भांगरभूंय | प्रतिनिधी
भोवतेक गोंयकार एकाच कुटुंबांत रावताले. मात, लग्न जातकच बऱ्याच जाणांनी स्वताचीं वेगळीं घरां घेतलीं. एकठांय रावतकच घरांत आयदनाक आयदन लागता. वाद जातात. ताका लागून हातांत पयसो येतकच गोंयकार कुटुंबां वेगळीं जालीं. एका काळार दिसता तो जमीन घेवन घर बांदतालो. मागीर फ्लॅट घेवपाचें ल्हार आयलें. आतांय जमीन, फ्लॅट घेवप वाडलां, पूण ते रावपाक न्हय, तर अर्थीक गुंतवणुकी खातीर! एक फ्लॅट वा बंगलो आशिल्लेय गुंतवणूक करपाक लागल्यात. 2021-22 आनी 2022- 23 ह्या काळांत 44 हजारां परस चड नोंदणीं सरकारा कडेन जाल्यात. तातूंतल्यो चडश्यो वैयक्तीक मालमत्ता. 2021- 22 त 20 हजारां वयर नोंदी जाल्यात. तातूंतल्यो 18 हजार वैयक्तीक घरां, जमनींच्यो आसात. 2022- 23 वर्सा 24 हजार नोंदणीं जाल्यो. तातूंतल्यो 20 हजार वैयक्तीक घरां, जमनींच्यो. मात, ह्या नव भाटकारां मदीं भोवतेक परप्रांतीय आसात आनी गोंय, गोंयकार, गोंयकारपणाचो गजर घालपी गोंयकारांक हो ट्रेंड फुडाराक मारक थारूं येता.
भारत म्हजो देस. सगले भारतीय म्हजे भाव…. गजाल खरी. कोणाकूय खंयूय वचून रावपाक, नोकरी, वेवसाय करपाक मेळटा. पूण त्या- त्या राज्यांत थळाव्या भुंयपुतांचेर अन्याय जावंक फावना. आमच्या गोंयांत अशेंच कांयशें चालू आसा. गोंयकारांनी कामां सोडल्यांत तीं करपाक भायले आयले. आमी कामां कित्याक सोडलीं? कारण कुटुंबां ल्हान जालीं. आमी शिकले. बऱ्यो नोकऱ्यो करपाक लागले. भायल्यान येवन गोंयांत स्थायिक जाल्ल्यांच्या भुरग्यांक सरकारी नोकऱ्यो मेळ्ळ्यो. कांय जाणांक तर गोंयांत येवन 15 वर्सां जावचे पयलींच. बाजार पुराय परप्रांतीयांच्या हातांत गेला. आतां हीं मालमत्ता प्रकरणां. गोंया भायल्या लोकांनी हांगा जमनी, फ्लॅट घेवपाची सर्तूच सुरू केल्या, अशें दिसून आयलां. दर्यादेगांचेर सेकंड होम, हेर कडेन भाटां, जमनी घेवपी चडशे भायले. कोणूय हांगा आयलो आनी भास, खाण, मानसिकताय… सगलेच बाबतींत नीज गोंयकार जालो, जाल्यार हरकत ना. पूण, वर्साचीं वर्सां गोंयांत काडूनय कांय जाण जुंवीं करून रावतना जाणवता. वयल्यान गोंयकारांक नांवां दवरपाची संद ते वगडायनात. अर्थांत गोंयकारुय तांकां नांवां दवरतात.
नोकरी, धंदो करून वर्साक 3- 4 लाख जोडचे परस घराब्याची जमीन विकून धपक्याक देड कोटी रुपया, वयर फ्लॅट, दुकान मेळटा. ताची रुच बऱ्याच गोंयकारांक लागल्या. दोंगर बोडके जातात, शेतां- भाटांनी काँक्रिटाचीं रानां उबीं जातात तीं हाकाच लागून. सिंधुदुर्ग, रत्नागिरी जिल्ह्यांत भायल्यांक जमनी विकूं नाकात. काजू, आंब्याचें पीक घेयात, असो विचार खूब जावन उक्तायतात. पूण थंयूय थळाव्यांनी जमनी विकल्यो. चडशे मुंबय, गोंयां पावले. वाठाराची उदरगत जावंक ना जाल्यार गांव रिकामी जाता, हाची जाणीव फुडाऱ्यांनी दवरपाक जाय. गुंतवणूक म्हूण जमीन विकत घेवन ती दुपेट, तिपेट मोलान विकपाचेय प्रकार सुरू जाल्यात. तातूंत भलत्याची जमीन भलतोच तिसऱ्याकूच विकपाक लागला. हालींच असले गुन्यांवकार मेळ्ळ्यात. तांची जमीन जप्तूय जाल्या. गोंय आसा वेतभर. मागीर जमीन खंयच्यो उरतल्यो? आतां गांवगिऱ्या वाठारांचेर लँड शार्कांची नदर गेल्या. सध्या सरकार पर्यटनाक लागून गांवगिऱ्या वाठारांचे लक्ष केंद्रीत करपाक लागलां. गांवांनी प्रकल्प येवपाचे आसात. म्हणटकच आपशीच जमनींक दर येतलो. 50 लाखांची जमीन दोन लकण्यो काडून जागो जाता म्हणसर 1 कोटींचेर पावतली. हें मतींत आयिल्ल्या पयशेकारांनी गांवगिऱ्या वाठारांनी घरां, जमनी घेतिल्ल्याचें दिसून आयलां. पयलीं गोंयांत जमीन कोणाक नाका आशिल्ली. पूण 1980 च्या दशकांत जमनीक अचकीत भाव आयलो. दर्यादेग वाठारांत तीन- साडेतीन लाख रुपयांक मेळपी जमनीचें मोल 20 कोटीं वयर पावलां. उदरगत,शाळा, हाॅस्पिटल, रस्तो, उदक, वीज आनी हेर बुन्यादी सुविधा, पर्यटन थळ, शांत, मनमेकळें वातावरण, भावार्थी भौस, देशी-विदेशी संस्कृतीचो मेळ अशा साबार कारणांक लागून लोक गोंयांत येवन स्थायीक जावंक सोदतात. थोड्यांक वर्साचे तीन म्हयने तरी गोंयांत रावपाक जाय. ताका लागून सगल्यांचोच जमीन, घरां, फ्लॅटांचेर दोळो.
सगले गिरेस्त जावंक जाय, ही गजाल खरी. पूण, गोंयकारांनी जमीन विकपाची सर्त सुरू केल्या ती बंद करपाक जाय. नाजाल्यार आमी एक दीस आमचेच मायभुंयेंत परकी जातले!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
