भांगरभूंय | प्रतिनिधी
कोरोनान मनशाची जिणेशैली बदल्ली, तशेंच समाजांतूय कांय बदल केले. देखीक येरादारी. कोरोना पयलीं रस्त्यांचेर खूब बसी दिसताल्यो, तांचो आंकडो उणो जालो. इतलो की आयज पसून वरारार चलपी बऱ्योच बसी चालू जावंक नात. कोरोना काळांत तर मेजक्योच आशिल्ल्यो. म्हणटकच लोकांनी खाजगी वाहनां घेवन कामा- धंद्याक वचपाक सुरवात केली. वर्स- देड वर्सांत कांय जाणांची भीड चेपली, गाडी चलोवपाचो भंय उरलो ना…. ते आतां कामाक वतना गाडीच भायर काडटात. आपशीच बसीचें प्रवासी देंवले. बसी नात म्हूण आमी गाडयो व्हरतात, असो कामदारांचो युक्तीवाद, तर बसधनी म्हणटात प्रवासी मेळनात, म्हूण आमी बसी बंद दवरल्यात. हालींच सरकारान राजधानी पणजे पुरतो एक म्हत्वाचो निर्णय घेतला. 15 वर्सां पुराय जाल्ल्यो 38 खाजगी बसी काडून तांच्या जाग्यार कदंबाच्यो इलेक्ट्रीक बसी घालपाचो निर्णय तांणी घेतला. ज्या बसींक 15 वर्सां जावंक नात, तांकां वेगळे मार्ग दितले. सरकाराच्या ह्या निर्णयाक खाजगी बसधनयांचो घडये विरोध जावं येता. पूण सरकार आपल्या निर्णयाचेर ठाम आसा.
पणजी शारांतली येरादारी हो घुस्पल्लो विशय. तो सोडोवपाचो यत्न जायत्या राजकी फुडाऱ्यांनी, येरादारी अधिकाऱ्यांनी (?) केलो, पूण प्रवाशांक एक दीस पसून थाकाय मेळूंक ना. खुद्द लश्कराक पसून सांगल्यार ही सेवा सुदारपाची ना, अशें खूबजाण म्हणटात. हाचे वयल्यान सुज्ञ मनशाक हे सेवेचो दर्जो कितें ताची कल्पना येतली. पणजी बसस्टॅण्डा वयल्यान मिरामार वचपाक अर्द- ते पाऊण वर लागता खंय!! आतां ह्या मार्गाचेर कदंबाच्यो इलेक्ट्रीक बसी येतल्यो. त्यो तरी वेळार पावतल्यो? ह्यो बसी नव्यो काय सध्या आसात त्या आकाराच्यो? कारण तांची हेर गाडयांक आडखळ जावं येता. तिकेट कितली आसतली? सध्या ताळगांवां वचपाक 20 रु., मिरामार वचपाक 15 रुपया घेतात. तिकेट वाडल्यार प्रवाशांक अर्थीक अडचण जावं येता. सुरवातीक कदंब बसीचेर कंडक्टर आसतले. मात उपरांत प्रवाशांक क्यूआर कोड, आॅनलायन पद्दतीन तिकेटी काडच्यो पडटल्यो. पणजी- मडगांवां सयत व्हडल्या मार्गांचेर अशीच आधुनिक पद्दत सुरु करपाची घोशणा णव म्हयन्यां पयलीं जाल्ली. ती चालीक लायल्या व्हय?? ह्यो इलेक्ट्रीक बसी कदंब म्हामंडळ विकत घेतलें, काय भाड्यान घेवन चलयतलें? कारण सध्या ज्यो भाड्याच्यो इलेक्ट्रीक बसी चलतात, त्यो लुकसाणेंत आसात खंय!
पणजी बाजारांत वेपारा खातीर येवपी जायत्या जाणांक ही सेवा वापरप अर्थांत कठीण जातली. तांचे खातीर ड्रायव्हरा कडेन तिकेटी दितले. तशेंच दरेका स्टाॅपाचेर कंडक्टर त्यो तिकेटी तपासतलो. सध्या 36 बसस्टाॅप वेंचून थंय बसशेट उबारतले. तातूंत ही आयटीएमएस सेवा दितले. क्यूआर कोडानूय तिकेटी बूक करपाक मेळटल्यो. आॅनलायन पसून घेवपाक मेळटल्यो. यंत्र बसोवपाचें काम कांय कडेन सुरू जालां. ह्या बसस्टाॅपा वांगडांच सरभोंवतणचो जागो, रस्तोय चलपा, उबो रावपा सारको जावचो!
सध्या खाजगी बसींचेर कंडक्टर आसात, तांकां कदंब म्हामंडळ आपणायतलें काय नवे कंडक्टर नेमतलें? तशे बसस्टाॅपांचेर तांकां तिकेट तपासपाक नेमूं येतात. पणजे शार आनी सरभोंवतणच्या उपनगरांनी धांवपी कांय बसी 18 वर्सांच्यो आसात खंय. कायद्या प्रमाण 15 वर्सां हुपिल्ल्यो बसी बंद करच्यो पडटात. मागीर ह्यो बसी इतलीं वर्सां कश्यो धांवतात? तांकां परवानगी कोणे दिली? ज्या बसींक 15 वर्सां जावंक नात, तांकां हेर मार्ग दितले. जे कोण नव्यो बसी घेतले, तांकांय नवे मार्ग दितले. पूण, ते तांकां मान्य आसपाक जाय. कारण पणजे शारांतले (रायबंदर, चिंबल, माशेल, सांत इस्तेव्ह, दोनापावला बी सोडल्यार) चडशे मार्ग लागचे लागीं. प्रवाशीय भरपूर.
सरकारान ‘म्हजी बस’ येवजण चालू केल्ली. पूण तिका फावोसो प्रतिसाद मेळूंक ना. आतांची ही प्रवाशांक दर्जेदार प्रवासाचो अणभव दिवपाची वेगळी येवजण येसस्वी जावची. तशें जाल्यार मागीर ती हेर शारांनी आनी उण्या अंतराचेर चालीक लावं येता. सदच्या प्रवाशांक इलेक्ट्रीक, एसी, वाॅल्वो सारकी गडगंज बस आसली म्हूण फरक पडना. तांची फक्त एकूच मागणी, बसस्टॅण्डा वयल्यान सुटिल्ली बस शक्यतो बेगीन इत्सीत थळाचेर पावची. 10 मिनटांच्या प्रवासाक अर्द वर नाका!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
