भांगरभूंय | प्रतिनिधी
-डॉ. माथवराज हांकां पर्रीकार युवा वैज्ञानीक पुरस्कार भेटयलो
पणजी : उदरगती खातीर गोंयांत विज्ञानीक संस्कृती तयार करपाचे यत्न सुरू आसात. पर्रीकार विज्ञान महोत्सवा सारक्यो कार्यावळी विद्यार्थ्यां मदीं वैज्ञानीक दिश्टीकोण तयार जावपाक पुरक थारतात, असो संदेश मुख्यमंत्री डॉ. प्रमोद सावंत हांणी दिलो.
आदले मुख्यमंत्री सर्गेस्त मनोहर पर्रीकार हांचे जल्म दीसा निमतान बुधवारा दर वर्सा प्रमाण मनोहर पर्रीकार विज्ञान महोत्सव जालो. उक्तावणाचे कार्यावळीक मुख्यमंत्री डॉ. प्रमोद सावंत हाजीर नाशिल्ले. तरी तांच्या व्हर्च्युअल संदेशाचे वाचन महोत्सवांत जालें. भलायकी मंत्री विश्वजीत राणे, एनआयओचे संचालक डॉ. सुनील कुमार सिंग, इस्रोचे अध्यक्ष डॉ. श्रीधर सोमनाथ हांची भाशणां जालीं. इस्रोचे वैज्ञानीक डॉ. माथवराज एस. हांकां पयलो मनोहर पर्रीकार युवा वैज्ञानीक पुरस्कार भेटयलो. चांद्रयान मोहिमेक दिल्ल्या योगदाना खातीर तांकां हो पुरस्कार फावो जालो.
विज्ञान, तंत्रज्ञान आनी नवनिर्मिती हांची पर्रीकार हांकां खासा आवड आशिल्ली. विद्यार्थ्यां मदीं वैज्ञानीक दिश्टीकोण तयार जावपा सयत राज्यांत विज्ञानीक संस्कृती तयार जावची हो विज्ञान महोत्सवा फाटलो हेत आसा. हाचे खातीर नामनेचे 19 वैज्ञानीक कार्यावळींत विद्यार्थ्यां मदीं संवाद सादतले, अशें मुख्यमंत्री डॉ. प्रमोद सावंत हांणी संदेशांत सांगलें.
राज्याचे धोरण थारावपा खातीर मंत्री तशेंच राजकारण्यांक वैज्ञानीक तशेंच तज्ञांच्या सल्ल्याची गरज आसा. तज्ञांचो सल्लो आनी तंत्रज्ञानाच्या आदारान राज्याची उदरगत शक्य आसा, अशें भलायकी मंत्री विश्वजीत राणे हांणी सांगलें. तरणाटे हो आमचो फुडार आसा. तरणाट्यांक विज्ञान तशेंच तंत्रज्ञानाचे शिक्षण घेवपा खातीर उर्बा मेळपाक जाय. हाचे खातीर वैज्ञानिकांचे मार्गदर्शन तशेंच तांचे अणभव विद्यार्थ्यांक कळपाक जाय, अशें विश्वजीत राणे हांणी सांगलें.
इस्रोचे अध्यक्ष डॉ. श्रीधर सोमनाथ हांचे ह्या वेळार भाशण जाले. इस्रोन फाटल्या 60 वर्सांच्या कार्यकाळांत चांद्रयान मोहिमे सयत बऱ्योच मोहिमो येसस्वी केल्याे. उपगिरे (सॅटलायट) तशेंच रॉकेट तयार करपाचें तंत्रज्ञान आतां देशांत तयार जाता. यंत्रा मदीं बुद्दिमत्ता (इंटेलिजन्स इन मशिन्स) तयार करपाचे यत्न सध्या सुरू आसात. रॉकेट लॉचींग अपेशी थारता, जाल्यार तशे संकेत कांय खीणा पयलीं मेळप शक्य जातले. इस्रोच्या फुडल्या वाटचाली विशींची म्हायती तांणी दिली.
वैज्ञानीक डॉ. अनिल काकोडकार आनी एनआयओचे संचालक डॉ. सुनीलकुमार सिंग हांची उलोवपा जाली.
मनाेहर पर्रीकार विज्ञान महोत्सवाच्या कार्यावळीचे फेसबुक तशेंच यू ट्युबा वरवी विद्यालयां तशेंच उच्च माध्यमीक विद्यालयांनी प्रसारण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
