बेटी भी महान, बेटी बचाओ….

भांगरभूंय | प्रतिनिधी

33 टक्के अस्तुरी राखीवता विधेयकाक सगल्यांची मान्यताय मेळ्ळी, तें विधेयक बांदपाक आनी विधेयकाचे मान्यताये खातीर काडिल्ले त्रास एका दिसाचे न्हय.

2024 वर्साक येवकार दितना फाटल्या वर्साच्या मुखेल घडणुकांचो नियाळ जाता. 33 टक्के अस्तुरी राखीवता विधेयकाक राष्ट्रपतींची मान्यताय मेळप 2023 वर्सातलें व्हड जैत. देस आनी राज्य पांवड्यार अस्तुरेक सगल्या मळांनी सुवात दिवन तिका राजकारणांत येवपा खातीर बळिश्ट करपाचें आव्हान आसा.
गोंयावरी ल्हान राज्यांत अस्तुरेक 100 टक्के साक्षर करपाची मोख दवरप, जैताचे नवे पांवडे हुपतना येवपी अरिश्टां कडेन झुजपाक तिका मानसीक बळगें दिवपाची कसवटी आसा. शशिकलाताई काकोडकार हांचे उपरांत गोंयांक दुसरी अस्तुरी मुखेलमंत्री आनी संयोगिता राणे हांचे उपरांत अस्तुरी खासदार मेळूंक ना. देशांंतले, गोंयचे स्त्रीशक्तीची दोळे दिपकावपी उदरगत फाटल्या 20 वर्सांनी जाल्या. अर्थीक सक्षमीकरणांतल्यान ती फुडें वतना निकत्याच जल्मल्ल्या चली भुरग्याक रस्त्या कुशीक सोडून वचपाची घडणूक घडल्या. महिला आयोगान तेसंबंदी अभ्यास करुन फुडारांत तशें जावचें न्हय म्हणून नवे येवजणेंतल्यान जागृताय करची. भलायकी, अस्तुरी सक्षमीकरणांत गोंयांक इनाम फावो जाल्लें आसतना सान चली भुरग्याक उगत्यार सोडप म्हळ्यार आयजय बेटी नाका अशें तिका दिसलां, तिचो छळय जाल्लोय आसतलो.
अजूनय पितृसत्ताक सोपूंक ना, कांय तेंप ते उरतलें, 33 टक्के 2024 वर्सा अस्तुरी संसदेंत पावली जाल्यार मातृसत्ताका कडेन येवपाची वाट मेकळी जातली. ते वाटेर आडमेळीं, कांटे, कवंच्यो पडिल्ल्यो आसतल्यो. त्यो पयसावप ाखातीर गुरवारचार, बाळंटेराचे सुटये सावन, ती कामाक आसता ते सुवातेर तिका राखण दिवपा बराबरच सगलीं मळां मातृसत्ताकाक फावोशीं जावपा पासत कायदे करप गरजेचें. तेपासत नगरपालिका, पंचायतीच्या उपरांत लोकसभा, राज्यसभा, विधानसभेंत 33 टक्क्यांनी तिका धाडप म्हत्वाचें. अन्याय, अत्याचाराचे वाटे वेल्यान एकली फुलनदेवी संसदेंत पावली, आपले धुवेक न्याय मेळपा खातीर झुजपी निर्भयाची आई 2024 त लोकसभेर कित्याक पावची न्हय?
33 टक्के अस्तुरी विधेयकाक मान्यताय मेळोवन मध्य प्रदेश, राजस्थान, छत्तीसगढ, तेलंगण आनी हेर राज्यांचे विधानसभेंत उच्च शिक्षण घेतिल्ली युवा अस्तुरी मंत्री, आमदार जातली, दिसतली म्हणून हालींच्या सरकारांनी पावलां मारल्यांत. लोकसभेर दर एका राज्यांतल्यान चड बिटियां खासदार म्हणून पावल्यार बेटी बचाओ मोहिमेक बळ मेळटलें. बेटी भी महान, बेटी बचाओ, बेटी पढाओ लोकसभा वेचणुकेचो मुखेल विशय आसचो.
नारीशक्तीक उमेद दिवपी 2024 चो अर्थसंकल्प तेच दिकेन वचपी आसतलो अशी आस्त बाळगुया. तेभायर नारीशक्ती केंदीत जाहीरनामो दिवपाची संद राजकी पक्षांनी व्हगडावची न्हय. तिच्या जल्मा वांगडाच तिका मानाचे पान दिवप, तिका लक्ष्मीच न्हय सरस्वती मानून शिकोवप, अर्थीक बळग्यांतल्यान जाण्टेपणाचो आदार मानप सरकाराची, घराब्यांची, मनशाची लागणूक. तिणे मळबाक हात लायले, ती चंद्र – सुर्यार पावली तरी तिची छळणूक सोंपना, छळ करप्याक सगल्या मळां पासून पयस दवरचो म्हणून तिका झगडचें कित्याक पडटा?
33 टक्के अस्तुरी राखीवता विधेयकाक सगल्यांची मान्यताय मेळ्ळी, तें विधेयक बांदपाक आनी विधेयकाचे मान्यताये खातीर काडिल्ले त्रास एका दिसाचे न्हय. नारीशक्ती विशींचो एखाद्रो विशय लोकसभा, राज्यसभे मुखार आयल्यार महिला खासदारांनी एकठांय जावन हेरांचोय तेंको मेळोवन समाजाक जाय ते कायदे दिवप, ते चालीक लावप हे लागणुकेक पाळो दिवचो पडटलो.
