भांगरभूंय | प्रतिनिधी
इकॉनॉमीक टायम्स अँड टुरिझम वर्सुकीं परिशद
पणजीः नवी दिल्लींत आयोजीत इकॉनॉमीक टायम्स-ट्रव्हल अँण्ड टुरिझमाचे वर्सुकीं परिशदेंत गोंयाक सर्वोत्कृश्ठ पर्यटन राज्याचो पुरस्कार फावो जाला. गोंय दर्यादेगांचे नंदनवन म्हूण फामाद आसा. अंदूं वर्सा गोंयान दोन प्रतिश्ठीत पुरस्कार जिखून जागतीक पर्यटन मळार नामनां मेळयल्या.
‘टुरिझम स्टेट ऑफ द इयर’ पुरस्कारान गोंयाक भोवमानीत करप ही पर्यटन क्षेत्रांतल्या उत्कृश्ठताये खातीर राज्याच्या अटल बांदिलकेची निश्चीत पावती आसा. फाटल्या कांय वर्सांत गोंयान शाश्वत पर्यटनाक चालना दिवपाक, सांस्कृतीक दायज जतन करपाक आनी जगभरांतल्या पर्यटकांक अतुलनीय अणभव दिवपाक सातत्यान उत्कृश्ठ कामगिरी केल्या.
पर्यटन मंत्री रोहन खंवटे हांणी म्हणलें, हे पुरस्कार गोंयाक एक उत्कृश्ठ पर्यटन थळ करपाच्या आमच्या सामुहीक यत्नांचे प्रतिबिंब आसा. वर्सांतलो सर्वोत्तम पर्यटन राज्य आनी सर्वोत्कृश्ठ फेस्टिवल राज्य म्हूण भोवमान केल्ल्याचो आमकां अभिमान आसा.
‘बेस्ट फेअर्स अँड फेस्टिव्हल स्टेट’ चे स्रय गोंयच्या नव्या वर्साचे उत्सव कार्नावाल, हेरिटेज इव्हेंट पसून ते ख्रिसमसाक वता. ह्यो कार्यावळी पळोवपाक दरवर्सां देगांतर्गत आनी आंतरराष्ट्रीय पर्यटक मोट्या प्रमाणांत गोंयांत येतात.
गोंयचो इतिहास आनी संस्कृतीचो इतिहास आसपवी नवराती, दिवाळी, नरकासूर पुतळ्याची सर्त आनी चिखल कालो सारक्या परंपरीक कार्यावळींचे मूल्यमापन प्रक्रियेंत म्हत्वाची भुमिका आसा.
छत्रपती शिवाजी महाराजांचे 350 वो राज्याभिषेक वर्स मनोवप हो गोंयचो इतिहास आनी दायज सांबाळून दवरपाच्या समर्पणाचे प्रतीक आसा. फेब्रुवारी 2024 त शिवजयंती उत्सवाच्या नदरेन राज्यभरांतल्या पणजी, मडगांव, म्हापशें, फोंडें, वास्को आनी दिवचल ह्या शारांनी उत्सव आयोजीत करपाची येवजण आंखल्या.
तशेंच नव्या वर्साच्या सुरवातीक ‘नोमोझो’ मनयतले. फेब्रुवारींत कार्नावाल आनी एप्रीलांत वीरभद्र महोत्सव, शिगमो उत्सव मनयतले. लोक होळयेच्या सणाचो रंग आनी नृत्याची खोस घेतात. राज्यांत शिगमो उत्सवा मजगतीं लोकप्रीय अाशिल्ल्या वीरभद्र धर्मीक नृत्याचो एक प्रकार जगभरांतल्या पर्यटकांक अाकर्शीत करता.
दोन प्रतिश्ठीत पुरस्कारान भोवमानीत केल्ल्यान गोंयची सांस्कृतीक समृद्धता, सैमीक वैभव आनी आदरातिथ्य हांणी पर्यटकांक वेगळोच अणभव मेळिल्ल्यान पर्यटनाची उंचाय वाडयता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
