भांगरभूंय | प्रतिनिधी
-सर्वोच्च न्यायालयाच्या नेमा प्रमाण 18,082 वाहन चालकांचेर कारवाय
पणजीः गोंयांत 1 जानेवारी ते 30 नोव्हेंबर 2023 मेरेन सोरो पियेवन वाहन चलयिल्ल्यान 1,630 जाणांचे वाहन परवाने पुलिसांनी जप्त केल्यात. ह्या प्रमाणांत पोरूंचे तुळेंत 27.77 टक्के वाड जाल्या. तशेंच सर्वोच्च न्यायालयाच्या रस्तो सुरक्षा समितीन दिल्ल्या मार्गदर्शक तत्वां प्रमाण 18,082 वाहन चालकांचेर कारवाय केल्या.
देशांत दिसांनदीस रस्तो अपघातांत मरण येवपाचें प्रमाण वाडत आशिल्ल्याची दखल सर्वोच्च न्यायालयान घेवन न्यायमूर्ती अभय सर्पे हांचे अध्यक्षते खाला नवी रस्तो सुरक्षा समिती स्थापन केल्या. मोटार वाहन कायदो 1988 च्या कलम 19 आनी केंद्रीय मोटार वाहन नेम 1989 च्या कलम 21 प्रमाण वाहन परवानो निलंबन करपाची तजवीज आसा. हे कारवायेची अंमलबजावणी करपाची शिफारस समितीन देशांतल्या सगल्या राज्यांक तशेंच संघ प्रदेशाक निर्देश दिल्ले.
हे समितीन अपघात, रस्त्याची बांदणी तशेंच अपघाती मरण आनी हेर संबंदींत विशयांचो अभ्यास करून अहवाल तयार केला आनी राज्य सरकाराक मार्गदर्शक तत्वां जारी केल्यात.
ह्या मार्गदर्शक तत्वां प्रमाण वेगान वाहन चलोवप, येरादारी सिग्नलाक पाळो दिवप ना, म्हाल व्हरपी वाहनांतल्यान प्रवाशांची येरादारी करप, म्हाल व्हरपी वाहनांतल्यान चड म्हालाची येरादारी करप, सोरो पियेवन गाडी चलोवप आनी वाहन चलयतना मोबायलाचेर उलोवप ह्या येरादारी नेमां खातीर चालकांचे उण्यांत उणें तीन म्हयन्यां खातीर वाहन परवाने निलंबीत करपाची तजवीज केल्या. हे समितीच्या मार्गदर्शक तत्वां प्रमाण सोरो पियेवन गाडी चलयिल्ले प्रकरणांत वाहन चालकांचो वाहन परवानो निलंबीत करपाचो अधिकार पयलो वर्ग न्यायालयाक दिला. जाल्यार वयल्या नेमांच्या उल्लंघना खातीर संबंदींत येरादारी खात्याक अधिकार दिल्यात.
अहवाल मेळ्ळे उपरांत संबंदींत वाहन चालकाक न्यायालयांत वा येरादारी खात्यांत हजर रावपाक समन्स काडटात. उपरांत ह्या प्रकरणांत रितसर सुनावणी घेवन दोशी सांपडल्यार तांचे परवाने तीन म्हयन्यां खातीर निलंबीत करतात.
ह्या तत्वां प्रमाण 11,754 जाणांचेर वेगान वाहन चलयिल्ल्यान कारवाय करतात. तशेंच वाहन चलयतना मोबायल वापरिल्ल्यान 4,592 वाहन चालकांचेर कारवाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
