भांगरभूंय | प्रतिनिधी
आमी ‘इफ्फी गोवा’तल्यान व्हड सिनेमांत पावले, आमच्या कितल्याशाच सिनेमांची निर्मणीय गोंयांत जाल्या, गोंयांतलो इफ्फी भावता अशें सांगपी ल्हान, व्हड दिग्दर्शक, निर्माते, कलाकार अंदूचे इफ्फींतय आयल्यात. इफ्फी विशीं दोन लेखांतल्यान विचार मांडले उपरांत तिसरे खेप इफ्फी गोवा @20 चेर फाटल्या 15 दिसां भितर बरयतां. इफ्फी गोंयांत उरतलो, फिल्म सिटी विशीं सरकार विचार करता, समाज सुदारपा खातीर, अस्तुरी सक्षमीकरणाचो संदेस घेवन सिनेमाची निर्मणीय जावंक लागल्या.
इफ्फी गोवा @20 मध्यांतराक पावत आयला तेन्ना गोंयचें पत्रकार रश्मी नर्से ‘यशोदा’ हो सिनेमा इफ्फींत घेवन येता. रश्मी गांवांतलें एक चली, व्हडा कश्टांनी व्हिज्युअल मिडीयांतल्यान ‘भांगरभूंय’ सारक्या दिसाळ्यांत पणजी प्रतिनिधी म्हणून कामाक पाविल्लें. इफ्फींत तेंय भोंवलें. पत्रकार परिशदो, मुलाखती केल्यो, सिनेमा पळयले. आयज वीस वर्सांनी तेंय ल्हान कांय जायना सिनेनिर्मिती करता. म्हज्या मतान ‘इफ्फी @20 गोवा’चें हें व्हड जैत. ह्या जैताची काणी इफ्फींतल्यान फुडारांत दिसतली, अशी आस्त आसा. इफ्फींतले पत्रकार परिशदेक हाजीर रावपी देसांतल्या पत्रकारांनीय ल्हान, व्हड सिनेमाची निर्मणीय केल्या, हेंय इफ्फीन गोंयांत येवन मेळयल्लें येस. ते विशीं हांवें फाटल्या लेखांनी बरयल्लें, रश्मीचें ‘यशोदा’ हें फिल्म लेखाक बळगें दिवपी.
कथानक बरें आसल्यार तंत्रज्ञानाच्या बळार रेंव, पावस, वत, उदक, सैमाची बांदावळ करुन सिनेमा जल्माक येवकं शकता हें ‘पेझंटस’ ह्या पोलंडच्या फिल्मांतल्यान पळोवंक मेळ्ळें. ह्या सिनेमात अॅनिमेशन, हातान काडिल्ल्या चित्रांचो उपेग जाला.
लेखिका ज्योती कुंकळ्ळकार, अभिनेत्री डाॅ. मिनाक्षी मार्टिन्स, दिग्दर्शक दिनेश भोसले, संवाद लेखक सुयश कामत हांच्या जैतांत, फुडारांत इफ्फीचोय वांटो आसा. गोंयचे मातयेंत कला आसा, कलाकारय आसात, गरज आसा गुण वळखुपाची. बालभवनाची आदली अध्यक्ष विजयादेवी राणे ल्हान भुरग्यांच्या गुणांचो अभ्यास करपी, तांच्या माथ्यार मायेन हात भोंवडावपी. ल्हानपणात, भुरगेपणात आशिल्ले कलेची जतनाय तरणाटे घेतात अशें ना, तांकां हेर कितें करतात तें आपणेय करचें, उंचायेर वचचें, खूब पयसो मेळोवचो अशें दिसता. सपनां सगल्यांनी पळोवपाक जाय, पूण व्हड जातना आवडय बदलता, भोंवतण, भोंवतणीच्या मनशांचो भुरग्यांचेर प्रभाव पडटा. गोंयांत आयिल्ल्या इफ्फीन गोंयकारांचीच न्हय शेजारच्या बाॅलीवूड, टाॅलीवूड, काॅलीवूड, विदेसांतल्या हाॅलीवूडाची उमेद वाडयली. इफ्फींत जैतवंतांक सरकारा कडल्यान मेळपी इनामांची संख्या वाडल्या, बक्षीसय चड पयशांचें आसता.
युनेस्को शांती सिनेमा इनाम ते ओ टी टी सिनेमा पुरस्कारा मेरेन इनामाची व्हड वळेरी आसा. इनामा फाटल्यान कश्ट आसता, पयल्याच सिनेमाक पुरस्कार मेळटलो अशें ना. कांय वेळार धा- पंधरा वर्सां रांकेंत रावचें पडटा, आपल्याक सिद्ध करुन दाखयतकीच इनामांय आपसूक पायां कडेन येतात.
