भांगरभूंय | प्रतिनिधी
समाजीक कार्यकर्ते खुबळ्ळेः स्पश्टीकरणाची मुख्यमंत्र्यां कडेन मागणी
भांगरभूंय । प्रतिनिधी
पणजीः अर्बन नक्षलवादी म्हणल्यार नेमके कोण, हाचें मुख्यमंत्री डॉ. प्रमोद सावंत हांणी स्पश्टीकरण दिवचें, अशी मागणी खुबळिल्ल्या समाजीक कार्यकर्त्यांनी आयतारा केली. गोंयांत अर्बन नक्षलवादी सक्रीय आशिल्ल्याचें मुख्यमंत्री डॉ. सावंत हांणी विधान केल्लें. ह्या विधानाचो गोंयांतल्या समाजीक कार्यकर्त्यांनी आनी राजकी पक्षांनी खर निशेध केला.
हेर राज्यां वरी गोंयांत लेगीत अर्बन नक्षलवादी वावुरतात. तांणी गोंयांतल्या अनुसुचीत जातींतल्या (एससी) लोकांचो गैरफायदो घेवचो न्हय हे खातीर जाती- धर्म कुशीक दवरून तांकां घरा आपयात. तांच्या घरा वचात. तांकां भाजपाच्या वावरांत वांटेकार करून घेयात, असो उलो मुख्यमंत्री डॉ. सावंत हांणी शेनवारा भाजपा मोर्चाच्या पदाधिकाऱ्यांक मार्गदर्शन करतना मारिल्लो. हाचे वयल्यान समाजीक कार्यकर्त्यां सयत विरोधी काँग्रेस, गोवा फॉरवर्ड हे पक्ष लेगीत आक्रमक जाल्यात.
आयतारा पणजे घेतिल्ले पत्रकार परिशदेंत उलयतना समाजीक कार्यकर्ते रामा काणकोणकार हांणी मुख्यमंत्र्यांचेर खर टिका केली. भारतीय संविधाना प्रमाण आपल्या न्याय, हक्कां खातीर गोंयांतले जे लोक रस्त्यांचेर देंवतात, ते नक्षलवादी व्हय, असो प्रस्न तांणी उपस्थीत केलो. अर्बन नक्षलवादी म्हणल्यार कोण, हाचें मुख्यमंत्र्यान स्पश्टीकरण दिवचें, ना जाल्यार तांणी गोंयकारांची माफी मागची, अशेंय तांणी सांगलें. मुख्यमंत्री डॉ. सावंत हांणी केल्लें विधान हें येता ते लोकसभा वेंचणुकेंत एससी आनी एसटी समाजाची व्हॉट बँक सांबाळपा खातीर तशेंच अर्बन नक्षलवादी हें उतर गोंयांतल्या समाजीक कार्यकर्त्यांकूच उद्देशून वापरिल्ल्याचो दुबाव शंकर पोळजी हांणी उक्तायलो.
अर्बन नक्षलवाद्यांक कित्याक अटक करूंक नाः विजय सरदेसाय
मुख्यमंत्री तशेंच गृहमंत्री डॉ. प्रमोद सावंत हांणी अर्बन नक्षलवाद्यां विशीं केल्ल्या विधानाचो परिणाम फुडल्या काळांत पर्यटक आनी गोंयच्या पर्यटनाचेर जातलो, असो दावो आमदार तशेंच गोवा फॉरवर्डाचे अध्यक्ष विजय सरदेसाय हांणी केलो. गोंयांत अर्बन नक्षलवादी सक्रीय आसात, हे खबर आसून लेगीत गृहमंत्री ह्या नात्यान मुख्यमंत्र्यान तांकां आतां मेरेन कित्याक अटक करूंक ना, असोय प्रस्न तांणी उपस्थीत केलो.
पुलीस यंत्रणां कित्याक ओगी बसल्या?: अमीत पाटकार
अर्बन नक्षलवादी म्हणल्यार नेमके कोण, हें मुख्यमंत्री डॉ. प्रमोद सावंत हांणी स्पश्ट करपाची खर गरज आसा. गोंयांत अर्बन नक्षलवादी सक्रीय आसातनाय पुलीस यंत्रणा कशी कितें ओगी बसल्या? उच्च न्यायालायच्या आदेशा प्रमाण जापसालदारकी सांबाळपी सरकारी कर्मचाऱ्यांक धमकी दिवपी राजकारण्यांक मुख्यमंत्री कसली उपमा दितले, अशे प्रस्न काँग्रेस प्रदेशाध्यक्ष अमीत पाटकार हांणी उपस्थीत केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
