शिक्षकी पेशाक खत

भांगरभूंय | प्रतिनिधी

नाजाल्यार समाजांतले सारासार विचार नाशिल्ले लोक मनाक येता तशे वागत रावतले आनी समाजीक एकवटाक वेरो वचत रावतल्यो.

शाळा म्हणल्यार ज्ञानाचें देवूळ. शिक्षक हो देव. ताका प्रत्येक विद्यार्थी स्वताच्या भुरग्या प्रमाण आसपाक जाय. विद्यार्थ्यांनीय शिक्षकाक मान- सन्मान, आदर दिवपाक जाय. आपलो विद्यार्थी जिणेच्या सगल्या मळांचेर येसस्वी जातलो, स्वताच्या पांयांचेर उबो जातलो, हे खातीर शिक्षकान रात दीस यत्न करपाक जाय. आदल्या तेंपार तत्वां बाळगुपी थोडे शिक्षक तन- मन, कांय वेळार धन ओंपून विद्यादान करताले. आयज पसून तसले शिक्षक प्रत्येक शाळेंत आसात. तशेंच फक्त बरो पगार मेळटा म्हूण शिक्षक जाल्लेय कांय जाण आसात. स्वताचें गिन्यान, कुशळटाय वाडोवपाक तांकां आळस येता. पगारा वांगडा आनीक कितें करून (ट्यूशन बी) धन जोडूंक मेळटलें, हाचेरुच तांचें लक्ष. विद्यादाना बदला विद्याधनाचेर दोळो आशिल्ले जशे शिक्षक आसात, तशे गुन्यांव म्हणू येता अशीं कर्मां करपीय शिक्षक आसात. शिक्षक, प्रशिक्षक (कोच) हांच्यो दोन घडणुको पयर उक्ताडार आयल्यात. एक कर्नाटकांतली आनी दुसरी तमिळनाडूंतली. अर्थांत अशें पयलेंच खेप जावंक ना. हाचे आदींय देशांत जायते कडेन हाचे पास्ट प्रकार घडल्यात, शिक्षकांक ख्यास्त जाल्या. थोडे मागीर निर्दोशूय सुटल्यात.
शिमोगा जिल्ह्यांतले एके शाळेंत सात वर्सां पिरायेचे चलयेक शिक्षकान सक्तीन तांतीं खावपाक घालपाचो प्रकार घडला. ही सरकारी शाळा. ते चलयेचो बापूय थंयच शिकयता. चली दुसरे यत्तेंत शिकता. हे घडणुकेक लागून ब्राह्मण समाज तिडकला. तांतीं जिवाक बरें, अशें सांगून त्या शिक्षकान चलयेक तें खावपाक सांगलें. आमी ताका केन्नाच मांसाहारी जेवण दिवंक ना. तांतीं खातकच तें दुयेंत पडलें, तशेंच ताचेर मानसीक परिणाम जालो, अशें चलयेच्या बापायन सांगलें. पुलिसांनी ह्या प्रकाराचे चवकशेचे आदेश दिल्यात. मात, चलयेचो बापूय आतां जालें तें जालें अशें म्हणीत कागाळ फाटीं घेवंक सोदता. घडये तेच शाळेंत तो शिक्षक आसा, म्हूण ताणें तसो निर्णय घेतला आसतलो. दोगूय एकाच धर्माचे. नाजाल्यार कितें जावपाचें तें सांगपाक येना. मात, अमूकच खा, तमूक खांव नाका, अशी कोणाचेर सक्ती करप कायद्यांत बसना. मात हालीं असंवेदनशीलताय बरीच वाडल्या. अमूक जनावराचें मांस घरांत दवरलां म्हूण संबंदीत व्यक्तीक लोकांनी वचून बडोवपाच्यो, जिवेशीं मारपाच्यो घडणुको घडल्यात. मजा म्हणल्यार तें मांस मागीर भलत्याच प्राण्याचें हें सिद्ध जालां. ही असंवेदनशीलताय कित्याक वाडल्या, हांव सांगता तेंच आयक प्रवृत्ती कित्याक संवकल्या…. ताचे फाटलीं कारणां सोदून तीं ना करपाची आयज गरज आसा. नाजाल्यार समाजांतले सारासार विचार नाशिल्ले लोक मनाक येता तशे वागत रावतले आनी समाजीक एकवटाक वेरो वचत रावतल्यो.
दुसरी घडणूक हाचे परस गंभीर. गुन्यांवूच तो. कोयम्बतुरांतले एके खाजगी शाळेच्या कर्मचारी कम बॅडमिंटन कोचान एक खेळगडी चलयेक व्हाॅट्सअॅपाचेर बुरशे फोटो धाडपाक सांगलें. अरुण ब्रून हो शिक्षक 28 वर्सां पिरायेचो. चली 17 वर्सांचें. ताणें हेर कांय चली विद्यार्थ्यां वांगडा अशेंच वर्तन केलां, अशें पुलीस सांगतात. शिक्षकाक नोकरे वयलो काडला, पुलिसांनी ताका अटक केल्या. विशेश म्हणल्यार ताका राज्य पांवड्याचेर पदकां मेळ्ळ्यांत. एके बॅडमिंटन अकादमी कडेन तो संबंदीत आसा. फाटले स म्हयने तो कोच म्हूण काम करतालो. गोंयांत स्नूकर खेळपी खेळगड्याक हालींच घरफोडी करतना धरला. तोय राज्य पांवड्या वयलो खेळगडो. फोर्स करतकच ते चलयेन ब्रुनाक सादो फोटो धाडलो. ताचेर ताणें ताका तुजे बुरशे फोटो धाड अशें परत सांगलें. ताणें ताचे मोबायलाचेर फोटोय काडल्यात, अशें पुलीस सांगतात. पोस्को कायद्या खाला आतां केश चलतली.
शिक्षक मळाचेर अशें जावप ही त्या पवित्र पेशाक खत लावपा सारकी गजाल. सुक्या वांगडां ओलेंय जळटा. असल्या घडणुकांक लागून मागीर लोक सगल्याच शिक्षकांक एकेच नदरेन पळयतात. फाटीं देशांत कुस्ती संघटनेच्या एका कोचाची गजाल बरीच गाजिल्ली. तो अजून भायर आसा काय परत कुस्ती संघटने कडेन ताचो अप्रत्यक्ष संबंद आयला, तें उक्ताडार येवंक ना. पूण ते घडणुकेक लागून बायलां कुस्ती मळाचेर खवदळ जाल्लो. देशाच्या खेळा मळाची लजूय गेल्ली. खरें म्हणल्यार शिक्षकां विशीं आदर, अभिमान तो विद्यार्थी जाण्टो जालो तरी उरपाक जाय. बऱ्या शिक्षकांची सदांच सगल्यांक याद उरता. अशें कर्तृत्व करप, मान मेळोवप तशें कठीण न्हय. पूण सभावांत दोश आसतकच कांय जाण मदींच घाणयतात आनी आपल्या वांगडा शाळा, शिक्षकी पेशाकूय बदनाम करतात.