ज्ञानवापी,काशी विश्वनाथ वाद : मुस्लिम पक्षाच्यो पांचूय याचिका भायरायल्यो

भांगरभूंय | प्रतिनिधी

अलाहाबाद, खबरां संस्था : वाराणसींतल्या ज्ञानवापी आनी काशी विश्वनाथ देवळा मदल्या मालकी वादाच्या प्रकरणांत मंगळार १९ डिसेंबराक अलाहाबाद उच्च न्यायालयान म्हत्वाचो निकाल दिलो. मुसलमान पक्षान दाखल केल्ल्यो पांचूय याचिका उच्च न्यायालयान भायराल्यात. आतां ह्या प्रकरणांत वाराणसी कोर्टाक ६ म्हयन्यांत पुराय करपाचे आदेशूय दिल्यात.
उच्च न्यायालयाचे न्यायाधीश रोहित रंजन अग्रवाल हांच्या एकोड्या खंडपिठान सगळ्या याचिकांचेर सुनावणी करतना हो आदेश दिलो. न्हयकारिल्ल्या मुस्लीम वटेनच्या याचिकां मदल्यो दोन याचिका गुणवत्ते कडेन संबंदीत आशिल्ल्यो. जाल्यार तीन एएसआय सर्वेक्षणाच्या विरोधांत आशिल्ल्यो.

मुस्लीम बाजू म्हळ्यार अंजुमन वेवस्था समिती आनी युपी सुन्नी सेंट्रल वक्फ बोर्डान १९९१ त वाराणसी कोर्टांत दाखल केल्ल्या मूळ खटल्याच्या गुणवत्तेक अलाहाबाद उच्च न्यायालयांत आव्हान दिल्लें. हें प्रकरण वाराणसी न्यायालयांत दाखल आसा.

हिंदू पक्षाचे वकील विजय शंकर रस्तोगी हांणी, मुस्लीम पक्षान उच्च न्यायालयांत ५ याचिका दाखल केल्ल्यो. न्यायालयान त्यो सगळ्यो भायर मारल्यात. तशेंच, १९९१ त हिंदू पक्षान जें केल्लें तेंच करपाचे आदेश उच्च न्यायालयान वाराणसी न्यायालयाक दिल्यात. कोर्टांत एक याचिका आसा (केस नं. ६१०) जाचेर पुजा स्थळांचो कायदो लागू जायना.

प्रार्थनास्थळ कायद्या प्रमाण, १५ ऑगस्ट १९४७ दिसाच्या धर्मीक स्थळांची स्थिती बदलची न्हय. ज्ञानव्यापी प्रकरणांत १५ ऑगस्ट १९४७ दिसा वाठारांची धर्मीक स्थिती देवूळ वा मशिदी सारकी आशिल्ली. खंयच्याय धर्मीक थळांचीं दोन धर्मीक रुपां आसपाक शकनात, अशें उच्च न्यायालयान म्हणलें. तें मंदीर आसूं वा मशीद. पूण हें निश्‍चीत करपा खातीर पुराव्याची गरज आसतली.

१५ ऑगस्ट १९४७ दिसा कॅम्पसांत धर्मीक परिस्थिती कितें आशिल्ली?

अधिवक्ता रस्तोगी हांणी, उच्च न्यायालयान वाराणसी न्यायालयाक १५ ऑगस्ट १९४७ दिसा त्या संकुलाची धर्मीक स्थिती कितें आशिल्ली हाचे पुरावे घेवपाचे निर्देश दिल्यात. तशेंच ६ म्हयन्यांनी ह्या प्रकरणाचो निकाल दिवचो, अशेंय म्हणलें.
हें प्रकरण दोन लोकां मदीं न्हय तर दोन समुदायां मदलें. न्यायालयान एएसआयच्या सर्वेक्षणा खातीर दिल्लो आदेशूय सुरू दवरचो, अशेंय न्यायालयान म्हणलां. त्या आदेशा प्रमाण एएसआयन दाखल केल्लो अहवाल हायकोर्टाक ग्राह्य धरतले, तोय दाखल करचो अशें तांणी म्हणलें.

८ डिसेंबराक अलाहाबाद उच्च न्यायालयान सुनावणी पुराय जाल्या उपरांत निर्णय राखून दवरिल्लो. मुसलमान पक्ष आतां ह्या प्रकरणांत सर्वोच्च न्यायालयांत वचपाक शकता.