भांगरभूंय | प्रतिनिधी
-पुलीस बंदोबस्तांत आयज फोडटले 25 व्हडीं
कोरगांवः बेकायदो रेंव काडपाचो विशय गोंयांत गाजत आसतनाच, अशा प्रकरणांत जप्त केल्ल्यो होडयो उच्च न्यायालयाच्या आदेशा प्रमाण फोडपाची मोहीम खण खात्यान सुरू केल्या. न्हंयबाग – पोरस्कड्यां एक होडी मंगळारा फोडले उपरांत थळाव्यांनी खण खात्याच्या अधिकाऱ्यांक खर विरोध केलो. ताका लागून बुधवारा पुलीस बंदोेबस्तांत हेर 25 होडयो फोडपाचो निर्णय खण खात्यान घेतला.
उच्च न्यायालयाच्या आदेशा प्रमाण, गोंयांत रेंव काडपाक बंदी आसा. अशें आसतनाय बेकायदो रेंव काडपाचे प्रकार घडत आसात. अशा प्रकरणांत कारवाय जाता, पूण परतून रेंव काडपाचे प्रकार चालूच उरतात. बेकायदो रेंव काडपी होडयो जप्त केल्यात, त्यो फोडपाचे आदेश न्यायालयान दिल्यात. ते प्रमाण खण खात्यान मंगळारा खात्याच्या अधिकाऱ्यांक न्हंयबाग-पोरस्कड्यां धाडून थंय जप्त केल्ल्यो 26 होडयो मोडपाचे आदेश दिल्ले. ह्याे सगल्यो होडयो 2020 त जप्त केल्ल्यो. त्यो फोडपा खातीर खण खात्याचे अधिकारी आयले आनी तांणी तातूंतली एक होडी फोडले उपरांत थळाव्यांनी ताका विरोध केलो. ते खातीर पुलीस बंदोबस्तांत हेर 25 होडयाे फोडपाचो निर्णय खात्याच्या अधिकाऱ्यांनी घेतला.
6 वर्सां पसून बंद आशिल्ली व्हडीं फोडली
बांदकामां खातीर गरजेची आसपी रेंवेचो गोंयांत मोट्या प्रमाणांत उणाव आसा. म्हजी व्हडीं फाटल्या 6 वर्सां पसून बंद आसा. होडयेचें इंजीन बंद पडलां. तरी लेगीत खण खात्याच्या अधिकाऱ्यांनी मुद्दम व्हडीं फोडली. ही व्हडीं दुरुस्त करून दिवची, अशें मंगळारा फोडिल्ल्या व्हडीं धनी गजानन तेली हांणी म्हणलें.
हाचे मुखार कारवाय सुरूच उरतलीः शिरोडकार
खण खात्याचे अधिकारी विनय शिरोडकार हांणी म्हणलें, हाचे मुखार एकूय होडी उदकांत दिसल्यार ताचेर थळाव्या पुलिसा वरवीं कारवाय जातली. बेकायदो रेंव काडपी होडयांचेर कारवायेचे आदेश न्यायालयान दिल्यात. ते प्रमाण ही कारवाय केल्या. फुडल्या काळांत ही मोहीम सुरूच उरतली, अशें शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
