भांगरभूंय | प्रतिनिधी
पणजी : काँग्रेसीच्या आठ फुटीर आमदारां विरोधांत आदले प्रदेशाध्यक्ष गिरीश चोडणकार हांणी दाखल केल्ल्या याचिकेचेर 4 डिसेंबराक सर्वोच्च न्यायालयांत सुनावणी जातली.
सर्वोच्च न्यायालयांत फाटले खेपे जाल्ले सुनावणेंत फुटीर आठूय आमदारा सयत सभापती रमेश तवडकार हांकां डिसेंबराच्या पयल्या सप्तका मेरेन म्हणणें मांडपाचे निर्देश न्यायालयान दिल्लें.
राज्य विधानसभा वेंचणूक जाले उपरांत स म्हयन्यांनी 14 सप्टेंबर 2022 दिसा काँग्रेसीच्या उमेदवारीचेर वेंचून अायिल्ले तेन्नाचे विरोधी पक्षफुडारी मायकल लोबो हांचे सयत दिगंबर कामत, आलेक्स सिक्वेरा, संकल्प आमोणकार, डिलायला लोबो. केदार नायक, राजेश फळदेसाय आनी रुडॉल्फ फर्नांडीस ह्या आठ आमदारांनी भाजपांत प्रवेश केलो. तांचे विरोधांत गिरीश चोडणकार हांणी 11 नोव्हेंबर 2022 दिसा सभापतीं कडेन अपात्रता याचिका दाखल केल्ली. जायते म्हयने सभापतींनी ह्या याचिकेचेर सुनावणी घेवंक नाशिल्ल्यान चोडणकार हांणी उच्च न्यायालयांत धांव घेवन सभापतींक अपात्रता याचिके वयल्यो सुनावण्यो बेगीन घेवपाचे निर्देश जारी करपाची मागणी केल्ली. पूण, सुनावण्या उपरांत उच्च न्यायालयान स्पश्ट आदेश दिनासतना चोडणकार हांची याचिका निकालांत काडिल्ली. सर्वोच्च न्यायालयान दिल्ल्या निवाड्याचो संदर्भ दिवन सभापतीपद हे लवाद आशिल्ल्यान न्यायालय तातूंत हस्तक्षेप करपाक शकना, अशें निरिक्षण उच्च न्यायालयान नोंदयले. ताका लागून चोडणकार हांणी हाचे विरोधांत सर्वोच्च न्यायालयांत धांव घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
