भांगरभूंय | प्रतिनिधी
मुख्यमंत्रीः ‘सागरमंथन- सुशासन संवाद’ कार्यावळींत दावो
भांगरभूंय । प्रतिनिधी
पणजीः समाजांतल्या निमाण्या घटकाची सर्वांगी उदरगत जावची ह्याच उद्देशान आपणे ‘स्वयंपूर्ण गोंय’ ही मोहीम सुरू केल्ली. हे मोहिमे खाला केंद्र आनी राज्य सरकाराच्यो सगळ्यो येवजण्यो अंत्योदय पांवड्या मेरेन पावोवपाक सुरवात केली. तेच खातीर गोंयची साबार मळांचेर उदरगत जाता, अशें मुख्यमंत्री डॉ. प्रमोद सावंत हांणी स्पश्ट केलें.
मडगांवां पांचजन्य वतीन आयोजीत सागरमंथन- सुशासन संवाद कार्यावळींतले प्रकट मुलाखतींत मुख्यमंत्री उलयताले.
मुख्यमंत्रीपदाचो ताबो घेत सावन गोंयची सगळ्याच मळांचेर उदरगत करपाचो आपणे निश्चेव केल्लो. आतां मेरेन गोंय विवीध गजालीं खातीर हेर राज्यांचेर पातयेवन आशिल्लें. हें पातयेवन रावप उणें करून गोंयाक विवीध मळांचेर स्वयंपूर्ण करप हेंच ध्येय बाळगून आपणें ‘आत्मनिर्भर भारत- स्वयंपूर्ण गोंय’ मोहीम सुरू केली. हे मोहिमेक थळाव्या लोकांनी उत्स्फूर्त प्रतिसाद दिल्ल्यान ती येसस्वी लेगीत जाली, अशेंय मुख्यमंत्री डॉ. सावंत हांणी सांगलें.
आयआयटी खातीर फुडल्या वर्सा जमीन दितले
आयआयटी खातीर स्वतंत्र कॅम्पस उबारचे खातीर गोंय सरकार फाटल्या कितल्याश्याच वर्सां सावन यत्न करतालो. ते खातीर कांय वाठारांतल्यो जमनी निश्चीत केल्ल्यो, पूण कांय लोकांच्या विरोधाक लागून जमीन मेळप कुस्तार जाल्लें. पूण सरकारान आतां आयआयटी कॅम्पसा खातीर सुवात निश्चीत केल्या. फुडल्या वर्सा आयआयटी कॅम्पसा खातीर ती दिसले, अशें मुख्यमंत्र्यान सांगलें.
दाबोळी विमानतळ चालूच उरतलो
मोपा मनोहर आंतरराष्ट्रीय विमानतळ सुरू जाले उपरांत दाबोळी विमानतल बंद जातलो अश्यो वावड्यो विरोधकांनी पातळायिल्ल्यो. पूण मोपा सयत दाबोळी लेगीत सासणा खातीर चालू दवरतले अशी हमी केंद्र सरकारान गोंयकारांक दिल्ली. ते प्रमाण दाबोळी विमानतळ अजून लेगीत चालू आसा, हे फुडेंय चालू उरतलो, अशें मुख्यमंत्री डॉ. सावंत हांणी सांगलें. मोपा विमानतळाक लागून गोंयाक भेट दिवपी पर्यटकांचे संख्येंत व्हड जाल्ल्याचें तांणी नमूद केलें.
राष्ट्रीय खेळां सर्ती वयल्यान राजकारण
राष्ट्रीय खेळां सर्तीचें गोंयांत उत्कृश्ट आयोजन जाल्ल्याचें आनी खेळगड्यांक गरजेच्यो सगळ्यो सोयी सुविधा वेळार मेळिल्ल्याचें सर्तींत वांटो घेतिल्ले खेळगडेय सांगतात. पूण विरोधी पक्ष खेळां सर्ती वयल्यान फक्त राजकारण करता. ते खातीरूच सर्तींत घोटाळो जाल्ल्याच्यो वावड्यो पातळयतात, अशें मुख्यमंत्री डॉ. सावंत हांणी सांगलें.
विश्वगुरू जावपाचें सपन निश्चीत साकार जातलेः गडकरी
प्रधानमंत्री नरेंद्र मोदी हांच्या फुडारपणा खालच्या केंद्रांतल्या भाजपा सरकारान देशाक विश्वगुरू करपाचो संकल्प केला. फुडल्या कांय वर्सां भितर हो संकल्प प्रत्यक्षांत येतलो, असो विस्वास केंद्रीय रस्ते आनी म्हामार्ग मंत्री नितीन गडकरी हांणी ‘सागरमंथन- सुशासन संवाद’ कार्यावळींत उक्तायलो. फुडल्या पांच वर्सांत देशाक तिसऱ्या नंबराची अर्थवेवस्था करपाचें तशेंच तळागाळांतल्या लोकांची सर्वांगी उदरगत करपाचें सरकाराचें सपन निश्चीत पुराय जातलें, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
