भांगरभूंय | प्रतिनिधी
मुख्यमंत्री डॉ. प्रमोद सावंतः गोमांतक पुस्तकाचें लोकार्पण
भांगरभूंय । प्रतिनिधी
पणजी: विनायक दामोदर सावरकर हांचें जीवीत आनी कार्य समजून घेवपा खातीर अंदमानाक भेट दिवपाची गरज आसा. अंदमानांत सावरकराच्या जिविताचेर आदारीत लायट शो पळयल्या उपरांतूच तांचे विचार कळपाक मजत जातली, अशें मुख्यमंत्री डॉ. प्रमोद सावंत हांणी सांगलें.
विनायक दामोदर सावरकर हांणी बरयिल्ल्या गोमांतक ह्या महाकाव्याचें प्रा. भूषण भावे हांणी केल्ल्या कोंकणी गद्य रुपकाराचें लोकार्पण जालें. ह्या वेळार मुख्यमंत्री डॉ. सावंत उलयताले. कार्यावळीक आदले खासदार अॅड. नरेंद्र सावयकार, लेखक प्रा. भूषण भावे, फावंडेशन पुणेचे केदार वाळींबे हाजीर आशिल्ले.
इतिहासाचेर भाश्य केलें जाल्यार नवो वाद जावपाची शक्यताय आसता. हाका लागून आपूण इतिहासाचेर चड उलय ना. तरी लेगीत खरो इतिहास लोकां मेरेन पावपाक जाय. खरो इतिहास लोकां मेरेन पावोपाचें कार्य लेखक करपाक शकता. वि. दा. सावरकार हांचें नांव घेतलें की राष्ट्रवाद मुखार येता. आपूण राष्ट्रवाद काळजांत घेवन भोंवता. आपणे अंदमानाक भेट दिली आनी लायट शो पळयल्या उपरांत सावरकर हांचे विचार आनी जिवीत कळळें. सामान्य मनशाक सावरकर कळपाक जाय जाल्यार तांणी अंदमानाक भेट दिवची. अंदमानाक भेट दिवन तांचें साहित्य, काव्य कानार पडले उपरांत मन तृप्त जाता, अशें मुख्यमंत्री डॉ. प्रमोद सावंत हांणी सांगलें.
गोंयाचेर 450 वर्सां पोर्तुगीजांची राजवट आसली. पोर्तुगीज राजवटी पयलीं कदंबा, आदिलशहाची राजवट आशिल्ली. ह्या राजवटींचो इतिहास लोकां मुखार येवपाची गरज आसा. तशेंच 1947 ते 1961 ह्या काळांतलो इतिहास लेगीत योग्य तरेन लोकां मेरेन पावपाक जाय, अशें मुख्यमंत्री डॉ. सावंत हांणी सांगलें. राष्ट्रभक्ती, हिंदुत्ववाद हांचो विपर्यास करून खूब जाण वाद निर्माण करतात. सावरकर हांचो हिंदुत्ववाद तशेंच राष्ट्रभक्ती विशीं लेगीत वाद निर्माण करतात. तांच्या कार्याचें योग्य तरेन विश्लेशण जावप गरजेचें आसा, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