गोंयचे मातयेची व्हडवीकाय सांगपी मास्टर दत्ताराम हांचो अज्रंवर दत्तू ठेको सिनेमांतल्यान परतून आयकूंक मेळपाची शक्यताय आसा. बापायन ‘ब्लॅक अँड व्हायट’ सिनेमा केलो, पूत करण जोहर तोच सिनेमा रंगीत करतना संगीत ताल, सूर शेणूंक जायनात.
इफ्फीचो फिल्म बाजार व्हड जाला, कांपालावेले नवे वाटेर तंबूंत जेन्ना ते विंशी ज्ञान मेळोवपाकय आडमेळ्यांची सर्त आसता. फिल्म बाजार ज्ञान घेवन येता, ज्ञानाची प्रयोगशाळाय तातूंत आसता, पूण समेस्तांक वचूंक मेळना, नोंदणी करची पडटा, वरांची वरां बसचें पडटा. फिल्माची निर्मणी करपी, फिल्मांक पयशांचो आधार दिवपी, कलाकारय सोदून काडचे पडटात. ‘फिल्म बाजार’ हें इफ्फींतल्यान गोंयकारांक मेळिल्लें एक साधन. गोंयचे सृजनशिलतेन ताचो लाव मेळचो अशें इफ्फींच्या जाळवणदारांक दिसता. सगल्या लेखक, कवींक येवपाक उमेद आसतली, आमंत्रणपत्र कशें मेळोवप तें खबर आसतलें अशें न्हय. तिकेट काडून सोंपेपणान इफ्फींतलो बरो सिनेमा पळोवंक मेळटलो अशें ना, ते खातीर इफ्फीच्या विंगड विंगड विभागांतल्या सिनेमाची वळेरी, म्हायती आसची पडटा. वीस वर्सांनी इफ्फी पेपरलेस करपाची मोख लागीं पावल्या, तिकेटी मोबायलार, कॅटलाॅगय मोबायलार, इफ्फीचें प्रतिनिधीत्वय मोबायलावेल्यान बुकिंग करुन मेळोवपाक आतां सोपें जाला.
इफ्फीतलो सिनेमा आतां पणजे आयनाॅक्सान बिगपिक्स तंत्रज्ञानामेरेन पावला. पर्वरे 4, सम्राट, अशोक दोन, फिल्म बाजाराचीं थळांक मुखेल, त्या भायर माकनिझ पॅलेस, मडगाव रवींद्र भवनात सिनेमा पळोवंक मेळटा. कला अकादमीतल्या मास्टर क्लासाक मुखेल थिएटर 60 ते 70 टक्के भरिल्लें आसता. अंदूय दक्षिण, उत्तर, पूर्व, पश्चिमे कडलो सिनेमा, सिनेमोगी, तांचे सोयरे, चिअर लिडर्स, पत्रकारय आयल्यात.
तांचे कडल्यान गोंयकारांकय कितें तरी शिकूंक मेळटलें, उलयल्यार, दोन उतरां आयकल्यार व्यक्तीमत्वां, सिनेमाची वळख जातली अशें न्ही पूण वातावरणाची म्हायती मेळटा.
फिल्म सिटी विशीं ‘भांगरभूंयं’त लेख प्रसिद्ध जाले, सरकारांतले मंत्री, सभापती उलयले, म्हूण खिणांत फिल्मसिटी तयार जातली अशें न्हय. वीस वर्सां पयलीं फिल्म सिटी खातीर इफ्फीक तेंको दिवपी दिग्दर्शक, निर्मात्यांनी बीं शिंपडायलें. बांदकामातय तंत्रज्ञान आयलां, धाकटुली फिल्म सिटी तीन वर्सां भितर जावपाचें सपन आमी पळोवया, गोंयच्या राजभासेंतल्या पयल्या कोंकणी दिसाळ्याचें सपन पळयल्लें तशेंच. बांदिल्ली फिल्म सिटी रातयां मोडूंक येतली अशीय आसूंक येता, नाका म्हणून तिका उजो कित्याक घालचो? आयज नाका म्हणपी फिल्म सिटींत फाल्यां वेगळ्या विभागाचे मुखेली कित्याक जावचे न्हय?
कायदे, नेमावळ विचारांत घेवन, भासाभासेंतल्यान आदले मुखेलमंत्री मनोहर पर्रीकार हांणी इफ्फीची बुन्याद घाल्ली. तांणी रोयिल्लें चाफ्याचें रोपय व्हड जालां, नवे कट्टेय जाल्यात, चाय पे चर्चे वेल्यान मांडवी तट पर भासाभासे मेरेन इफ्फी विस्तारला. आयनाॅक्स कोर्टयार्डांत सकाळ पसून सांज मेरेन व्हांवपी बियर मात्शी कोनशाक पावल्या. स्टाॅल उणे, मेकळो वारो, उगतें मळब, सैम, सांगात, पियेवपाक उदक, च्या, काॅफी आयनाॅक्स पणजे वरी हेर कडेन जाय. 54 वो इफ्फी तोच रकाद दिवपी, नियोजन सुदारपाचो, फिल्मसिटी वाटेन वचपाचो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
