भांगरभूंय | प्रतिनिधी
-‘ईडी’न केल्या 39.24 कोटींच्यो 31 मालमत्ता जप्त
पणजीः जमीन हडप प्रकरणांत सक्तवसुली संचालनालयान (ईडी) विक्रांत शेट्टी, मोहम्मद सुहेल, राजकुमार मैथी आनी हेरांनी हडप केल्ल्यो 39.24 कोटींच्यो 31 मालमत्ता जप्त केल्यात. ह्या प्रकरणांत मनी लाँडरिंगचो वापर जाल्ल्यान ईडीन कारवायेक सुरवात केल्या.
बनावट कागदपत्रां तयार करून जमिनी हडप केल्ल्याचो जायत्यो कागाळी राज्यांतल्या विवीध पुलीस स्टेशनांत दाखल जाल्ल्यो. ह्या कागाळींच्या आदारान ईडीन अशा प्रकरणांत घुस्पिल्ल्यांची मनी लाँडरींग कायदो 2002 खाला चवकशी सुरू केल्ली. चवकशी पुराय जाले उपरांत ईडीन विक्रांत शेट्टी, मोहम्मद सुहेल, राजकुमार मैथी आनी हेरांनी हडप केल्ल्यो 39.24 कोटींच्यो 31 मालमत्ता जप्त करपाचो निर्णय घेतला.
जमीन हडप प्रकरणां हाताळपाक सरकारान 15 जून 2022 दिसा आयपीएस अधिकारी निधीन वाल्सन हांच्या फुडारपणा खाला विशेश तपास पंगड (एसआयटी) स्थापन केल्लो. एसआयटीन 18 जून 2022 दिसा पयलो गुन्यांव दाखल करून कारवाय सुरू केल्ली. एसआयटी स्थापन केले उपरांत जमिनी विशीं कायदेशीर निर्णय घेवपाक सरकारान 9 सप्टेंबर 2022 दिसा आदेश जारी करून निवृत्त न्यायाधीश व्ही. के. जाधव हांचो एक वांगडी चवकशी आयोग स्थापन केल्लो. ह्या आयाेगान 18 जानेवारी 2023 पसून जमीन घडप प्रकरणांची सुनावणी सुरू केली. आयोगाक मजत करपाक सरकारी वकील थेमा नार्वेकार हांचीय नेमणूक केल्ली. एसआयटीन 2022 त दाखल केल्ल्या 44 गुन्यांवां विशीं आयोगान चवकशी सुरू केली. एका परस चड गुन्यांवांनी वांटेकार आशिल्ल्यान तशेंच एकाच पद्दतीन गुन्यांव केल्ल्याचे दिसून आयले उपरांत आयोगान 27 दुबावितांक नोटीस धाडून तांची चवकशी केली. तातूंत मोहम्मद सुहेल उर्फ मायकल हाच्या नांवार सगल्यांत चड 13 गुन्यांव नोंद आशिल्ल्याचे उक्ताडार आयले. तशेंच रॉयसन रॉड्रिग्ज (9), राजकुमार मैथी (9), ब्रांका दिनीज (9), मारियानो गोन्साल्वीस (7), पाल्मिरा गोन्साल्वीस (7), राहुल देसाय (6), सेड्रीक फर्नांडीस (4), अँटोनेटे उर्फ अँटोनिटा फर्नांडीस (4), मायिरा अँजेला उर्फ अँजेलिका फर्नांडीस (4), संदीप अर्जुन वझरकार (3), लुईझा फर्नांडीस (3), कायतानो फर्नांडीस (3), मीना नायक (3), सिद्दिकी सुलेमान खान (3), विक्रांत शेट्टी (2), धिरेश नायक (2), अमृत गोवेकार (2), नूर फैजल भटकार (2), ईस्टीवन डिसोझा (2), योगेश वझरकार (2), मारिया रोझा डिसोझा ई गोम्स (2), रिटा फर्नांडीस उर्फ मास्करेन्हास (2), ज्योकीम मास्कारेन्हास (2), दामोदर यशवंत काकोडकार (2), गुलाब दामोदर काकोडकार (2), दानवीर डिसोझा (5) हांचोय हातूंत आस्पाव आसा.
आतां मेरेन 51 गुन्यांव, 27 जाणांक अटक
एसआयटीन जमीन हडप प्रकरणांत आतां मेरेन 51 गुन्यांव दाखल करून 27 जाणांक अटक केल्या. तातूंत मुख्य सुत्रधार मोहम्मद सुहेल, विक्रांत शेट्टी, राजकुमार मैथी हांचोय आस्पाव आसा. जमीन हडप प्रकरणांत कांय सरकारी अधिकाऱ्यांचोय हात आशिल्ल्याचे उक्तें जाले उपरांत तांचेरूय अटकेची कारवाय जाल्ली.
सरकारा कडल्यान अहवालाचो अभ्यास सुरू
जमीन हडप प्रकरणांतल्या जमनी विशीं कायदेशीर निर्णय घेवपाक सरकारान स्थापन केल्ल्या जाधव आयोगान आपलो अहवाल 2 नोव्हेंबराक सरकाराक सादर केला. ह्या अहवालाचो अभ्यास करून सरकार जमिनी विशीं फुडलो निर्णय घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
