भांगरभूंय | प्रतिनिधी
थंडीचो हंगाम सुरु जााला. जायत्या लोकांक अशें दिसता की थंडीच्या दिसांनी आमच्या कुडीक उदकाची उणी गरज आसता. थंडीच्या दिसांनी थंड हवामानाक लागून आमकां तान चड लागना, पूण गिमाच्या दिसांनी आमचे कुडीक जितलें उदक जाय तितलेंच थंडेच्याय दिसांनी उदकाची गरज आसता. उदकाची तान जायत्या गजालींचेर आदारून आसता.
आमची तान आमच्या भोंवतणच्या वाठारा कडेन संबंदीत आसा, कारण उश्ण वाठारांतल्या लोकांक उदकाची चड गरज आसता, जाल्यार थंड वाठारांतल्या लोकांक उदकाची गरज उणी आसता. कारण, गिमाच्या दिसांनी आमच्या कुडींतल्यान घामाच्या रुपांत उदक भायर वता, देखून आमी आमची कूड हायड्रेटेड दवरपा खातीर चड उदक पितात, जाल्यार थंडीच्या दिसांनी अशें जायना.
कामाच्या प्रकाराचोय तुमच्या तानाचेर परिणाम जाता, तुमी चड शारिरीक काम केल्यार चड उदक जाय पडटा, तुमच्या कामाच्या सुवातेर एसी कुडींत बसून काम केल्यार उदकाची गरज उणी पडटा.
पिरायेचोय सरळ संबंद ताने कडेन आसता, कारण ल्हान भुरगीं हांगा थंय धांवतात, खेळतात आनी चड शारिरीक हालचाल करतात तेन्ना तांकां चड उदकाची गरज आसता, जाल्यार जशें आमी व्हड जाता तशें आमकां उदक उणें जाय पडटा.
जायत्या दुयेंसांनी दुयेंतीक चड उदकाची गरज लागता, गरम वखदां घेतल्यार तांचे उदकाचे प्रमाण वाडटा. जाल्यार ग्लुकोज ड्रिप घेतिल्ल्या दुयेंतीक उदकाची तान उणी लागता. पूण अशें आसून लेगीत आमच्या कुडीक दर दिसा 8- 10 पेले द्रवाची गरज आसता. उदक, रोस, सूप, दूद, च्या, नाल्लाचें उदक पियेवन आनी फळां खावन हे द्रव पदार्थ परतून भरूंक शकतात.
कारण कुडींत उदकाचो उणाव जाल्यार डिहायड्रेशन जावंक शकता, जाका लागून कातीचे, स्वास घेवपाचे त्रास जावंक शकतात. देखून थंडीच्या दिसांनी थंड उदक पियेवंक मेळना जाल्यार कोमट उदक पियेवंक शकता. हे खातीर थर्मसांत कोमट उदक भरुन दवरूं येता, जाका लागून परत परत उदक तापोवपाक पडचे ना आनी थंडीच्या दिसांनी उदक पियेवप चालु उरतलें.
देखून थंडीच्या दिसांनी लेगीत जायते तितलें उदक पियेवंप गरजेचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
