलां.. मुख्यमंत्र्यान सर्व पक्षीय शिश्टमंडळ दिल्लींत घेवन वचपाचें जें आस्वासन दिल्लें ते पुराय करपा खातीर सभापती रमेश तवडकार हाणे आतां सक्रिय जावपाक जाय. मात थारावाची कार्यवाही जावची म्हणून ताणे अजून कांय केल्लें दिसना. सभापतीन सात दिसां भितर किदें तो निर्णय घेवपाची मुजत मिशनान दिल्या. हे मुजतींत ताणे कसलीच कृती केली ना जाल्यार एसटी फुडाऱ्यां सयत सभापतीच्या घरार मोर्चो काडून सभापती म्हणून तांका ताच्या लागणुकेची याद करून दितले. तवडकार हाणे पक्षा केडन न्हय जाल्यार समाजा कडेन एकनिश्ठ रावपाची गरज आसा अशें मिशनाचो अध्यक्ष जुवांव फर्नांडीस हाणे सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
