भांगरभूंय | प्रतिनिधी
रातच्या 10 मेरेन संगीत वाजोपाची मेकळीक
भांगरभूंय । प्रतिनिधी
पणजी: सनबर्न महोत्सव अंदूं 28 ते 30 डिसेंबर ह्या काळांत जातलो. सनबर्नाक रातच्या 10 मेरेन संगीत वाजोपाक मेळटले. सनबर्न आयोजकांच्या तालाचेर सरकार नाचचो ना. नेम पाळून सनबर्न महोत्सवाचें आयोजन करचें पडटलें, अशें पर्यटन मंत्री रोहन खंवटे हांणी सांगलें.
फुडल्या वर्साच्यान सनबर्न न्हय जाल्यार हेर महोत्सव लेगीत जावप शक्य आसा. जानेवारीच्यानन महोत्सवाच्या परवान्या खातीर अर्ज करचे पडटले. कायद्या प्रमाण सरकार मान्यताय दितलो. सनबर्न महोत्सवाक हंगामी तत्वाचेर परवानो दिला. कोमुनिदादीच्या जाग्या सयत तांकां हेर खात्या कडल्यान परवाने घेवचे पडटले. सनबर्न आयोजकां कडल्यान पर्यटन खात्याची कसलीच थकबाकी ना. हाका लागून तांकां हंगामी परवानो दिला. आयोजकांनी रातच्या 12 वरां मेरेन संगीत वाजोपाची मेकळीक मागिल्ली. नेमा प्रमाण रातच्या 10 वरां मेरेन संगीत वाजोपाची मेकळीक सनबर्नाक मेळटली, अशें पर्यटन मंत्री रोहन खंवटे हांणी स्पश्ट केलें.
सनबर्न आयोजकांनी 28 ते 31 डिसेंबर मेरेन महोत्सवा खातीर अर्ज केल्लो. 31 डिसेंबराक हेर हॉटेलांनी कार्यावळी जातात. शॅकांनी पार्ट्यो जातात. तांकां वेवसाय जावपा खातीर 31 डिसेंबराक सनबर्न महोत्सवाक परवानो दिवंक ना, अशें पर्यटन मंत्री रोहन खंवटे हांणी सांगलें. पेडण्यां सनबर्न आयोजीत करपाचो प्रस्ताव आसलो. थळाव्यांच्या विरोधाक लागून तांणी हो प्रस्ताव रद्द केलो. पर्यटन खात्याच्या उंचेल्या पावंड्या वयले समितीची बसका जाली. आध्यात्मीक तशेंच होम स्टे धोरणाचे मसुदे सरकाराक सादर केल्यात. सरकाराचे मान्यताये उपरांत हे मसुदे सुचोवणे खातीर उक्ते जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
