भांगरभूंय | प्रतिनिधी
मुख्यमंत्रीः वर्सभरात 8.38 कोटींची घुंवळी वखदां जप्त
भांगरभूंय । प्रतिनिधी
पणजी: घुंवळी वखदां कडेन संबंदीत वा गोंयची बदनामी करपी पर्यटकांक गोंयांत थारो आसचो ना. राज्याची बदनामी करपी पर्यटक आमकां नाकात, अशें मुख्यमंत्री डॉ. प्रमोद सावंत हांणी स्पश्ट केलां. 1 जानेवारी 2023 ते 21 डिसेंबर 2023 मेरेन गोंयांत 8.38 कोटींची घुंवळी वखदां जप्त केल्यात आनी 197 ड्रग पेडलरांक अटक केल्यात, अशी म्हायती मुख्यमंत्री डॉ. प्रमोद सावंत हांणी दिली.
घुंवळी वखदां खातीर गोंयची खूब बदनामी जाता. घुंवळी वखदां आड पुलिसांची कारवाय चालूच आसता. अंदूं 8.38 कोटींची घुंवळी वखदां पुलिसांनी जप्त केल्यात. पुलीस तशेंच घुंवळी वखदां विरोधी फाट्यान ही कारवाय केल्या. घुंवळी वखदां हाडपी वा गैर कृत्या करून गोंयची बदनामी करपी पर्यटक सरकाराक नाका. दर्जेदार पर्यटक येवपाक जाय. आतां नव्या वर्साक लागून व्हड प्रमाणांत पर्यटक गोंयांत येतले. आवाजाचें प्रदुशण तशेंच घुंवळी वखदांचेर पुलिसांची नदर आसतली, अशें मुख्यमंत्री डॉ. सावंत हांणी सांगलें. तरणाट्यांनी घुंवळी वखदांच्या मोहाक बळी पडपाक जायना. सगळ्यांनी सादूर रावचे, असोय तांणी उलो मारला.
शिंदळकी चलोवपी रायबंदर क्लबा आड गुन्यांव
रायबंदरार एका क्लबांत शिंदळकी वेवसाय उक्ताडार आयलो. पोरणे गोंय पुलिसांनी नेपाळी चलयांची सुटका केल्ली. ह्या क्लबाआड गुन्यांव नोंद जाला.
डान्स बार, शिंदळकी रॅकेट चलोवपी बार्रां वा आस्थापनाचे परवाने रद्द जातलें, अशी शिटकावणी मुख्यमंत्र्यांनी दिली.
सनबर्न रातीं 10 वरां मेरेन
सनबर्न महोत्सवाक रातच्या 10 वरां मेरेन मान्यताय दिल्या. रातच्या 12 वरां मेरेन महोत्सव चलचो ना. कायद्या प्रमाण रातच्या 12 वरां मेरेन संगीत वाजोवपाची मेकळीक आसा. सरकारान मात सनबर्नाक रातच्या 10 वरां मेरेन मान्यताय दिल्या, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
