भांगरभूंय | प्रतिनिधी
-खासदार फ्रान्सीस सार्दीन हांची केंंद्रीय विदेश मंंत्र्यांं कडेन चर्चा
पणजी : भारतीय नागरिकत्व आनी पासपोर्ट कायदो हांचो अभ्यास करून नेमांत दुरुस्ती करपाचो विचार केंंद्रीय विदेश मंंत्री एस जयशंकर हांंणी उलोवन दाखयला. केंंद्रीय विदेश मंंत्रालया कडेन निवेदन दिवपा सयत पासपोर्ट प्रस्नाचेर केंंद्रीय मंंत्री एस. जयशंंकर हांंचे कडेन हांंवेन चर्चा केल्या, अशें खासदार फ्रान्सीस सार्दीन हांंणी सांंगलें.
विदेशांत जल्माची नोंद जाले उपरांत भारतीय नागरिकत्व रद्द करपाची तजवीज कायद्यांत आसा. नागरिकत्व रद्द जाले उपरांत पासपोर्ट रद्द जाता. हाचो फटको बऱ्याच गोंयकारांक बसला. नागरिकत्व आनी पासपोर्ट कायदो तशेंच नेमांंचो पयलीं अभ्यास जावपाक जाय. खंयच्या नेमाक लागून पासपोर्ट रद्द जाता, ताचो सोद घेवन ती दुरूस्ती करपाची गरज आसा. कायदेतज्ञांं वरवीं अभ्यास करून पयलीं उपाय सोदचो पडटलो. उपरांत गरज पडल्यार नेमांत दुरुस्ती करपाची तयारी केंंद्रीय मंंत्र्यांंनी दाखयल्या.
दक्षीण गोंयचे खासदार फ्रान्सीस सार्दीन हांंकां शुक्रारा लोकसभेत पासपोर्ट रद्द जावपाच्या प्रस्नाक लेखी जाप मेळ्ळी.
लेखी जाप मेळचे पयलीं खासदार सार्दीन हांंणी केंंद्रीय विदेश मंंत्री एस. जयशंंकर हांंचे कडेन निवेदन भेटोवन चर्चा केल्या. खासदार सार्दीन हांंणी ही म्हायती दिली. हाचे पयलीं केंंद्रीय गृहमंंत्री अमीत शाह हांकां हांंवेन निवेदन भेटयलें. ह्या निवेदनाचेर जाप मेळूंक ना, अशें सार्दीन हांंणी सांंगलें.
फाटल्या 3 वर्सांत 114 गोंयकारांंचे पासपोर्ट रद्द जाल्यात. गोंयांंत पुर्तुगेज राजवट आशिल्ली. 1961 वर्सा पयलीं जांचो जल्म जाला, तांची जल्म नोंदणी पुर्तगालांत जाल्या. ही फाटभूंय विचारांत घेवन ह्या प्रस्ना कडेन पळोवचे पडटले. केंंद्रीय विदेश मंंत्री एस. जयशंकर हांंचे कडेन पुराय चर्चा केल्ल्याचे तांंणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
