भांगरभूंय | प्रतिनिधी
– देशभरांत 3,917.52 कील भांगराच्या तस्करीचो यत्न
-राज्यसभेंत केंद्रीय वित्त राज्यमंत्री पंकज चौधरी हांची म्हायती
पणजीः फाटल्या चार वर्सांत गोंयांत भांगर तस्करीच्यो वट्ट 53 घडणुको घडल्याे. तातूंत सुमार 50 कील भांगराची तस्करी जाल्या. केंद्रीय वित्त राज्यमंत्री पंकज चौधरी हांणी राज्यसभेंतल्या लेखी प्रस्नाक दिल्ले जापेंतल्यान ही म्हायती मेळ्ळ्या.
गोंयांतल्या दाबाेळी विमानतळाचेर दरवर्सा भांगर तस्करीच्या जायत्या घडणुकांची नोंद जाता. विदेशांतल्यान येवपी विमान प्रवाशी वेगवेगळ्या साहित्यांत लिपोवन भांगराची तस्करी करपाचो यत्न करतात. तशेंच रेल्वे प्रवाशा कडल्यानूय भांगरा तस्करीचो यत्न जाता. ताका लागून कस्टम आनी महसूल गुप्तचर विभागाचे अधिकारी विमानतळ, रेल्वे स्टेशनाचेर नदर दवरून गुप्तचरां कडल्यान म्हायती मेळ्ळे उपरांत भांगराची तस्करी करप्यांचेर कारवाय करतात. देशभरांत ह्याच माध्यमांतल्यान भांगराची तस्करी जाता. फाटल्या कांय वर्सांत अशा प्रकरणांनी वाड जाल्या, अशें मंत्री चौधरी हांणी जापेंत नमूद केलां.
मजगतीं, देशभरांत 2020 ते ऑक्टोबर 2023 ह्या काळांत भांगरा तस्करीच्यो 4,798 घडणुको घडल्यो. तातूंत 3,917.52 कील भांगरा तस्करीचो यत्न जालो, अशेंय चौधरी हांणी जापेंत नमूद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
