भांगरभूंय | प्रतिनिधी
आनीक 10 बाधितांची भर
भांगरभूंय । प्रतिनिधी
पणजीः गोंयांत कोरोनाबाधितांची संख्या दिसान दीस वाडत आशिल्ल्यान लोकां मदीं परतीन एकदां भंयाचें वातावरण पातळ्ळां. शुक्रार आनी शेनवारा 24 वरांत गोंयांत नवें 10 दुयेंती सांपडिल्ल्यान दुयेंतींचो आंकडो 32 जाला.
भलायकी खात्यान ह्या 24 वरांत 222 जाणांच्यो चांचण्यो केल्ल्यो. तातूंत 10 जाण कोरोनाबाधीत आशिल्ल्याचें स्पश्ट जालें. जाल्यार ह्या काळांत दोगांनी कोरोनाचेर जैत मेळयलें.
फाटल्या कांय दिसां सावन केरळा सयत देशांतल्या विवीध राज्यांनी कोरोना जेएन1 ह्या नव्या व्हेरियंटाचो प्रसार सुरू जाला. ह्या व्हेरियंटाचे कांय दुयेंती गोंयांतूय सांपडल्यात. कोरोनाबाधितांची वाडटी संख्या लक्षांत घेवन केंद्रीय भलायकी मंत्री मनसूख मांडवीय हांणी सगळ्याच राज्यांची व्हिडियो कॉन्फरन्सींगा वरवीं बसका घेवन परिस्थितीचो नियाळ घेतलो. कोरोनाचेर नियंत्रण दवरचे खातीर केंद्र सरकारान सगळ्याच राज्यां खातीर मार्गदर्शक तत्वां जारी केल्यांत. पूण मास्क सक्ती करूंक ना. गोंयांतली कोरोनाची स्थिती नियंत्रणांत आशिल्ल्यान हुस्को करपाची गरज ना, अशें मुख्यमंत्री डॉ. प्रमोद सावंत हांणी स्पश्ट केलां. पूण गोंयांतले वाडटे दुयेंती आनी फुडारांत येवपी सण- उत्सवांचे फाटभुंयेर भलायकी खातें सक्रीय जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
