भांगरभूंय | प्रतिनिधी
दर्यावेळो, सोरो, जेवण, संगीत पार्ट्यो गोंयच्या पर्यटनाक चड योगदान दितात. अर्थांत देवळा, चर्च, घसघशे हांचोय हांचोय हातभार लागता. ह्या सगल्यां वांगडा काय उत्सव पर्यटनाक हातभार लायतात. तातूंत कार्नावाल मुखार आसा. धर्मीक, सांस्कृतीक पर्यटनाची आवड आशिल्ले लाखांनी लोक आसात. हांगाच्या उत्सवांक, महोत्सवांक ते उमेदीन येतात. पूण, राज्य उत्सव म्हूण तो मनयत जाल्यार पर्यटनाचे नदरेन फायदोच जातलो. दरवर्सा हजारांनी गोंयकार वेलंकानी, शिर्डी, पंढरपूर, सौंदत्ती वतात. तशे पर्यटक हांगा येतात. हो आंकडो वाडूं येता. पयर मडगांवची दिंडी जाली. 2024 सावन दिंडेक राज्य उत्सव म्हूण मान्यताय मेळटली, अशी घोशणा मुख्यमंत्र्यान केली. खरें म्हणल्यार पोरूं हें थारिल्लें, पूण शक्य जावंक ना. फुडल्या वर्सा हो दर्जो मेळटलो, अशी आस्त. विठ्ठलापूर- सांखळेच्या व्हाळवाट न्हंये देगेर आशिल्ल्या पांडुरंगाच्या देवळाचो त्रिपुरारी उत्सवाक राज्य उत्सवाचो दर्जो मेळ्ळो. गोंयांतल्या हेर कांय वेंचिक उत्सवांक हो दर्जो मेळूंक जाय.
1990 मेरेन बोटीं खातीर सांखळेच्या त्रिपुरारी उत्सवाक व्हडलीशी गर्दी जायनाशिल्ली. मात, उपरांत लोकांचो आंकडो वाडपाक लागलो. हो राज्य उत्सव जाले उपरांत शेंकड्यांनी लोक येवपाक लागले. चैत्री उत्सवाचे निमणे रातीक येतात तशे! पर्यटक येतात, ते देवाच्या दर्शनाक, जात्रा पळोवपाक. थंय तांचें, भुरग्यांचे मनोरंजन जालें, वेळ बरो पासार जालो, जाल्यारुच गर्दी वाडटली. ताका लागून परंपरेक हात लायनासतना उत्सव चड आकर्शक करचो पडटलो. आकाशदिवो आनी हेर सर्त, मोचेमाडकारांचें नाटक, गायकांच्यो मैफिली, खाणांचीं दुकानां, पुस्तक- सीडी प्रदर्शन, भुरग्यांक खेळपाचे स्टाॅल….!! ह्या उत्सवाक येतकच पळोवपा सारकें कितें तरी आसले बगर पर्यटक आकर्शित जावचे नात.
शिरगांवची जात्रा, पोरणें गोंयचें फेस्त, कार्नावाल हांकां गर्दी आसता. तांकां प्रसिद्धीची गरज ना. फेस्ताक पर्यटक आनी हेर राज्यांतल्या हजारांनी लोक येतात. सगल्यांकूच राज्य उत्सव म्हूण दर्जो मेळप शक्य ना. पूण, उत्सव म्हूण ताची सरकाराचे वतीन राष्ट्रीय, आंतरराष्ट्रीय पांवड्याचेर जायरात जावची. वास्को सप्ता, जांबावली गुलाल, दिवाडेचीं बोंदेरां, शिमग्यांतले विवीध गांवांतले उत्सव, सांज्यांव, थ्री किंग फेस्त, चवथ, नवरात्रां, दत्तजयंती हांकां पर्यटक हाजीर रावल्यार ताचो गोंयाक, गोंयकार वेवसायिकांक फायदो जातलो. धर्मीक उत्सवां वांगडाच गोंयांत महोत्सव जातात. मे म्हयन्यांत जावपी मँगो, कोकोनट, कॅश्यू फेस्टीव्हल, अन्न महोत्सव, सेरेंडिपीटी, इफ्फी, पर्पल फेस्त, चित्ररथ मिरवणूक हांकांय चडांत चड पर्यटक येतले हे खातीर यत्न जाय. इफ्फीक प्रतिनिधी सोडल्यार हेर कोण तशे दिसनात. पर्पल फेस्त ही दिव्यांगांक मुखार काडपाची बरी माची. तिका हेर लोकांनीय व्हड संख्येन हजर रावचें. शिमग्या कडेन होमखण, गडे, शिर्शारान्नी, शेणी, सत्र्यो, घोडेमोडणी…. कितलेशेच उत्सव जातात. त्या वेळार पर्यटक हाजीर रावपाक शकतात. कार्नावालाक गर्दी जाता. मात बरेच फावट पर्यटक गोंयच्या कार्नावालाची ब्राझिलांतल्या कार्नावाला कडेन तुळा करतात आनी ते उमेदीन येतात. मात हांगां येतकच तांचो अपेक्षाभंग जाता. ते खातीर उत्सव, महोत्सवांत नेमकें कितें आसतलें, ताची पयलींच जायरात जावंक जाय. आयच्या सोशल मिडिया काळांत वरा भितर संवसारांतल्या सगल्या देशांनी म्हायती धाडप शक्य आसा.
ह्या उत्सवांक पर्यटक आयले जाल्यार विदेशी चलन मेळटलें, हाॅटेलां, येरादारी मळाक रोजगार मेळटलो. उत्सवा निमतान आयले तरी ते हेर थळां पळोवपाक वतले, खरेदी करतले. महोत्सवांक मंडप घालप, सजावट करप हीं कामां गोंयकारांक मेळत जाल्यार दुदांत साकर! उत्सव, महोत्सवाची तोंडी जाता ती जायरात सगल्यांत म्हत्वाची. पर्यटक आपल्या सोयऱ्यांक, इश्टांक सांगताले, तांच्या देशांत लेख बरयतले, सोशल मिडियाचेर पोस्ट, व्हिडियो घालतले. गोंयच्या पर्यटन मळाक मेळिल्लो हो बोनस. मात, अतिथी देवो भवः हे मतींत घट्ट कोरांतून सगल्या वेवसायिकांक वागचें पडटलें. सध्या तें जाताच हाची खात्री ना. कारण अदीं मदीं पर्यटकाक व्हरून बडोवपाच्यो, लुटपाच्यो घडणुको घडल्यात. हातूंत गोंयकारांचो हात नासलो तरी पर्यटन मळ आनी पुराय गोंय बदनाम जाता, हें आमी विसरूंक फावना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
