भांगरभूंय | प्रतिनिधी
जातलीं 7- 8 वर्सां. बायलांचो एक सर्वे आयिल्लो. तातूंत घोव मारता ताचें कांय दिसना. ताचो हक्कूच तो, अशीं विधानां कांय बायलांनी केल्लीं. हातूंत सुशिक्षीत बायलोय आशिल्ल्यो. हाचे वयल्यान आमच्या भारतीय बायलांची मानसिकताय लक्षांत येता. मात, दुसरे वटेन सगल्यां आड बंड करून स्वबळाचेर उदरगतीच्या तेंमकार पाविल्ल्यो शेंकड्यांनी बायलो आसात. आयज अशें खंयचेंच मळ ना, जंय बायल ना. कांय कडेन तर ती दादल्यां परस चार पावलां मुखारूच आसा. इतलेंय आसलें तरी आमचे कडेन अजून पुरुशप्रधान संस्कृताय आसा आनी तीं संद मेळटा तेन्ना बायलांचेर शेक गाजयता, तांकां दुय्यम स्थान दिता. गोंय, गोंयकार सुदारल्यात, ताका लागून हांगा हो भेदभाव तितलोसो जाणवना. मात, देशांतल्या कांय राज्यांनी, खास करून खेडेगांवांनी बायलेक आयजूय कुस्कुटा समान वागणूक मेळटा. आतां कांय बायलो जागृत जाल्यात. थोडे दादलेय फुडाकार घेवन अत्याचार पिडेस्त बायलांक पुलीस कागाळ करपाक सांगतात. मुखार ती केश न्यायालयांत पावता. पूण …..
…… पूण ह्या अत्याचार प्रकरणांत बायलांक न्याय मेळटा म्हणसर कावळे पसून म्हातारे जातात आसतले. हेर कडल्यो देखी नाकात, आमच्या सुपुल्ल्या गोंयांतूच 1 जानेवारी ते 31 डिसेंबर 2022 मेरेन सगल्या न्यायालयांनी मेळून 92.4 टक्के खटले आडकून उरल्यात. पुलिसां कडलीं 26.1 टक्के प्रकरणां कपाटांतले फायलींत पडून आसात. बायलां वयल्या अत्याचाराचे 273 गुन्यांव. हातूंत 73 बलात्काराचे. राष्ट्रीय गुन्यांव नोंद विभागान (एनसीआरबी) हे आंकडे दिल्यात. अर्थांत ह्यो सगल्यो केशी फक्त पुलिशेंत नोंद जाल्ल्यो आनी मुखार न्यायालयांत पाविल्ल्यो. नोंदूच जावंक नाशिल्ल्यो कितल्योशोच आसतल्यो!! 2022 त 1961 केशींची सुनावणी जाली. 16 प्रकरणांत आरोपींक ख्यास्त जाली. 103 केशींतले दुबावीत पुरावो नाशिल्ल्यान सुटले. 1811 केशी (92.4 टक्के) अजून न्यायालयांत आसात. बलात्काराच्या 73 गुन्यांवां मदल्या 55 त अठरा वर्सां सकयल्या चलयांचेर अत्याचार जाल्यात. 73 मदल्या 68 गुन्यांवांनी दुबावीत पिडेस्त बायलेचे वळखीचो आसा.
न्यायालयांनी केशी वर्सांचीं वर्सां चलतात. कारण न्यायाधिशां पसून कर्मचाऱ्यां मेरेन खूबशे जागे रिकामी आसात. थंय नेमणूक जावंक ना. देशभरांत सादारण पांच कोटीं वयर केशी प्रलंबीत आसात. म्हत्वाचीं न्यायालयां आॅनलायन जोडपाची प्रक्रिया फाटीं सुरू आशिल्ली. ती जाल्या थंय केशी दुसऱ्या न्यायालयांत वर्ग करप सोंपें जाता. न्यायालयाक मदीं व्हडली सुटीय आसता. वकिलांचो अदीमदीं संप आसता…. आनी सगल्यांत म्हत्वाचें म्हणल्यार न्यायालयांत येवपी केशींचो आंकडो प्रमाणा भायर वाडला. गुन्यांव, अन्याया आड केशी येतात, ताका कोण हरकत घेवंक शकना. पूण कसल्योय केशी घेवन न्यायालयाच्या दारार मारल्यार तांचो मोलादीक वेळ फुकट वता. फाटीं गरज नासतना याचिका दाखल केल्ले खातीर याचिकादारांक दंड पसून घाला. केशी बेगीन सोंपयतले जाल्यार शक्य तितले बेगीन न्यायाधिशांचो आंकडो वाडूंक जाय. केंद्र सरकारान राज्य सरकारांच्या पालवान झुजा पांवड्याचेर हे खातीर यत्न करप, ही आतां काळाची गरज जाल्या.
महिला आयोगान तांचे कडेन येवपी कागाळी बेगीन हाता मेकळ्यो करून अत्याचार, अन्याय उणे कशे जातले, हाचेरूय विचार करूंक जाय. बायलो जितल्यो दादल्यांच्या खांदाक खांद लावन वावुरतात, तितलो तांचे आडचो दुस्वास वाडपाक लागला. अर्थीक नदरेन स्वावलंबी आशिल्ली बायल घोवान दाखयिल्ल्या चुट्ट्यांच्या सोरपाक भियेना. ताणें खरेंच अत्याचार केले जाल्यार ती पुलिशेंत वता. मात सगल्यांकूच हें शक्य जायना. खास करून गांवांतल्या बायलांक. ती स्वताच्या पांयांचेर उबी नासल्यार तिका अन्याया आड आवाज काडपाचें धाडस जायना. गुन्यांवकार भायलेय आसतात. ते आपल्याक जाय तेंच करतात. वेळ आयल्यार बायलेक, चलयांक जिवेशीं मारून उडयतात. तांकां राजकी आलाशिरो दितना फुडाऱ्यांनी धा फावटी विचार करपाक जाय. गोंयांतल्यान राष्ट्रीय बायलां आयोगा कडेन 2018 ते 2023 ह्या काळांत 158 कागाळी आयल्यो. तातूंतल्या 115 चेर आयोगान कारवाय केल्या, अशी म्हायती मंत्री स्मृती इराणी हांणी संसदेंत दिल्या. चार कागाळींचेर तर स्वता जावन. म्हणजे दोशींक ख्यास्त जाल्या आसतली. ह्याच काळांत गोंयांतल्या राष्ट्रीय बाल हक्क संरक्षण आयोगा कडेनूय 95 कागाळी आयल्यो. त्या सगल्यांची आयोगान दखल घेतल्या.
अत्याचारांक लागून बायलांचे बळी वतात. मानसीक परिणाम जातात. घटस्फोट, आत्महत्याय जातात. बायलांक आमी देवी म्हूण पुजतात. त्याच भारतांत भारतीयां कडल्यान बायलांचेर अत्याचार जावप, हें आमकां सोबता व्हय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
