भांगरभूंय | प्रतिनिधी
-उत्तर गोंय मोटार अपघात दावाे न्यायाधिकरणाचा आदेश
म्हापशेंः तोर्डा जंक्शन, पर्वरी मोटारीच्या धपक्यान दिगंबर सुरेश मोरजकार (32, आल्त पर्वरी-पिळर्ण) हाका मरण अायिल्लें. ताचे आवयक 19 लाख रुपयांची भरपाय दिवपाचो आदेश उत्तर गोंय मोटार अपघात दावो न्यायाधिकरणान (लवाद) कार चालका सयत विमो कंपनीक दिला.
दिगंबराची आवय शुभदा सुरेश मोरजकार (60) हांणी उमेश नारायण च्यारी (58, मेस्तवाडो वास्को) मेसर्स अपरांत मोटार प्रा. लि. (मोटार धनी) आनी एचडीएफसी ईआरजी जनरल इन्शूरन्स कं. लि. (पणजी) हांचे आड लवादा कडेन याचिका दाखल केल्ली. मोटार वाहन कायदो कलम 166 खाला लुकसाण भरपाय म्हूण शुभदा हिणें 36.70 लाख रुपया रकमेचो दावो केल्लो. ही याचिका मार्च 2021 त दाखल जाल्ली.
दिगंबर मोरजकार हे खाजगी आस्थापनांत कामाक अाशिल्ले. 13,500 रुपया वेतन तांकां मेळटाले. तांचे सामायीक उत्पन्न 1.6 लाख आशिल्ले. तशेंच तो घरांतलो कर्तो आशिल्लो. ताचेर आपूण निंबून अाशिल्ले, अशें ताची आवय शुभदा हांणी नमूद केल्ले. याचिकादाराची अजून दोन भुरगीं आसात. पूत बेरोजगार जाल्यार धूव सरकारी नोकरेंत आसून तिचें लग्न जाला. तशेंच तिका घोवाची पेन्शन मेळटा, असो दावो प्रतिवादी वतीन लवादा कडेन सुनावणे वेळार केल्लो.
ह्या निवाड्या वेळार याचिकादारां वतीन अॅड. गवंडळकार जाल्यार प्रतिवादी एचडीएफसी ईआरजी जनरल इन्शूरन्स कं. लि. (पणजी) हांणी लवादा कडेन युक्तीवाद केलो, जाल्यार उमेश नारायण च्यारी आनी मेसर्स अपरांत मोटार प्रा. लि. हे दोग प्रतिवादी गैरहजर रावले.
अपघात जालो तेन्ना दिगंबर 32 वर्सांचो आशिल्लो. ताका लागून दावेदार 18.14 लाख रुपया लुकसाण भरपाये खातीर पात्र आसा. तशेंच 34,630 रुपया अवलंबंत्व आनी हेर भरपाय रक्कम जाता, असो निश्कर्श नोंदोवन मार्च 2021 पसून 6 टक्के वर्सुकीं कळंतरा सयत 19 लाख रुपया रक्कम भरपाय दाव्याच्या स्वरुपांत दिवपाचो आदेश लवादाचे वांगडी एडगर फर्नांडीस हांणी दिला.
दावेदारांक देय रक्कमेंतल्यान दरेकी 6 लाख रुपया रक्कम तांच्या नांवार तांच्या पसंतीच्या खंयच्याय राष्ट्रीयकृत बँकेंत कायम ठेवींत एक आनी तीन वर्सांच्या कालावधी खातीर दोन मुजत ठेवींत दवरची. तशेंच उरिल्लीं रक्कम तांकां धनादेशा वरवीं दिवची. तशेंच दावेदारान वयल्या खटल्याची कोर्ट फी रक्कम एका सप्तका भितर लवादा कडेन जमा करपाचे निर्देश ह्या निवाड्यांत दिल्यात.
मजगतीं, हो अपघात 12 सप्टेंबर 2020 दिसा रातीं 9.30 च्या सुमाराक तोर्डा जंक्शनाचेर घडिल्लो. जीए 06 ई 4999 क्रमांकाच्या हुंदाय क्रेटा मोटारीन जीए 03 जे 4003 क्रमांकाच्या डिओ स्कुटरीक धपको दिल्लो. पर्वरी पुलिसांनी अपघाताचो पंचनामो केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
