भांगरभूंय | प्रतिनिधी
-कर्नाटका आड आसात वट्ट पांच याचिका
– तंत्रीक, कायदो पंगड आयज दिल्लींत
पणजी : म्हादय प्रस्नाचेर सर्वोच्च न्यायालयांत जावपी सुनावणी खातीर गोंय सरकार पुराय तरेन सज्ज आसा. गोंयची बाजू घटमूट आसा. म्हादयचो खटलो गोंय जिखतलो, असो विस्वास मुख्यमंत्री डॉ. प्रमोद सावंत हांणी उक्तायला. कर्नाटका आड म्हादय विशीं पांच याचिका आसात. ह्या सगळ्या याचिकांचेर एकठांय सुनावणी जावप शक्य आसा, अशें मुख्यमंत्री डॉ. प्रमोद सावंत हांणी सांगलें.
म्हादय प्रस्नाचेर गोंयच्या खासा याचिकेचेर सर्वोच्च न्यायालयांत 29 वा 30 नोव्हेंबराक सुनावणी जातली. सुनावणेच्या वळेरीचेर गोंयच्या खासा याचिकेचो आस्पाव आसा, अशें अॅडव्होकेट जनरल अॅड. देविदास पांगम हांणी सांगलें.
गोंय सरकारान म्हादय लवादाच्या निर्णयाक सर्वोच्च न्यायालयांत आव्हान दिलां. तशेंच कर्नाटकाच्या रानां जीव संरक्षका आड (वायल्ड लायफ वॉर्डन) याचिका आसा. ते भायर स्थगिती आसतना उदक घुंवडावपाच्या यत्ना खातीर अवमान याचिका आसा. सगळ्यो मेळून पांच याचिका सर्वोच्च न्यायालयांत आसात. ह्या याचिकांचेर एकठांय सुनावणी जावप शक्य आसा. कायदेशीर तशेंच तंत्रीक पंगड सुनावणेची तयारी करीत आसा. म्हादय सुनावणे खातीर कायदेशीर तयारी नेटान सुरू आसून सुनावणेक गोंय सज्ज आसा, अशें मुख्यमंत्री डॉ. प्रमोद सावंत हांणी सांगलें.
अभयारण्य वाठारांत उदक घुंवडावपाचेर बंदी आसा. कायद्यान बंदी आसतना लेगीत म्हादयचें उदक कर्नाटकान घुंवडायला, असो दावो गोंय सरकाराचो आसा. हाचे खातीर गोंयच्या राना संरक्षकांनी रानां जीव संरक्षण कायद्याचें कलम 29 खाला कर्नाटकाक नोटीस जारी केल्ली. फाटले सुनावणे वेळार सर्वोच्च न्यायालयांत ह्या मुद्याचेर युक्तिवाद जाल्लो.
म्हादयचें उदक घुंवडावपाचे कर्नाटकाचे यत्न फाटलीं बरीच वर्सां सुरू आसात. म्हादय प्रस्नाचेर उपाय काडपा खातीर केंद्र सरकारान म्हादय लवादाची स्थापणूक केल्या. म्हादय लवादान कर्नाटकाक 13.42 टीएमसी उदक वापरपाची मेकळीक दिल्या. लवादाच्या निवाड्याक गोंय सरकारान आव्हान दिलां. लवादाच्या निवाड्याचेर आदारीत कर्नाटकान कळसा – भांडुरा प्रकल्पाचो आराखडो (डीपीआर) तयार केला. ह्या आराखड्याक केंद्रान मान्यताय दिल्ल्यान गोंयांत आंदोलन जाल्लें. डीपीआर रद्द करपाची मागणी गोंयान केंद्र सरकारा कडेन केल्ली. डीपीआर रद्द करूंक नासलो तरी गरजेचे ते दाखले घेवच्या पयलीं काम सुरू करचें ना, अशी हमी कर्नाटकान सर्वोच्च न्यायालयाक दिल्या.
सुनावणी वळेरीचेर म्हादय खटल्याचो आस्पाव
कायदो तशेंच तंत्रीक फांट्याचो पंगड आयज मंगळारा दिल्ली वतलो. सर्वोच्च न्यायालयाच्या सुनावणेच्या वळेरीचेर बुधवारा आनी बिरेस्तारा म्हादय खटल्याच्या सुनावणेचो आस्पाव जाला. तंत्रीक पंगड तशेंच एडव्होकेटा कडल्यान युक्तिवादाची तयारी सुरू आसा, अशें अॅडव्होकेट जनरल देविदास पांगम हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
