भांगरभूंय | प्रतिनिधी
-बांदकाम खातें करतले इमारतींचे ऑडीट
– खात्याच्या 60 अभियंत्यांक दिलें प्रशिक्षण
पणजी : गोंयांतल्या सरकारी इमारतींनी दिव्यांगा खातीर गरजेच्यो साधनसुविधा नाशिल्ल्यान दिव्यांग हक्क संघटणा (ड्रॅग) आक्रमक जाले उपरांत आतां सरकारान सगल्याच इमारतींनी गरजेच्यो त्यो सुविधा उबारपाची प्रक्रिया सुरू केल्या. ते खातीर बांदकाम खात्याची नोडल एजन्सी म्हूण नेमणूक केल्या. बांदकाम खात्या वरवीं सगल्याच सरकारी इमारतींच्या अॉडिटाचें काम बेगिनूच हातांत घेतले.
दिव्यांग नागरिकांक विवीध कामां खातीर सरकारी कार्यालयांत वच्चे पडटा. पूण भोवतेक सरकारी कार्यालयांनी तांचे खातीर गरजेचें रॅम्प, पार्कींग तशेंच हेर सुविधांची वेवस्था ना. ताचो त्रास तांकां सोंसचो पडटा. ‘ड्रॅग’चे अध्यक्ष आवेलिना डिसा हांणी हो मुद्दो ताणून धरले उपरांत आतां सरकारान सगल्याच सरकारी इमारतींचें ऑडीट करून थंय दिव्यांगा खातीर गरजेच्यो सुविधा उबारपाची प्रक्रिया सुरू केल्या. समाज कल्याण खात्यान ह्या कामा खातीर बांदकाम खात्याची नोडल एजन्सी म्हूण नेमणूक केल्या.
पुणेंतल्या भारती विद्यापीठ कॉलेज ऑफ आर्किटेक्चरच्यो प्राचार्य डॉ. कविता मुरगकर हांणी हे विशीं
बांदकाम खात्यांतल्या 60 अभियंत्यांक प्रशिक्षण दिलां. ते प्रमाण बांदकाम खात्याचे अभियंते पयलीं सगल्याच इमारतींचें ऑडीट करतले. ते उपरांत थंय दिव्यांगा खातीर लागपी सगल्या सुविधांचो अभ्यास करून ते विशींचो अहवाल सरकाराक सादर करतले. इमारतींच्या ऑडिटाचें काम सुमार तीन म्हयने सुरू उरतले. उपरांत साधनसुविधा उबारपाक सुरवात करतले, अशी म्हायती समाज कल्याण खात्याचे संचालक अजीत पंचवाडकार हांणी बुधवारा आमच्या प्रतिनिधी कडेन उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
