भांगरभूंय | प्रतिनिधी
-अतिक्रमण केल्ल्या बांदकामांचेर कारवाय चालूच उरतलीः म्हाड्डोळकार
वास्कोः सांकवाळ कोमुनिदादच्या जागेचेर अतिक्रमण करून बांदिल्लीं सगलीं बांदकामां काल सांजे मेरेन पुराय मातयेभरवण केली. कोमुनिदादच्या जमनीचेर अतिक्रमण केल्ली बांदकामां मोडपाचें काम मुखारूय चालूच उरतले अशें कोमुनिदादचे अध्यक्ष प्रताप म्हाड्डोळकार हांणी सांगलें.
मजगतीं, बांदकामां मोडपा पयलीं आमकां कसलीच पूर्वसुचोवणी दिवंक ना. ताका लागून आतां आमी खंय वच्चे असो प्रस्न कांय जाणांनी केला.
सांकवाळ कोमुनिदादचे जमनीर सुमार दोन वर्सां पयलीं अतिक्रमणां करून कांय जाणांनी बांदकामां केल्ली. ती बांदकामां मोडपाचो यत्न सांकवाळ कोमुनिदादीन केल्लो. पूण जांणी अतिक्रमणां केल्ली, तातूंतल्या कांय जाणांनी कोमुनिदादच्या पदाधिकाऱ्यांक धमकी दिवपाचे प्रकार केल्ले. ह्या प्रकरणांत सरकारी यंत्रणा आनी पुलिसां कडेन कागाळ करुनूय कितेंच जाले ना. ताका लागून कोमुनिदादीचे अॅटर्नी जयेश फडते हांणी न्यायालयांत धांव घेतली. ते उपरांत पंचायत उपसंचालक, मुरगांव नियोजन आनी विकास प्राधिकरण हांकां सदर अतिक्रमणां विशीं अहवाल सादर करपाचे निर्देश न्यायालयान दिल्ले.
त्या अहवाला उपरांत सदर बांदकामां मोडपा खातीर संबंदींत यंत्रणेन यत्न सुरू केल्ले. ते प्रमाण बुधवारा 18 बांदकामां मोडिल्ली. दुसरे दिसा उरिल्लीं बांदकामां मोडपाच्या कामाक नेट दिवन तशेंच पांच जेसीबीचो वापर करून मोडली. ही बांदकामां मातयेभरवण करतना कोणाचोच विरोध जावचो न्हय, हे खातीर मोट्या प्रमाणांत पुलीस बंदोबस्त दवरिल्लो.
सांकवाळ कामुनिदादचे अध्यक्ष प्रताप म्हाड्डोळकार, जयेश फडते आनी हेर पदाधिकारी ह्या वेळार हाजीर आशिल्ले. मुरगांव मामलेदार कार्यालयांतले कर्मचारीय कामाचेर नदर दवरून आशिल्ले. अतिक्रमण केल्लीं बांदकामां मोडिल्ल्यान सगले कडेन चिरे, माती, पत्रे, सिमेंट क्राँक्रीट, फातर, वाशे, लोखंडी सळयो हांचो खच पडिल्लो. हे ढिगारे काडपाक सांकवाळ कोमुनिदादीक धांवपळ करची पडटली, अशें म्हाड्डोळकार हांणी सांगलें.
आपलीं बांदकामां मोडची न्हय, हे खातीर संबंदितां मदीं कांय जाणांनी राजकारणी व्यक्तीची मजत घेवपाचो यत्न केलो, पूण तांकां येस आयलें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