आयजय अस्तुरी साक्षरता दादल्यां परस उणी आसा. ती बरोवपांत शंबर टक्के साक्षर नासत पूण उलोवपांत आसा. भाजिवाली, नुस्तेकान्न, कोयर आनी नितळसाण वेवस्थापनांतली अस्तुरी मोबायल वापरता. तातूंतले बुदवंत अस्तुरेक आर्टिफिशल इंटेलिजन्साच्या युगांत व्हरप, तिकाय ज्ञानाचें दार खंय आसा तें दाखोवप शक्य आसा व्हय? घर, भुरगीं, नोकरी, हेर वेव्हार सांबाळपी अस्तुरेचे प्रस्न आयकून घेवन ते सुटावे करप, तांकां भलायकी, कायद्याचें शिक्षण दिवपा पासत वेगळ्यो वाटो आपणावपाची येवजण लोकसभा वेंचणूक जाहीरनाम्यांत कित्याक आसची न्हय?
पाणीवालीबाई म्हणून नामना जोडिल्ल्यो मृणाल गोरे हांचेवरी अस्तुरी परत मेळची ना. उदका खातीरच न्हय तर अस्तुरेच्या हक्कां खातीर, 33 टक्के अस्तुरी राखीवते पासत त्यो झुजत रावल्यो. तांचेवरी झुजपी अस्तुरे पासत अस्तुरी उंचायेर पावल्या, नवी अरिश्टां तिच्याच न्हय समाजा मुखार आसात, तिचें अरिश्ट म्हळ्यार समाजाचेंय अरिश्ट हें समजून घेतल्यार राखीवता पयस करप, घटनाकारांक अपेक्षीत आशिल्ली समानताय हाडप शक्य जातलें.
समानताये कडेन वतना तिचो भेस, भास, चलणूक बदलता, ती धांवतना तिका मुळा सावन सोंपोवपाचेय यत्न जातात. एखाद्री महुआ, ममता त्या यत्नां मुखार दिमी मोडची ना, न्यायालयाची सोंपणा चडपाची धिटाय दाखयता. तिणे चूक केल्यार माफी ना पूण राजकारण्यावरी आदींच तिका गुन्यांवकार मानून माध्यमां ती सोंपिल्ल्याचें चित्र समाजा मुखार दवरतात तेन्ना सरकार सादूर जाता. ‘आयज तिका फाल्यां म्हाका’ हे ओंपारी प्रमाण सत्तेंतले राजकारणी कायद्यान समाज माध्यमां खातीर नवे कायदे करतात तेन्ना तिका विचारचेंच पडटलें. आदल्या तेंपा वयलो तिचो वावर तिचे बराबरीन आयज ताचोय जाला, ताची सुवात ती घेता तेन्ना 2024 ची लोकसभा, फुडारांतल्यो विधानसभा वेंचणुकोय नव्या विचारांक, तंत्रगिन्यानाचे मजतीन संकश्टां पयस करपाच्या तंत्राक म्हत्व दिवपी जातल्यो.
वेंचणुकांनी नवें तंत्रज्ञान येतलें तेन्ना तेखातीर कायद्याची बांदावळ पयलीं केल्ली आसची, पयलींचे उणेपण काडून उडोवचें.
वेंचणूक कार्यालयांनी, सरकार, प्रशासनांत स्त्रीशक्ती वाडत आसा, तिचे खातीर खासा राखणे वेवस्थाय जाता पूण येरादारीचें कितें? तिचोय वांटो भौशीक येरादारींत आसपाक जाय.
33 टक्के अस्तुरी राखीवतायेक मान्यताय मेळोवपाक झुजतना देश, राज्याच्या अर्थसंकल्पांत दरेक खात्याचे येवजणेंत ती दिसची अशी मागणी जाल्ली. ते मागणेंल्यान अस्तुरी आनी बायलां आनी भुरगीं उदरगत खातें, अस्तुरी आयोगाची बांदावळ जाली. महर्षी धोंडो केशव कर्वे, महात्मा ज्योतिबा फुले, राजा राम मोहन राय हांचे वरी फुडार्‍यांच्या बुन्यादीच्या वावरांतल्यान अस्तुरी घडली. 33 टक्के राखीवतेंतल्यान ती आपली सुवात घेतली ही भिरांत ताका दिसतलीच. तेदेवेळार ताकाय शिकोवपा खातीर, सुदारपा खातीर लोकसभा जाहीरनाम्यात उतर दिवचें पडटलें. 33 टक्के अस्तुरी राखीवता विधानसभेंत, राज्यसभेंत पावपाचो मार्ग मेकळो जाला तरी ताकाय कायद्याची फास्की आसतली. ती घालपा पासत 2024 लोकसभा वेंचणुकेंत उमेदवारी दितना सक्षम अस्तुरेक वेंचून हाडपाची जापसालदारकी राजकी पक्षांक आनी ताकाय घेवची पडटली.
उगतें मळब काळखी जावचें न्हय, तिची घुसमट वाडची न्हय, बंधना आसलीं तरी तिकाय मेकळेपणान वावुरपाक मेळपा खातीर वातावरण तयार करचें पडटलें. राजकी मळार येवपाकय उच्च शिक्षण, प्रशिक्षण, तळागाळांतल्या पंचायत ते नगरपालिका, म्हापालिके मेरेनचो अणभव उपेगाचो.
33 टक्के अस्तुरी राखीवतेंतल्यान मतदारसंघाचे फेररचणुकेचो, नव्या मतदारसंघाचो विचार जावं येता. देशाचे वाडपी लोकसंख्येच्या नियाळांतल्यान फुडल्या पांच वर्सांनी ताचो आरंभ जातलो. तेन्ना अस्तुरी राखीवताय वाडटली. तेच नदरेंतल्यान बेटी बचाओ, पढाओ क व्हड रुप दिवन बेटी भी महान जोडपाक ती लोकसभेंत जाय.

सुहासिनी प्रभुगांवकार
9881099260