भांगरभूंय | प्रतिनिधी
फादर मावजीन आतायदः ‘शणै गोंयबाब : जीवित आनी वावर’ परिसंवादाचो समारोप
भांगरभूंय । प्रतिनिधी
पणजी: शणै गोंयबाब हांणी कोंकणी भाशे सयत कोंकणी लोकां खातीर वावर केलो. हाका लागून ताका कोंकणी गोंयबाब ही उपमा योग्य थारता, अशें फादर मावजीन आतायद हांणी सांगलें. ‘शणै गोंयबाब : जीवित आनी वावर’ ह्या परिसंवादाच्या समारोपांत ते उलयताले. कोंकणी भाशीक संस्थांनी कोंकणी मनशाची अस्मिताय तिगोवन दवरपा खातीर वावर करपाची गरज तांणी उक्तायली.
साहित्य अकादेमीन ‘शणै गोंयबाब : जीवित आनी वावर’ ह्या विशयाचेर दोन दिसांचे परिशदेचें आयोजन केल्लें. आयतारा परिशदेचो समारोप जालो. समारोपाक गोंय कोंकणी अकादेमीची सचीव मेघना शेटगांवकार ह्यो मानादिक सोयऱ्यो म्हूण हाजीर आशिल्ल्यो. कोंकणी अकादेमीचे उपाध्यक्ष वसंत सावंत हे कार्यावळीचे अध्यक्ष आशिल्ले.
देशांत गोंया भायर लेगीत कोंकणी उलोवपी खूब लोक आसात. हाका लागून गोंया भायर लेगीत कोंकणी वाठार आसा. कोंकणी मनशाचें अस्तित्व तिगोवन दवरपा खातीर कोंकणी भाशीक संस्थांनी वावर करपाक जाय, अशें मावजीन आतायद हांणी सांगलें.
साहित्य आनी वावराचेर आदारीत परिसंवाद जाल्ल्यान लेखकाच्या साहित्याची खोलाय कळपाक मजत जाता. एकाच लेखकाच्या साहित्याचेर खूबशे परिसंवाद जावपाक जाय. कोंकणी अकादेमीच्यो साहित्या खातीर खूब येवजण्यो आसात. ह्या येवजण्यांचो लाव तरणाट्यांनी घेवपाक जाय, अशें कोंकणी अकादेमीच्यो सचीव मेघना शेटगांवकार हांणी सांगलें.
शणै गोंयबाब हांचे विचार उंचेल्या दर्जाचे आसले. तांचे विचार आयचे पिळगेन आचरणांत हाडपाची गरज आसा, अशें कोंकणी अकादेमीचे उपाध्यक्ष वसंत सावंत हांणी सांगलें. अंजू साखरदांडे हांणी सुत्रसंचालन केलें. दुसऱ्या दिसाच्या परिसंवादांत डॉ. पूर्णानंद च्यारी हांणी वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
